-
Përktheu:
Flutura Gashi-Mehmeti
- 11 dhjetor 2025 09:38
- Shpërndaje në:
Plani i presidentit të SHBA-së, Donald Trump, për paqen në Ukrainë përfshin propozime për të rikthyer rrjedhat e energjisë ruse në Evropë, investime të mëdha amerikane në metalet e rralla dhe energjinë ruse, si dhe shfrytëzimin e aseteve sovrane të ngrira ruse, raporton Wall Street Journal.
Gazeta ka shkruar se planet janë detajuar në shtojcat e propozimeve të paqes që i janë dorëzuar homologëve evropianë gjatë javëve të fundit.
Ato përfshijnë një plan që firmat financiare amerikane dhe bizneset e tjera të shfrytëzojnë 200 miliardë dollarë asete sovrane ruse të ngrira për projekte në Ukrainë, duke përfshirë një qendër të re të madhe të të dhënave të mundësuar nga termocentrali bërthamor Zaporizhzhia, i cili tani kontrollohet nga forcat ruse, ka thënë gazeta.
Kompanitë amerikane do të investonin në sektorë strategjikë rusë, siç janë nxjerrja e metaleve të rralla dhe shpimi i naftës në Arktik, ndërsa rrjedhat e energjisë ruse në Evropën Perëndimore dhe në botë do të riktheheshin, sipas WSJ-së.
Gazeta ka thënë se një zyrtar i paidentifikuar evropian i krahasoi marrëveshjet e propozuara të energjisë SHBA-Rusi me një version ekonomik të konferencës së Jaltës të vitit 1945.
Në atë takim, fituesit e Luftës së Dytë Botërore, Bashkimi Sovjetik, Shtetet e Bashkuara dhe Britania, i kishin ndarë sferat e tyre të interesit në Evropë.
Rusia ka pushtuar Ukrainën në shkurt të vitit 2022 pas tetë vjetësh luftimesh midis separatistëve të mbështetur nga Rusia dhe trupave ukrainase në Donbas, i cili përbëhet nga rajonet e Donetskut dhe Luhanskut.