Klubi serb i hendbollit Vojvodina ka shkëputur kontratën me portierin kroat Filip Iviq, dy javë pasi e firmosi atë.
Iviq është fotografuar në koncertin e Marko Perkoviq – Thompson, të mbajtur të shtunën në Zagreb. Koncerti i këngëtarit kroat mblodhi 500 mijë njerëz. Iviq e publikoi fotografinë, ndërsa e fshiu ndërkohë. Por klubi nga Novi Sadi ka vendosur të hënën t’a shkëpusë kontratën.
Klubi serb ka shkruar që është e papranueshme që një lojtar i tij të jetë në koncertin e Thompsonit.
Marko Perkoviq është këngëtar shumë i popullarizuar në Kroaci, por edhe kundërthënës. Thompson i mbeti nofka në fillimin e luftës së Kroacisë për çlirim, në bazë të armës të cilën e mbante.
Përmbajtja e këngëve të tij, shumë prej tyre me nota nacionaliste dhe hite të mëdha në Kroaci, kundërshtohen fuqishëm në Serbi, por edhe nga një pjesë e opinionit në Kroaci.
“U tronditëm kur morëm lajmin që portieri Filip Iviq mori pjesë në takimin e ustashëve të Marko Perkoviq Thomspon. Ai nuk ishte kurrfarë grumbullimi muzikor, por një festë e ustashëve ku lavdërohen hapur ide dhe simbole që janë sinonim i krimeve për popullin serb”, ka shkruar Vojvodina.
