Live: Kampionati Evropian i xhudos

Distria për KOHËN: E lumtur që fitova të artën në Evropian

Xhudistja Distria Krasniqi është e lumtur që fitoi medalje të artë në Kampionatin Evropian. Të mërkurën në Podgoricë të Malit të Zi, Distria fitoi të artën evropiane në kategorinë deri 52 kilogramë. 

“Jam shumë e lumtur që fitova medaljen e artë, sidomos pas kësaj finaleje kaq të fortë sërish ndaj italianes Giuffrida, të cilën e kisha fituar edhe vitin e kaluar në finale të Evropianit, kështu që jam shumë e lumtur”, ka thënë Krasniqi për KOHËN të mërkurën. 

Krasniqi ka folur për rivalitetin ndaj italianes Odette Giuffrdia.

“Ky rivalitet ka qenë ndoshta më shumë se dhjetë vite. Edhe si juniorë kemi pasur luftëra. Disa i kam fituar, disa i kam humbur, pasi përballja me të gjithmonë është e vështirë, sepse duhet të jesh më shumë se 100 % e fokusuar. Është kampione botërore dhe fituese e shumë medaljeve tjera, dy medalje olimpike. Me xhudistë të nivelit të saj, nuk je asnjëherë e sigurt kur futesh në luftë. Fitorja nuk është e sigurt. Por jam e kënaqur që edhe kësaj radhe dola fituese”, është shprehur Krasniqi.

Për Distrinë është titulli i tretë i Evropës. Të parin e fitoi në vitin 2021 në Lisbonë e të dytin vitin e kaluar në Zagreb. Ka edhe dy medalje të argjendta e dy të bronzta evropiane. 

“Kjo medalje po më pëlqen më shumë. Është më e mirë se herët tjera”, ka theksuar Krasniqi. 
Distria ka edhe dy medalje olimpike. Në lojërat olimpike “Tokio 2020” fitoi të artën, kurse në “Parisi 2024” fitoi të argjendtën.

Kuka pas së artës në Evropian: Distria po ecën sigurt drejt medaljes së tretë olimpike

Trajneri i xhudos, Driton Kuka, ka thënë se xhudistja Distria Krasniqi ka dominuar përballë kundërshtareve të saj në Kampionatin Evropian në Podgoricë të Malit të Zi. Distria fitoi të artën në kategorinë deri 52 kilogramë. 

Kryemjeshtri Kuka ka theksuar se Distria po ecën sigurt drejt medaljes së tretë olimpike. 

“Thjesht, çdo Kampionat Evropian, Botëror apo Lojëra Olimpike, garat elitare gjithmonë janë sfida të çuditshme dhe të paparashikueshme. Është viti i 13-të që sporti i xhudos sjell medalje nga Evropianet për të rritur. Nuk e di sa medalje janë, ndoshta mbi 30 medalje. Është kënaqësi e veçantë, pasi nuk është vetëm medalje, por medalje e artë. Ishte absolut një dominim i Distrisë. Kjo u pa edhe në finale ndaj rivales së përjetshme, edhe Majlindës, edhe Distrisë. Dominoi në tërësi dhe mendoj se Distria është duke ecur me hapa të mëdhenj drejt medaljes së tretë olimpike. Ndoshta është herët të flasim, por qasja dhe përkushtimi i saj, puna që po e bën pavarësisht dy medaljeve olimpike që i ka e shumë medalje të tjera evropiane e botërore, po flasin vetë. Do Zoti që ajo ta ketë shëndetin e që të mos ketë lëndime dhe po besoj shumë që do të shkojë tutje deri te medalja e tretë olimpike. 

Krasniqi fitoi të artën në lojërat olimpike “Tokio 2020”, kurse të argjendtën në “Parisi 2024”.

Distria shkëlqen në Podgoricë, fiton titullin e tretë të Evropës

Distria Krasniqi ka arritur tjetër sukses madhor. Të mërkurën në Podgoricë të Malit të Zi, Distria u shpall kampione e Evropës në xhudo. Ajo fitoi medaljen e artë evropiane në kategorinë deri 52 kilogramë.

Për Distrinë është titulli i tretë i Evropës. Të parin e ka fituar në vitin 2021 në Lisbonë e të dytin vitin e kaluar në Zagreb. Ka edhe dy medalje të argjendta e dy të bronzta evropiane.

Në finale, Distria e mposhti italianen me përvojë, Odette Giuffrida. Ndaj saj fitoi pasi i realizoi dy “Yuko”. 

Falë Distrisë, Evropiani 2025 tashmë është i suksesshëm për Kosovën. Ajo ishte bartëse e parë e kategorisë dhe e hapi lehtësisht rrugën deri në finale. 

Fillimisht e mposhti serben Milica Nikoliq. Xhudistja serbe ishte thuajse e dorëzuar përballë Distrisë që nga fillimi. Vazhdimisht ka shmangur luftën dhe mori tri dënime. Kështu fitorja me Ippon i takoi xhudistes kosovare.

