Tetë dekada pas Holokaustit, marrëdhëniet mes Izraelit dhe Gjermanisë kanë hyrë në një kapitull të ri historik: shteti hebre po bëhet një nga furnizuesit më të rëndësishëm të armatimit për ushtrinë gjermane. Kjo aleancë e re po vjen në një moment kur Berlini po synon riarmatimin më të madh që nga Lufta e Dytë Botërore, i shtyrë nga kërcënimet e Rusisë dhe Iranit.
Kancelari gjerman Friedrich Merz ka shpallur ambicien që Gjermania të ndërtojë “ushtrinë më të fortë në Evropë”. Reformat e reja i hapin rrugë shpenzimeve të pakufizuara për mbrojtje, ndërsa qeveria po punon për futjen e një sistemi të ri të rekrutimit. Në këtë strategji, Izraeli po shfaqet si partneri kryesor.
Dokumente të rrjedhura në media tregojnë se Gjermania ka paraparë qindra milionë euro për dronë vetë-shkatërrues dhe municion nga kompanitë izraelite “Elbit” dhe “Israel Aerospace Industries”. Vitin e kaluar, u nënshkrua edhe marrëveshja prej 2 miliardë eurosh për furnizim me raketa kundër-tanke Spike – një nga kontratat më të mëdha të Izraelit në Evropë.
LEXO EDHE:
Përveç armatimit, Berlini po mbështetet tek Izraeli edhe në fushën e inteligjencës. Arrestimi i një celule të dyshuar të Hamasit në Berlin muajin e kaluar u realizua me mbështetjen e operacioneve të shërbimit sekret izraelit, Mossad, në territorin evropian.
Ky bashkëpunim, që dikur do të dukej i paimagjinueshëm, sot shihet si një dëshmi e transformimit të marrëdhënieve mes dy vendeve. Zyrtarë të lartë izraelitë theksojnë peshën historike të faktit se Gjermania tani mbështetet te teknologjia izraelite për sigurinë e saj – një kthesë e madhe nga e kaluara e errët e shekullit XX.
Izraeli është “krenar” që sistemet e tij të mbrojtjes – nga raketat Arrow 3 deri te dronët Heron – po bëhen pjesë e ushtrisë së re gjermane. Në një Evropë që po përballet me tensione të rritura, marrëdhënia Berlin–Jerusalem po shndërrohet në një bosht të ri strategjik të sigurisë.
Holokausti ishte përndjekja dhe shfarosja sistematike e hebrenjve nga regjimi nazist i Adolf Hitlerit gjatë viteve 1933–1945. Nën ideologjinë raciste të nazistëve, hebrenjtë u shpallën “armiq të racës gjermane” dhe u çuan drejt zhdukjes.
Rreth 6 milionë hebrenj u vranë gjatë Holokaustit, bashkë me miliona viktima të tjera – romë, polakë, njerëz me aftësi të kufizuara, kundërshtarë politikë e të tjerë. Konsiderohet krimi më i madh i shekullit XX dhe një nga tragjeditë më të errëta të historisë moderne.