Trajneri spanjoll, Xabi Alonso, shpreson që ta mbyllë me fitore aventurën te Bayer Leverkuseni.
Leverkuseni të shtunën nga 15:30 do të luajë me Mainzin në udhëtim në kuadër të xhiros së 34-t të Bundesligës. Kjo xhiro është e fundit për këtë edicion në elitën e futbollit gjerman. Leverkuseni ka 68 pikë dhe renditet në pozitën e dytë. Mainzi ka 51 pikë dhe e zë vendin e gjashtë.
Për Alonson kjo do të jetë ndeshja e fundit në krye të skuadrës së Leverkusenit.
43-vjeçari ditë më parë e njoftoi largimin nga Leverkuseni në fund të edicionit. Ai së shpejti pritet të konfirmohet trajner i Real Madridit.
Alonso shkroi histori me Leverkusenin. Ish-mesfushori i Liverpoolit dhe Real Madridit e udhëhoqi Leverkusenin drejt titullit në Bundesligë pa asnjë humbje në edicionin e kaluar.
Me Leverkusenin, tekniku spanjoll e fitoi edhe Kupën e Gjermanisë.
Tashmë titullin e kampionit në Gjermani e ka siguruar Bayern Muncheni. Bayerni e mban pozitën e parë me 79 pikë.
Të gjitha ndeshjet e xhiros së fundit në Bundesligë zhvillohen të shtunën nga ora 15:30.
Bayerni do të luajë në udhëtim te Hoffenheimi. Hoffenheimi ka 32 pikë dhe e zë vendin e 15-të me 32 pikë. Po lufton për mbetje në ligë.
Ndërkohë Borussia Dortmundi e pret Holstein Kielin.
Dortmundi po lufton që ta sigurojë një pozitë që dërgon në Ligën e Kampionëve në edicionin e ardhshëm. Katër pozitat e para dërgojnë në “Champions”.
Dortmundi ka 54 pikë dhe renditet në pozitën e pestë. Kjo pozitë dërgon në Ligën e Evropës. Freiburgu e zë vendin e katërt me 55 pikë.
Freiburgu e pret Eintracht Frankfurtin.
Frankfurti është në pozitën e tretë me 57 pikë.
