Shok në Hungari, aleatët e Orbanit blejnë mediumin më të ndjekur pak para zgjedhjeve

Gazetarët në gazetën më të lexuar të Hungarisë “Blikk” kanë shprehur tronditje pasi një grup mediatik që shihet si i afërt me partinë e kryeministrit nacionalist Viktor Orban, Fidesz, ka blerë tabloidin nga pronarët e tij të mëparshëm zviceranë.

Blerja, e cila vjen ndërsa Hungaria përgatitet për zgjedhje vendimtare vitin e ardhshëm, e në të cilat Orban përballet me një sfidë të paprecedentë nga opozita, shihet gjerësisht si një tjetër përpjekje për të rritur ndikimin e qeverisë në media.

Grupi mediatik pro-Orban, Indamedia, ka thënë të premten se kishte blerë një koleksion titujsh hungarezë nga Ringier, duke përfshirë revistën Glamour dhe po ashtu Blikk, një tabloid popullor, faqja e lajmeve e të cilit arrin rreth tre milionë lexues online çdo muaj, raporton The Guardian.

Kryeredaktori në largim i Blikk, Ivan Zsolt Nagy, ka thënë të hënën se ai dhe një tjetër menaxher i lartë po largoheshin në "marrëveshje të ndërsjellë" me pronarin e ri.

Ata ishin punësuar shtatë muaj më parë për të ripozicionuar Blikk, "duke u përqendruar jo në sensacionalizëm, por në histori interesante" dhe për të qenë "më të orientuar drejt publikut, duke mbuluar politikën, ekonominë dhe kulturën", ka thënë ai në Facebook, ka raportuar AFP.
Stafi në Blikk ka thënë se ishte i tronditur. 

“Gati sa nuk pësova një atak në zemër kur dëgjova njoftimin”, ka thënë një gazetar, i cili kërkoi të mbetej anonim. “Për mua, kjo është moralisht e papranueshme.”

Blikk ka njoftuar një kryeredaktor të ri, Balazs Kolossvary.

Shumë gazetarë që kanë vendosur të qëndrojnë thonë se janë në një pozicion të vështirë pasi nuk kanë mbetur shumë media të tjera ku mund të aplikojnë. 

Gjatë 15 vjetëve të fundit, Orban ka përdorur një peizazh të gjerë mediatik pro-qeveritar për të rritur imazhin dhe sondazhet e tij.

Ndërsa transaksionet e mëdha mediatike kanë tendencë të ndodhin ose pas zgjedhjeve ose gjatë një periudhe të qetë politike, blerja nga Ringier vjen më pak se gjashtë muaj para zgjedhjeve të përgjithshme të prillit.