-
Nga:
Marigona Brahimi
- 29 gusht 2025 19:45
- Shpërndaje në:
Kryeministri në detyrë, Albin Kurti, e quajti deformim dhe keqinterpretim artikullin në të cilin kryetari i Kuvendit, Dimal Basha, është bashkautor, e ku përmendet se UÇK-ja është financuar me para të drogës. Ai theksoi se problemet e Kosovës nuk burojnë nga ky artikull porse nga vendimet e Qeverive të kaluara, përfshirë atë për, siç tha, “Zajednicën” dhe për themelimin e Listës Serbe
Deformim dhe keqinterpretim e ka quajtur kryeministri në detyrë, Albin Kurti, artikullin në të cilin kryetari i Kuvendit, Dimal Basha, është bashkautor, e ku, mes tjerash, theksohet se Ushtria Çlirimtare e Kosovës është financuar me para të drogës.
Tek ka komentuar të premten rreth artikullit, Kurti ka theksuar se Basha nuk ka qenë autor i kapitullit që flet kundër UÇK-së.
Kurti ka shtuar se Basha me këtë artikull nuk i ka shkaktuar probleme Kosovës sa i shkaktojnë ende ato që ai i quajti vendime të qeverive të kaluara.
“Unë besoj që problemet që i kemi sot në Kosovë nuk i kemi nga një deformim e keqinterpretim i një artikulli me bashkautorësi, ku ky nuk është autor i atij kapitulli të para më shumë se një dekade. Problemet i kemi kur është nënshkruar ‘Zajednica’ në 2013-tën, problemet i kemi kur janë amnistuar kriminelët serbë në veri, po ashtu në 2013-tën, problemet i kemi kur është votuar Gjykata Speciale në 2015-tën, problemet i kemi kur është themeluar Lista Serbe në bashkëpunim me Beogradin në vitin 2013”, ka thënë Kurti.
Që nga zgjedhja për kryeparlamentar, Basha krahas për artikullin është përmendur edhe si shkak për dorëheqjen e ministrit në detyrë të Infrastrukturës, Liburn Aliu, me të cilin ai ka pasur përplasje në të shkuarën.
Për qëndrimet që Aliu i ka shprehur në letrën e dorëheqjes, Kurti të premten nuk pati koment.
“Ne duhet të vazhdojmë përpara, pa humbur kohë e kam emëruar në këtë detyrë zv.ministrin Durmishi. E falënderoj për kontributin”, ka deklaruar Kurti.
Dimal Basha është zgjedhur kryeparlamentar pas më shumë se katër muaj bllokadë në Kuvend.