Një zjarr ka kapluar një lokal në magjistralen Kaçanik-Ferizaj gjatë pasdites të së dielës.
Zëdhënësi i Policisë për rajonin e Ferizajt, Kanun Veseli, ka deklaruar për KOHËN se një person nuk ka mbetur i lënduar nga kjo ngjarje.
Sipas tij, janë shkaktuar dëme materiale në vlerë rreth 20 mijë euro.
“Sipas të dhënave fillestare, dyshohet se zjarri ka filluar nga djegia e disa gomave të vendosura jashtë lokalit, e më pas zjarri është përhapur duke përfshirë një lokal të gomisterisë, një pjesë të një lokali tjetër (me dëme të vogla), si dhe një pjesë të një shtëpie përreth. Vlera e dëmit dyshohet të jetë rreth 20,000 euro”, ka thënë ai.
Veseli tutje ka thënë se është njoftuar edhe njësia e KEDS-it, për të ndërprerë furnizimin me energji elektrike, me qëllim të parandalimit të rrezikut të mëtejshëm.
Hetimet lidhur me rastin janë në proces.