Derbi i madh mes Holandës dhe Francës nuk ka dhënë fitues. Madje nuk ka ofruar as gola. Ndeshja e zhvilluar të premten mbrëma në Leipzig ishte e para në “Euro 2024” që nuk e ofroi asnjë gol.
Në fushë kishte yje të shumtë të futbollit. Kishte edhe raste nga të dy palët, por në fund rezultati ishte 0:0.
Kylian Mbappe nuk luajti për Francën, ndonëse pritej të paraqitej me maskë. Ai megjithatë mbeti në stol.
Që në minutën e parë rast të mirë kishte Holanda. Franca u përgjigj menjëherë. Dhe kështu ishte e gjithë ndeshja, me raste në të dy anët. Tempoja ishte shumë e lartë gjatë 90 minutave.
Holanda i kishte shtatë raste për gol, ndërsa Franca plot 16. Holandës në pjesën e dytë iu anulua një gol për pozitë jashtë loje.
Holanda e Franca mbesin në pozitat një e dy në Grupin D me nga katër pikë. Austria është e treta me tri pikë, ndërsa Polonia mbetet pa pikë dhe tashmë është e eliminuar.
Më 25 qershor, Holanda luan me Austrinë, ndërsa Franca me Poloninë.
Lojtari i ndeshjes: Kush tjetër pos Kantes
N’Golo Kante është kthyer shumë fuqishëm te Franca. Për herë të dytë në Euro 2024 ai është shpallur lojtari më i mirë.
UEFA e vlerësoi më të mirin edhe në ndeshjen mes Holandës dhe Francës.
“Ishte shumë i rëndësishëm për pjesën defenzive gjatë gjithë ndeshjes. Por ishte me ndikim edhe në momentet sulmuese të Francës”, kanë vlerësuar ekspertët e UEFA-s.
Holanda shënon, por VAR-i ia anulon
Holanda kaloi në epërsi përballë Francës në minutën e 69-të, por goli iu anulua pas intervenimit të VAR-it.
Xavi Simons realizoi, por goli u anulua pasi u vlerësua se Denzel Dumfries ishte në pozicion jashtë loje.
VIDEO:
XAVI SIMONS 🇳🇱(2003) BREAKS THE DEADLOCK WITH A GREAT FINISH!!!#EURO2024 pic.twitter.com/itexYEMDYe
— Football Report (@FootballReprt) June 21, 2024
Nis pjesa e dytë
Photo: Associated Press
Ka nisur pjesa e dytë mes Holandës dhe Francës.
Pjesa e parë pavarësisht që nuk prodhoi gola, pati disa raste të mira shënimi.
Raste po, gola jo pas pjesës së parë
Photo: Associated Press
Holanda dhe Franca e kanë mbyllur pa gola pjesën e parë.
Të dyja ekipet patën raste të mira shënimi, por nuk arritën të konkretizonin.
45-minutëshi i parë u karakterizua me ritëm të lartë.
Superndeshje mes Holandës e Francës
Photo: Associated Press
Holanda e Franca po luajnë ndeshje shumë të mirë. Holanda rrezikoi që në minutën e parë, ndërsa më pas rast të mirë kishte edhe Franca.
Rezultati mbetet 0:0, kur janë zhvilluar 10 minutat e parë të ndeshjes në Leipzig.
Holanda rrezikon në minutën e parë
Photo: Associated Press
Holanda ka rrezikuar portën e Francës në minutën e parë të takimit.
Jeremie Frimpong depërtoi deri në zonë, por gjuajtjen e tij e ndali Mike Maignan.
Nis ndeshja
Photo: Associated Press
Ka nisur ndeshja mes Holandës dhe Francës, e vlefshme për Grupin D të “Euro 2024”.
Ndeshja po luhet në Leipzig. Të dyja ekipet kanë nga një fitore.
Mbappe megjithatë nuk starton te Franca
Photo: Associated Press
Kylian Mbappe nuk starton te Franca në ndeshjen ndaj Holandës që fillon në ora 21:00. Antoine Griezmann e Ousmane Dembele janë në sulm së bashku me Marcus Thuram.
Mbappe theu hundën në ndeshjen e kaluar, ndërsa pritet të aktivizohet si zëvendësues, nëse ka nevojë.
Memphis Depay udhëheq sulmin e Holandës.
