-
Përktheu:
Flutura Gashi-Mehmeti
- 25 mars 2026 08:56
- Shpërndaje në:
Nëse çmimi i naftës arrin në 150 dollarë për fuçi, kjo do të shkaktojë një recesion global, ka deklaruar për BBC-në drejtuesi i gjigantit financiar amerikan “BlackRock”.
Larry Fink, i cili drejton menaxhuesin më të madh të aseteve në botë, ka thënë se nëse Irani “mbetet një kërcënim” dhe çmimet e naftës mbeten të larta, kjo do të ketë “implikime të thella” për ekonominë botërore.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj Kontribuo“BlackRock” është një kolos financiar, që kontrollon asete me vlerë 14 trilionë dollarë, dhe është një nga investitorët më të mëdhenj në shumë prej kompanive më të mëdha në botë.
Madhësia dhe shtrirja e saj i japin Fink-ut, i cili është një nga tetë bashkëthemeluesit e kompanisë, e themeluar në vitin 1988, një pasqyrë unike mbi gjendjen e ekonomisë globale.
Konflikti në Lindjen e Mesme ka shkaktuar luhatje të mëdha në tregjet financiare, ndërsa njerëzit përpiqen të vlerësojnë se çfarë do të ndodhë me kostot e energjisë.
Sipas Fink-ut, është ende herët për të përcaktuar shkallën dhe rezultatin përfundimtar të konfliktit, por ai beson se mund të zhvillohet në një nga dy skenarët ekstremë.
Në njërin rast, nëse konflikti zgjidhet dhe Irani bëhet një vend i pranueshëm sërish nga komuniteti ndërkombëtar, atëherë çmimi i naftës mund të bjerë nën nivelin që ishte para luftës.
Por nëse jo, ai thotë se mund të ketë “vite me çmime mbi 100 dollarë, afër 150 dollarëve për naftën, gjë që ka implikime të thella në ekonomi” dhe “me shumë gjasë një recesion të fortë dhe të thellë”.
Rritja e kostove të energjisë ka bërë që disa në Mbretërinë e Bashkuar të argumentojnë se vendi duhet të fokusohet më shumë në prodhimin e vet të naftës dhe gazit.
Të martën, organizata e industrisë Offshore Energies UK ka thënë se pa më shumë prodhim vendas, vendi rrezikon të bëhet i varur nga importet “në një kohë të rritjes së paqëndrueshmërisë globale”.
Fink thotë se vendet duhet të jenë pragmatike në lidhje me përzierjen e burimeve të energjisë duke përdorur të gjitha burimet e disponueshme, por sigurimi i energjisë së lirë është kyç për të nxitur rritjen ekonomike dhe për të rritur standardet e jetesës.