Granit Xhaka, lider i lindur

Kapiteni i Zvicrës, Granit Xhaka dha alarmin pas ndeshjes së fundit miqësore para Kupës së Botës. Presidenti i Federatës së Futbollit të Zvicrës, Peter Knabel, i komenton vërejtjeve e Xhakës dhe nuk ka gjë tjetër veçse lëvdata për to

Blue Sport - “Duhet t’i shtrëngojmë frenat, përndryshe mund të shkojmë në shtëpi pas tre ndeshjesh. Nuk mund të luash kështu, me gjithë respektin e duhur”. Bum! Kjo deklaratë e drejtpërdrejtë nga Granit Xhaka pas barazimit 1:1 me paraqitje të zbehtë të shtunën e kaluar në miqësoren kundër Australisë goditi vërtet fort.

Shokët e tij të ekipit, megjithatë, i kuptojnë fjalët kritike të kapitenit të ekipit Zvicrës. Michel Aebischer tha se thirrja e zgjimit të Xhakës ishte e përshtatshme. Tre ditë para ndeshjes kundër Katarit, Silvan Ëidmer thotë se “ato komente nuk kanë qenë një temë e madhe në ditët e fundit”. “Por mund të shihni që tensioni po rritet dhe turneu është gati të fillojë. Intensiteti në stërvitje po rritet”

Dhe si e shohin krerët e federatës kritikat publike të Xhakës? Peter Knabel, president i Federatës Zvicerane të Futbollit, e bën të qartë në emisionin e futbollit të “Blue Sport” kushtuar Botërorit. 

“Po flasim për kapitenin, lojtarin me paraqitjet më të mira të të gjitha kohërave në ekipin përfaqësues zviceran. Ai u zhgënjye pas ndeshjes kundër Australisë. Dhe pastaj është detyra e Xhakës - ose edhe përgjegjësia e tij – t’i adresojë gjërat qartë. Ai e ka përmbushur këtë detyrë”.

Prandaj, ishte “absolutisht në rregull” që Xhaka e bëri deklaratën publikisht dhe jo vetëm brenda ekipit. Andreas Boni, kryeredaktor i “Blue Sport”, pajtohet po ashtu. “Shkëlqyeshëm! Ai dëshiron të tregojë kur nuk është i kënaqur. Kjo tregon vullnetin e tij për të fituar. Xhaka është kapiten dhe ka besimin e ekipit për të thënë gjëra të tilla”.

Knabel e di saktësisht se çfarë e bën 33-vjeçarin të duket i veçantë. Ai ishte drejtuesi i akademisë së të rinjve te Baseli kur Xhaka ishte në prag të depërtimit në ekipin e parë. “Edhe kur ishte shumë i ri, Graniti gjithmonë kishte një mendim dhe nuk kishte frikë ta shprehte atë”, thotë Knabel.

Edhe Boni e di këtë, pasi është përplasur me Xhakën në më shumë se një rast në të kaluarën. 

“Graniti është shumë emocional. Ndonjëherë shpërthen si raketë, por pastaj qetësohet po aq shpejt dhe çështja harrohet. Por ai është, sigurisht, një lider i shquar”.

Do të kishte qenë keq nëse shokët e tij të ekipit do ta kishin marrë kritikën negativisht, thotë Knabel. 

“Ai e përfshiu veten në kritika dhe për këtë arsye mori mbështetje. Nëse nevojitej një thirrje zgjimi për Kupën e Botës, ishte pikërisht momenti i duhur”, ka thënë Knabel.