Samadrexha kthen titullin pas 19 vjetësh

Hendbollistet e skuadrës së Samadrexhës e kanë kthyer titullin në Vushtrri pas plot 19 vjetësh. 
Samadrexha, me rikthim të jashtëzakonshëm në finalen e plejofit, fitoi të enjten mbrëma 25:23 në palestrën “Afrim Bunjaku” në Samadrexhë, ndaj Shqiponjës së Gjakovës. Pati shumë shikues të pranishëm.  

Shqiponja i fitoi dy ndeshjet e para dhe krijoi epërsi 2:0 në serinë finale, por Samadrexha u kthye me tri fitore tjera për ta fituar titullin që i mungonte për afro dy dekada. Samadrexha është edhe fituese e Kupës së Kosovës për herë të parë në histori. Në finale të Kupës, Samadrexha e mposhti Istogun.  

Numri i shikuesve në palestër ishte i madh, por ndeshja u ndërpre disa herë. 

Ballafaqimi nisi në orën 20:00, ndërsa përfundoi afër orës 23:00. 

Në fillim të ndeshjes u hodhën mjete tymosëse në palestër. Ndeshja nuk nisi deri në largim të tërësishëm të tymit në palestër. Më vonë pati edhe telashe me semafor. Dhe kjo bëri që ndeshja e pestë finale e plejofit të zgjaste afro tri orë. Pjesa e parë u mbyll me rezultatin 12:8 në të mirë të skuadrës vendëse.  

Për Samadrexhën ishte titulli i parë që prej edicionit 2006/07. Në atë kohë, kjo skuadër njihej me emrin Vicianet. Vicianet e kishin fituar titullin edhe në edicionin 2005/06. Samadrexha ishte kampione vjeshtore në edicionin 1997/98, në kampionatin që u ndërpre për shkak të luftës. 

Tituj, Samadrexha kishte fituar edhe në edicionet 1989/90 dhe 1987/88. 

Shqiponja ishte në prag të titullit të dytë në histori të klubit. Por mbeti vetëm me titullin e fituar në edicionin 2017/18. 

Më e dalluara në fitoren e së enjtes ishte Jennifer Toledo Abreu me shtatë gola. Nga pesë gola i kishin Tina Hetemi dhe Olivera De Paula. Te Shqiponja u dallua Alma Nivokazi me shtatë gola. Helen Da Silva Souza i kishte pesë, aq sa kishte edhe Nathal Silva Fontana.