Përleshjet kanë shpërthyer në protestat në Serbi midis kundërshtarëve dhe mbështetësve të qeverisë, duke shënuar një përshkallëzim të tensioneve pas më shumë se nëntë muajsh demonstratash të vazhdueshme kundër presidentit populist, Aleksandar Vuçiq.
Incidentet filluan të martën në mbrëmje në Vrbas, në veriperëndim të kryeqytetit Beograd, ku policia e trazirave ndau protestuesit nga kampet kundërshtare jashtë zyrave të Partisë Progresive Serbe në pushtet në qytet, raporton AP.
Videopamjet nga vendi i ngjarjes treguan mbështetës të qeverisë duke hedhur fishekzjarrë, gurë dhe shishe drejt protestuesve, të cilët hodhën objekte të ndryshme. Policia ka thënë se dhjetëra njerëz u lënduan, përfshirë 16 policë. Incidente të ngjashme u raportuan në protesta në pjesë të tjera të vendit.
Protestat e udhëhequra nga studentët në Serbi filluan për herë të parë në nëntor pasi shembja e strehës së një stacioni treni në qytetin verior të Novi Sadit la të vdekur 16 persona, duke shkaktuar akuza për korrupsion në projektet shtetërore të infrastrukturës.
Që atëherë protestat kanë tërhequr qindra mijëra njerëz, duke tronditur kontrollin e fortë të pushtetit të Vuçiqit në Serbi.
Mbështetësit e presidentit kanë filluar së fundmi të organizojnë kundër-demonstrata, duke nxitur frikën e dhunës.
Policia ka njoftuar se disa persona janë arrestuar pas përleshjeve në Vrbas.
Protestuesit kanë thënë se mbështetësit e qeverisë i sulmuan fillimisht në Vrbas dhe gjithashtu më në jug në Backa Palanka dhe më vonë në Novi Sad dhe qytetin jugor të Nishit.
VIDEO:
Žene i devojke šamarate, a kriminalce sa pirotehnikom čuvate. Ko ste vi? Imate li majku, sestru, ženu, ćerku? Imate li duše, dušmani? pic.twitter.com/k7pLQ3A8x5