(ArtNews) – Institucioni Smithsonian, një rrjet muzesh me qendër në Washington i cili është sulmuar në mënyrë të përsëritur nga administrata e presidentit Trump, pësoi edhe një goditje tjetër në fundjavë, pasi presioni i vazhdueshëm i qeverisë e detyroi të mbyllet për një kohë të pacaktuar.
Nuk është muzeu i parë në Washington që mbyllet për shkak të kësaj situate: Galeria Kombëtare e Artit është mbyllur që nga fundjava e kaluar. Por Smithsonian, i cili përfshin 21 institucione, si Muzeun Hirshhorn dhe Kopshtin e Skulpturave, Muzeun Amerikan të Artit dhe Galerinë Kombëtare të Portreteve, përfaqëson mbylljen më të madhe të këtij lloji deri më tani.
Më parë, Smithsonian, i cili merr pjesën më të madhe të financimit nga qeveria amerikane, kishte përdorur fondet e veta për të qëndruar i hapur. Fillimisht planifikohej të mbyllej më 6 tetor, por më pas vendosi të qëndronte i hapur deri më 11 tetor.
Gjatë mbylljes së fundit, që ndodhi midis fundit të vitit 2018 dhe fillimit të vitit 2019, punonjësit e Smithsonianit mbetën pa paga. Nuk ishte menjëherë e qartë se çfarë do të ndodhte këtë herë, megjithëse presidenti Trump kishte sugjeruar se punonjësit federalë që dërgohen në pushim të detyruar nuk do të merrnin automatikisht pagat e prapambetura. Të premten, Shtëpia e Bardhë njoftoi se kishte filluar një raund tjetër shkarkimesh gjatë mbylljes.
Mbyllja aktuale e qeverisë filloi më 1 tetor dhe tani është në javën e saj të dytë. Ajo buron nga mosmarrëveshjet mes demokratëve dhe republikanëve lidhur me politikat e kujdesit shëndetësor. Para se të ndodhte mbyllja, demokratët kërkuan të zhbënin shkurtimet në kujdesin shëndetësor të bëra nga republikanët, ndërsa republikanët kërkuan që demokratët të pranonin planin e tyre të financimit.
Ende mbetet e paqartë se si do të ndikohet programi i ardhshëm i Smithsonian. Më vonë këtë muaj, Muzeu Amerikan i Artit i Smithsonian planifikon të hapë një ekspozitë retrospektive të Grandma Moses. Ndërkohë, Galeria Kombëtare e Portreteve tashmë ka shtyrë një ekspozitë të lidhur me një konkurs portretesh që pritej të hapej më 18 tetor.
Smithsonian është gjendur në qendër të kritikave të administratës Trump disa herë këtë vit. Në mars, Trump lëshoi një urdhër ekzekutiv ku denonconte Smithsonian, duke pretenduar se institucioni ishte “nën ndikimin e një ideologjie përçarëse, të përqendruar në racë”. Që atëherë, ai publikoi një listë veprash arti që ekspozohen në muzetë e Smithsonianit dhe që ai dukej se i dënonte; disa prej tyre kishin lidhje me migrimin dhe identitetin gjinor.
Galeria Kombëtare e Portreteve është prekur veçanërisht nga kjo polemikë. Drejtoresha e saj, Kim Sajet, dha dorëheqjen pasi Trump pretendoi se e kishte shkarkuar. Në të njëjtin muze, artistja Amy Sherald anuloi një ekspozitë të planifikuar të turit të saj, duke pohuar se institucioni e kishte censuruar duke i kërkuar të hiqte një pikturë të një gruaje trans me ngjyrë që paraqitej si Statuja e Lirisë.
Në periudhën e rishikimit të ashpër të administratës së Donald Trump mbi muzetë Smithsonian, “The Guardian” kishte siguruar një dokument të përpiluar nga Shtëpia e Bardhë që përshkruan shembuj se si administrata beson se institucionet kulturore më të vizituara paraqesin në mënyrë tepër negative historinë e Shteteve të Bashkuara.
Dokumenti, i bazuar në komente të publikut të ndara me administratën, evidenton ekspozita problematike në shtatë muze të ndryshëm, përfshirë një ekspozitë mbi Benjamin Franklinin që i lidh arritjet e tij shkencore me pronësinë e tij mbi njerëz të skllavëruar dhe një film mbi vrasjen e George Floydit që, sipas dokumentit, e paraqet në mënyrë të shtrembëruar policinë.
“Presidenti Trump do të shqyrtojë të gjitha opsionet dhe rrugët për ta larguar ‘Woke’ nga Smithsonian dhe për t’i mbajtur ata përgjegjës”, tregoi një zyrtar i Shtëpisë së Bardhë.
“Derisa të marrim informacion nga Smithsonian në përgjigje të letrës sonë, nuk mund të verifikojmë numrin e artefakteve që janë hequr, pasi Smithsonian i ka hequr ato në mënyrë të pavarur”.
Trump shpalli nismën në “Truth” më herët këtë javë, duke shkruar: “Smithsonian është jashtë kontrollit, ku çdo diskutim është vetëm se sa i tmerrshëm është vendi ynë, sa e keqe ishte skllavëria dhe sa të pavlerë kanë qenë të shtypurit”.
Shtatë muzetë që deri më tani janë vënë në shënjestër për rishikim përfshijnë: Muzeun Kombëtar të Historisë Amerikane, Muzeun Kombëtar të ardhshëm për Amerikën Latine, Muzeun Kombëtar të Historisë Natyrës, Muzeun Kombëtar të Artit Afrikan, Galerinë Kombëtare të Portreteve, Muzeun Amerikan të Artit, Smithsonian dhe Muzeun Kombëtar të Artit Aziatik.
Administrata argumenton se ekspozitat në këto muze përqendrohen tepër tek shtypja dhe jo tek arritjet amerikane. Në Muzeun Kombëtar të Historisë Amerikane, dokumenti kritikoi ekspozitën “¡Presente!” mbi historinë e amerikanëve latinë për promovimin e një “agjendë antiamerikane”, duke analizuar efektet e kolonizimit dhe duke përshkruar SHBA-në si uzurpuese të territorit nga Meksika në vitin 1848.