-
Përktheu:
Vita Abrashi-Kajtazi
- 10 shkurt 2026 22:30
- Shpërndaje në:
Aktorja e njohur Margot Robbie ka treguar se, shumë herët në karrierën e saj, një koleg i kishte dhuruar një libër që në thelb i sugjeronte të humbte peshë, një moment që ajo e përshkruan si fyes dhe të papërshtatshëm.
Ylli 35-vjeçar i filmit “Wuthering Heights” ka kujtuar këtë episod gjatë një interviste për Complex, ku po bisedonte me këngëtaren Charli XCX, ka raportuar FemaleFirst.
Ajo ka theksuar se aktori i kishte dhënë librin “Why French Women Don’t Get Fat”, një guidë jetese e botuar në vitin 2007 nga Mireille Guiliano.
Kur u pyet për dhuratën më të keqe që ka marrë ndonjëherë, Robbie tregoi për librin.
“Shumë, shumë herët në karrierën time, një aktor me të cilin punoja, një aktor burrë, më dhuroi një libër të quajtur ‘Why French Women Don’t Get Fat’, që në thelb ishte një libër që të thoshte të haje më pak”, ka thënë ajo.
Ajo nuk e përmendi emrin e aktorit, por konfirmoi se ngjarja kishte ndodhur shumë vite më parë.
“Nuk e kam idenë se ku mund të jetë ai tani. Kjo ka ndodhur shumë herët, në fillimet e mia. Ai në thelb më dha një libër për të më treguar se duhej të humbisja peshë. Mendova: ‘Uau’”, ka shtuar ajo.
Gjatë intervistës, Charli XCX reagoi me humor, duke u kthyer nga kamera dhe duke thënë: “Karriera jote mbaroi, zemër”.
Robbie u shfaq për herë të parë në ekran në vitin 2008, një vit pas publikimit të librit, me role në seriale australiane si “Neighbours”, “City Homicide” dhe “Vigilante”.
Ajo u bë e njohur ndërkombëtarisht me serialin “Pan Am” në vitin 2012 dhe me filmin “The Wolf of Wall Street” një vit më vonë.
Karriera e saj u forcua më tej me filma të suksesshëm si “Suicide Squad” i vitit 2016, “Once Upon a Time in Hollywood” në vitin 2019 dhe “Barbie” në vitin 2023.
Robbie dhe Charli XCX janë aktualisht të përfshira në adaptimin e ri të romanit “Wuthering Heights” nga Emerald Fennell.
Robbie luan rolin kryesor në film, ndërsa Charli ka realizuar muzikën origjinale për këtë adaptim të veprës së Emily Brontë.
“Më ka ndodhur njëherë të marr një kavanoz të vogël me hirin e nënës së një fansi. Ishte një kavanoz i vendosur në një varëse. Nuk e dija fare çfarë të bëja me të… Nuk e di as ku është tani”, ka thënë Charlie XCX duke kujtuar dhuratën e saj më të çuditshme që ka marrë.