Të bijtë e ish-presidentit amerikan dëshmojnë në New York

Eric Trump ka dëshmuar para gjykatës se kurrë nuk ishte përfshirë ose në dijeni të deklaratave financiare, me të cilat, prokurorët e shtetit të New Yorkut pretendojnë se janë fryrë financat dhe vlera e biznesit familjar të Donald Trumpit. I biri i tij ka bërë përpjekje që të qartësohet, sepse pas dëshmisë se kurrë nuk ishte i përfshirë, në gjykatë janë prezantuar emailat me të cilat konfirmohej përfshirja e Eric Trumpit në këto deklarata financiare.

Ai është arsyetuar se organizata e tyre është e madhe dhe se ka deklarime financiare, por që në ato nuk ka punuar asnjëherë.

Eric Trump ka dëshmuar pas vëllait të tij Donald Trump Jr në procesin gjyqësor për mashtrim.

Ish-presidenti amerikan, Donald Trump, pritet të dëshmojë të hënën. Ndaj tij po zhvillohen edhe disa procese të tjera gjyqësore në lidhje me qëndrimet e tij për manipulim të zgjedhjeve presidenciale.