Spanja ende në alarm, temperatura ka arritur deri në 46 gradë celsius

Spanja mbetet në gatishmëri të lartë për nxehtësi veçanërisht pasi një rekord i përkohshëm i temperaturës së qershorit prej 46 gradë celsius është vendosur të shtunën pasdite në El Granado në provincën andaluziane të Huelvës. 

Temperatura më e lartë e regjistruar më parë për qershorin ishte 45.2 gradë celsius, e regjistruar në Sevilje në vitin 1965, raporton The Guardian.

Zyra shtetërore meteorologjike e Spanjës, Aemet, dhe ministria e saj e Shëndetësisë i kanë paralajmëruar njerëzit të tregojnë kujdes shtesë për shkak të nxehtësisë.

"Ne presim temperatura anormalisht të larta dhe të vazhdueshme, si gjatë ditës ashtu edhe gjatë natës, që mund të përbëjnë një rrezik për njerëzit e prekshëm ose të ekspozuar", ka thënë Aemet në një deklaratë të shtunën.

Ndërkohë, ministria e Shëndetësisë u ka kërkuar njerëzve të monitorojnë alarmet e motit, të qëndrojnë të hidratuar dhe larg diellit, si dhe të kontrollojnë ata që mund të jenë në rrezik.

"Mos harroni se ndërsa nxehtësia na prek të gjithëve, ajo prek njerëz të ndryshëm në mënyra të ndryshme", ka thënë ministria.

Spanja ka regjistruar temperaturën e saj më të lartë ndonjëherë në gusht të vitit 2021, në qytetin andaluzian të Montoro, pranë Kordobës, e cila kishte arritur në 47.4 gradë celsius.