Ballkani dhe Suhareka kanë shënuar fitoret e radhës në Superligë. Kampioni Ballkani mposhti Prishtinën 1:0, ndërsa Suhareka si mysafire Ferizajn me të njëjtin rezultat. Raportet e ndeshjeve dhe deklaratat pas tyre, mund t’i përcillni këtu
Cavalli thotë se gabimet u kushtuan
Trajneri i Prishtinës, Jean-Michel Cavalli, ka thënë se lojtarët e tij gabuan në momentin kur u pësua goli dhe kjo u ka kushtuar me disfatë nga Ballkani.
“Jam i dëshpëruar. Këtë ndeshje ndoshta nuk është dashur ta humbnim. Është e pamundur të humbet një ndeshje e tillë. Nuk po mund t’i kuptoj gabimet që i kemi bërë. Mbrojtja duhej të intervenonte në momentin e golit duke e larguar topin në këndore dhe gjithçka do të mbaronte. Edhe fusha nuk ishte në gjendje të mirë. Skuadra ime ka punuar shumë mirë në këtë javë, por nuk e pati të njëjtën paraqitje”, ka thënë Cavalli pas ndeshjes për “ArtMotion”.
Pollozhani: Këtë fitore do ta mbaj mend gjatë
Trajneri i ri i Ballkanit, Artim Pollozhani, ka thënë se fitoren ndaj Prishtinës do ta mbajë mend gjatë.
Ai ka shtuar se fitorja në derbi ishte shumë e merituar.
“Sigurisht që jam i lumtur. Merita është e futbollistëve. Këtë ndeshje do ta mbaj mend gjatë sepse ishte ndeshja e parë si trajner i parë dhe fituam ndaj Prishtinës, një skuadër e madhe. Ishte ndeshje e bukur, e luftuar. Ne dhamë më shumë, e kërkuam më shumë fitoren dhe sigurisht që e merituam”, ka thënë trajneri Pollozhani fillimisht pas ndeshjes për “ArtMotion”.
Pollozhani në postin e trajnerit erdhi pas largimit të trajnerit Ilir Daja. Pollozhani ishte asistent i Dajës për kohë të gjatë.
“Unë nuk e ndaj ekipin e parë dhe zëvendësuesit. Edhe zëvendësuesit janë shumë të rëndësishëm. Janë super lojtarë. E justifikuan veten të gjithë që u inkuadruan dhe mendoj që dolëm mirë”, vazhdoi tutje trajneri Pollozhani.
Ai theksoi më pas se Ballkani do të jetë i fokusuar ndeshje për ndeshje.
“Ku ka më mirë se të luash në derbi. Ne shkojmë ndeshje për ndeshje. Do të përqendrohemi te Drita. Drita e Llapi janë skuadra me cilësi. Ne do t’i marrim ndeshjet një nga një. Do të fokusohemi dhe kur përqendrohemi, jemi më efikas”, theksoi tekniku strugan.
Suhareka mposht Ferizajn
Skuadra e Suharekës e ka mposhtur Ferizajn si mysafir me rezultatin 1:0, në kuadër të xhiros së pestë të Superligës së Kosovës në futboll.
Golin e fitores për Suharekën e shënoi Liridon Fetahaj në minutën e 30-të.
Për Suharekën ishte fitorja e tretë në katër ndeshje të zhvilluara. Ka edhe një barazim.
Ndërsa për Ferizajn ishte disfata e tretë nga pesë ndeshje të zhvilluara. Ka edhe një fitore dhe një barazim.
Karrica vendos derbin Ballkani - Prishtina
Trajneri Artim Pollozhani e ka filluar me fitore aventurën te skuadra e Ballkanit. Ballkani të shtunën e ka mposhtur në shtëpi Prishtinën me rezultatin 1:0.
Golin e fitores e shënoi Bernard Karrica në minutën e 82-të.
Ndeshja u zhvillua në stadiumin e qytetit në Suharekë dhe i takoi javës së pestë të Superligës së Kosovës në futboll.
Ballkani dhe Suhareka kryesojnë me dhjetë pikë, por Ballkani ka një ndeshje më shumë të zhvilluar.
Prishtina është në pozitën e tretë me shtatë pikë.
Ballkani ndeshjen e ardhshme do ta ketë ndaj Dritës më 22 shtator. Prishtina takohet me Dukagjinin.