OBSH-ja shqyrton përdorimin e vaksinave eksperimentale për Ebolën

Liderët globalë të shëndetësisë po shqyrtojnë nëse vaksinat ose ilaçet ende në zhvillim mund të përdoren për të luftuar Ebolën në Republikën Demokratike të Kongos, ndërsa drejtori i Organizatës Botërore të Shëndetësisë, Tedros Adhanom Ghebreyesus ka thënë se ishte thellësisht i shqetësuar nga shpejtësia dhe përmasat e shpërthimit.

Ghebreyesus ka deklaruar se ka pasur të paktën 500 raste të dyshuara me Ebola dhe 130 vdekje të dyshuara në Republikën Demokratike të Kongos që nga fillimi i shpërthimit të ri, duke shënuar një rritje nga rreth 200 raste dhe 65 vdekje kur shpërthimi u njoftua të premten.

Ekzistojnë disa variante të virusit që mund të shkaktojnë Ebolën. Varianti Bundibugyo, i cili është identifikuar si përgjegjës për shpërthimin aktual, nuk ka vaksinë apo trajtim të miratuar.

Një zyrtare e OBSH-së në provincën Ituri, ku janë raportuar shumica e rasteve, ka thënë se shpërthimi mund të kërkojë shumë kohë për t’u vënë nën kontroll.

“Nuk mendoj se për dy muaj do ta kemi përfunduar këtë shpërthim”, ka thënë Anne Ancia, përfaqësuesja e OBSH-së për Kongon, për gazetarët në Gjenevë, duke përmendur një shpërthim të mëparshëm të Ebolës që ka zgjatur dy vjet. 

Gati 2,300 njerëz vdiqën midis viteve 2018 dhe 2020 në shpërthimin më vdekjeprurës të Ebolës në historinë e Kongos.

“Në nivel ndërkombëtar, po shqyrtojmë cilat vaksina ose trajtime eksperimentale janë të disponueshme dhe nëse ndonjëra prej tyre mund të jetë e dobishme në këtë shpërthim”, ka shtuar Ancia.

Një zyrtar i lartë i “Mjekët pa Kufij”, ka thënë se reagimi ka të ngjarë të ndërlikohet nga mungesa e qasjes në kujdes shëndetësor në zonën e prekur, ku ekziston një konflikt i gjatë i armatosur.

Ndërkohë, Tedros i ka thënë Asamblesë Botërore të Shëndetësisë, e cila po mbahet këtë javë në Gjenevë, se numri i rasteve dhe vdekjeve do të ndryshojë “ndërsa operacionet në terren po zgjerohen, përfshirë forcimin e mbikëqyrjes, gjurmimit të kontakteve dhe testimeve laboratorike”.