Në çerekfinale, Distria e kaloi holandezen Naomi Van Krevel. Ndaj saj realizoi menjëherë “Yuko” e pas 1:05 minuta edhe Ippon me hedhje mjeshtërore. 

Ariane Toro Soler nga Spanja ishte kundërshtare e 29-vjeçares në gjysmëfinale. Sërish Distria kishte kontrollin e plotë. Pas 1:21 minuta realizoi super-hedhje për tjetër fitore me Ippon.

Ashtu si pritej, përballë Distrisë në finale ishte kampionia në fuqi e botës, Giuffrida.

Distria e Odette Giuffrida janë përballur plot 12 herë deri më tani. Distria tani i ka tetë fitore, ndërsa Giuffrida katër. Distria ka fituar pesë përballjet e fundit me italianen e papërshtatshme. Vjet e mposhti në finale të Evropianit dhe në gjysmëfinale të Lojërave Olimpike. Në vitin 2023 e kishte mposhtur në gjysmëfinale të Kampionatit Evropian.

E arta evropiane është vetëm suksesi i radhës kulmor i Distria Krasniqit, që ndër të tjera ka edhe një medalje të artë e një të argjendtë olimpike.

Krasniqi përballë italianes Giuffrida në finalen e madhe të Evropianit

Ashtu si pritej, Distria Krasniqi do të përballet me italianen Odette Giuffrida në finalen e madhe të Kampionatit Evropian të xhudos.

Evropiani po mbahet në Podgoricë, ndërsa Krasniqi është kualifikuar në finale të kategorisë deri 52 kilogramë.

Distria është bartëse e parë dhe nuk ka pasur telashe për të siguruar luftën për të artën.

Ka shënuar tri fitore. Fillimisht e mposhti serben Milica Nikoliq. Më pas holandezen Naomi Van Krevel e në gjysmëfinale spanjollen Ariane Toro Soler.

Giuffrida është prej legjendave të kategorisë deri 52 kilogramë. Pak javë më parë ishte në një kamp në Pejë. Por nuk zhvilloi asnjë luftë më Distrinë. Këtë nuk e bën asnjëherë.

Distria e Giuffrida janë përballur plot 11 herë. Xhudistja kosovare ka shtatë fitore, ndërsa katër i ka fituar italiania. Distria në fakt kishte humbur tri luftërat e para me Giuffridan, që është kampione në fuqi e botës. Më pas e mposhti tri herë rresht, pësoi një humbje dhe sërish është në seri prej tri fitoreve.

Distria ndaj Giuffridas fitoi në finalen e Evropianit të kaluar e po ashtu në gjysmëfinale të Lojërave Olimpike në Paris.

E kishte mposhtur edhe në gjysmëfinale të Evropianit 2023.

Lufta pritet të jetë e fortë.

Fitore e Distrisë me super-hedhje

Distria Krasniqi ka kaluar në gjysmëfinale të Evropianit në Podgoricë.

Distria e mposhti bindshëm holandezen Naomi Van Krevel. Ndaj saj mori shpejt pikē e mē pas fitoi me Ippon të bukur.

Distria Krasniqi mposht serben Nikoliq, arrin në çerekfinale të Evropianit

Distria Krasniqi e ka mposhtur serben Milica Nikoliq në 1/8 e finales të Evropianit të xhudos që po mbahet në Podgoricë. 

Krasniqi dominoi përballjen e kategorisë deri 52 kilogramë, ndërsa Nikoliq në fund mori kartonin e kuq për shkak të një lëvizje të gabuar. Deri në momentin e asaj lëvizje Nikoliq kishte marrë dy kartonë të verdhë. 

Në çerekfinale do të përballet me holandezen Naomi van Krevel.

Në Evropian garoi edhe Laurine Gashi, e cila u eliminua në rrethin e parë. 

Laurine Gashi ndalet në luftën e parë

Laurine Gashi është ndalur në luftën e parë në Kampionatin Evropian të xhudos që po mbahet në Podgoricë. 

18-vjeçarja në 1/16 e finales u mposht nga portugezja Raquel Brito. 

Brito realizoi “ippon” në minutat shtesë. 

Gashi garoi në kategorinë deri 52 kilogramë.

Distria Krasniqi kundër serbes Nikoliq në 1/8 e finales

Distria Krasniqi do të përballet me xhudisten nga Serbia, Milica Nikoliq në 1/8 e finales të Kampionatit Evropian të xhudos që po mbahet në Podgoricë. 

Krasniqi ka kaluar pa luftë në 1/8 e finales. Ndërkohë Nikoliq mposhti xhudisten ruse Karina Efimova, që u paraqit me flamur të IJF-së, në 1/16 e finales. 

Nikoliq triumfoi në minutat shtesë.