George Clooney ka hedhur poshtë zërat se po e braktis Los Angelesin, ndonëse së fundmi ka shitur shtëpinë që e kishte që nga viti 1995 dhe tashmë po jeton plotësisht në Francë me bashkëshorten Amal dhe binjakët e tyre tetëvjeçarë. Aktori i njohur, që për dekada jetoi në Kaliforni pasi u shpërngul nga Kentaki për karrierë në Hollywood, thekson se LA mbetet ende pjesë e rëndësishme e jetës së tij.
Në një intervistë për Los Angeles Times, Clooney u pyet drejtpërdrejt nëse po e “braktisë” qytetin. Përgjigjja e tij ishte e prerë: “Jo!”. Ai sqaroi se, megjithëse ka marrë edhe pasaportë franceze, ka ruajtur një apartament të madh në Kaliforni dhe kthehet rregullisht atje.
Duke folur për shitjen e shtëpisë në Studio City, ai tha se pas 30 vjetësh kishte ardhur koha për ndryshim. Sipas tij, jeta në Francë ofron më shumë anonimitet, gjë që është e mirë për fëmijët, por Los Angelesi mbetet vendi ku ai gjeti suksesin dhe krijoi miqësitë më të rëndësishme. “LA-ja është ende pjesë e madhe e shtëpisë për mua. Është vendi ku kam pasur sukses dhe ku i njoh të gjitha rrugicat”, u shpreh ai.
Clooney foli me nostalgji edhe për vitet e kaluara në Studio City dhe Hollywood, duke përmendur energjinë e dikurshme të qytetit dhe skenën kulturore. Ai theksoi se, ndonëse zonat kanë ndryshuar me kalimin e kohës, ato ende ruajnë një frymë të veçantë që e ka bërë të ndihet si në shtëpi.
Aktori ka pranuar se ishte i shqetësuar për rritjen e fëmijëve në Los Angeles, për shkak të famës dhe paparacëve, dhe se jeta në fermën e tyre në Francë u ofron një fëmijëri më të qetë. Megjithatë, ai nënvizon se kjo nuk do të thotë shkëputje nga LA-ja, por një ekuilibër mes jetës familjare dhe qytetit që e bëri yll.