55 vjet pasi Bianca Jagger habiti opinionin publik duke veshur një kostum të krijuar nga Yves Saint Laurent për t’u martuar me Mick Jagger, pamja e saj e dasmës është kthyer në një nga të preferuarat e një brezi të ri nusesh.
Të dielën, ylli i muzikës pop me origjinë shqiptare Dua Lipa u bë personazhi më i fundit i njohur që përqafoi këtë trend, kur u martua me aktorin Callum Turner gjatë një ceremonie intime në Londër, shkroi The Guardian.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoFotografitë e çiftit në shkallët e ndërtesës “Old Marylebone Town Hall” i tregonin ata duke buzëqeshur, me Turner të veshur me një kostum ngjyrë blu të errët, ndërsa Lipa me një kostum ngjyrë fildishi, i frymëzuar drejtpërdrejt nga stili i Bianca Jagger, i kompletuar me një kapelë me strehë të gjerë.
Ndërsa kostumi i Bianca Jagger konsiderohej i pazakontë në vitin 1971, vitet e fundit ai ka fituar një aktualitet të ri. Amal Clooney e riktheu këtë stil kur u martua me George Clooneyn në Venecia në vitin 2014, duke veshur një kombinim të bardhë nga Stella McCartney dhe një kapelë të butë me strehë të gjerë. Modelja Emily Ratajkowski iu referua të njëjtit stil kur veshi një kostum ngjyrë mustardë nga Zara dhe një kapelë kafe me vellon për martesën e saj me Sebastian Bear-McClard në vitin 2018.
Në Met Gala 2025, stilisti i aktores Zendaya deklaroi se veshja e dasmës së Bianca Jagger ishte frymëzimi kryesor për paraqitjen e saj, ndërsa edhe Kerry Washington dhe Anna Sawai dukeshin të ndikuara nga i njëjti stil.
Rosie Boydell-Wiles, stiliste dhe eksperte e modës së nuseve, thotë se një pjesë e tërheqjes së këtij stili lidhet me qëndrimin jokonformist që mishëronte Bianca Jagger.
“Pamjet më të mira të nusërisë në histori janë ato ku duket qartë se nusja ka menduar me kujdes se kush është, çfarë i shkon dhe si dëshiron të shprehë personalitetin e saj përmes veshjes, pavarësisht nga trendet e momentit,”, thotë ajo.
Gjatë viteve ’70, fustanet e gjata me dantella dhe mëngë të gjera ishin një trend i zakonshëm. Xhaketa “Le Smoking” e Bianca Jaggerit, të cilën ajo e veshi pa asgjë përfundi, e kombinuar me një fund të prerë në mënyrë diagonale për të fshehur shtatzëninë e saj dhe me një kapelë gjigante dielli, konsiderohej mishërimi i rebelimit rock’n’roll.
Në atë kohë, zgjedhja e një kostumi fundi në vend të një fustani ishte tronditëse në vetvete. Një kostum fundi me një dekolte shumë të hapur? Kjo konsiderohej skandaloze. Saint Laurent e kishte prezantuar xhaketën vetëm pesë vjet më parë dhe fillimisht ajo ishte refuzuar nga klientet, të cilat e konsideronin tepër provokuese.
Homazhi i Dua Lipës ndaj Bianca Jaggerit u krijua nga Daniel Roseberry për shtëpinë e modës Schiaparelli. Xhaketa përmbante kopsat karakteristike surrealiste të markës. Kapela, e krijuar nga kapelabërësi britanik Stephen Jones, kishte një pjesë të poshtme të artë, një teknikë që, sipas raportimeve, përdoret për t’i dhënë fytyrës së përdorueses një shkëlqim më të ngrohtë.
Në një krahasim mes dy pamjeve, dallimi më i madh ishte zgjedhja e aksesorëve nga Dua Lipa. Këngëtarja britanike 30-vjeçare e kompletoi paraqitjen me një palë doreza të bardha dhe një varëse luksoze Bulgari Serpenti me vlerë gjashtëshifrore, të cilën e kishte veshur më parë në Brit Awards.
Ceremonia intime e Dua Lipës u zhvillua përpara një feste treditore, për të cilën qarkullojnë zëra se do të mbahet në Palermo, në Sicili.
Në skenë, Dua Lipa zakonisht vesh mini-fustane me shkëlqim dhe kostume skenike të ngushta.
Dhe ndërsa fansat presin të shohin nëse veshjet e tilla do të vazhdojnë edhe në festimet në Itali, pamja e saj e frymëzuar nga Bianca Jagger tashmë i ka siguruar Dua Lipës një vend në historinë e modës së nusërisë.