A mund të shkaktojnë kancer zbutësit e rrobave dhe fletët për tharësen e rrobave?

Pretendimet në rrjetet sociale se zbutësit e rrobave dhe fletët për tharje shkaktojnë kancer nuk mbështeten nga prova të forta shkencore, ka shkruar The New York Post.

Ekspertët sqarojnë se këto produkte nuk përmbajnë substanca të njohura si kancerogjene. Megjithatë, disa përbërës, sidomos aromat artificiale, mund të çlirojnë në ajër komponime organike të paqëndrueshme (VOCs), të cilat në disa raste lidhen me rreziqe për shëndetin.

Studime të kryera në vitet 2011 dhe 2016 zbuluan se kur përdoren produkte lavanderie me aromë, nga tharëset mund të çlirohen substanca si benzeni dhe acetaldehidi, të cilat klasifikohen si potencialisht kancerogjene. Megjithatë, deri më sot nuk është vërtetuar se këto emetime shkaktojnë kancer te njerëzit.

Disa produkte mund të përmbajnë edhe kimikate të tjera që mund të ndikojnë në hormonet e organizmit dhe të lidhen me probleme riprodhuese ose zhvillimore. Shkencëtarët theksojnë se nevojiten më shumë kërkime për të kuptuar ndikimin e tyre afatgjatë.

Ndryshe nga detergjentët, zbutësit mbeten në rroba edhe pas larjes, duke rritur mundësinë e ekspozimit përmes frymëmarrjes dhe kontaktit me lëkurën.

“Nuk ka prova të forta që i lidhin drejtpërdrejt fletët për tharje dhe zbutësit e rrobave me kancerin, por një rrezik i vogël nuk mund të përjashtohet plotësisht”, thuhet në deklaratën e ekspertëve.

Edhe Lifestyle 12 o. më parë Dhjetë ushqime për duhanpirësit

Doktoresha Krushangi Patel ka theksuar se kimikatet e aromave nuk gjenden gjithmonë nëpër etiketa, prandaj duhet shmangur ekspozimi ndaj tyre.

“Meqenëse kimikatet që lidhen me aromat nuk janë gjithmonë të dukshme në etiketë, shumë ekspertë rekomandojnë të kufizohet ekspozimi i panevojshëm ndaj produkteve me aromë sa herë që është e mundur”, ka thënë ajo.