Dita e 21-të e fushatës

Kurti e Peci në Zveçan premtojnë investime në arsim, shëndetësi dhe infrastrukturë

Tridhjetë minuta më herët se sa u pati paraparë me agjendë, simpatizantë të Lëvizjes Vetëvendosje (LVV) janë bërë gati të premten për tubimin elektoral i cili është organizuar në fshatin Boletin të komunës veriore të Zveçanit.

Ata kanë bërë vend në njërën prej klasave të shkollës “Isa Boletini” ndërsa kandidati për kryetar të Komunës, Fetah Peci, e ka pritur jashtë objektit kryetarin e partisë, Albin Kurti.

Bashkë me të, në pritje të Kurtit ka dalë edhe kandidati për kryetar të komunës fqinje, asaj të Mitrovicës së Jugut, Faton Peci.

Kandidati i cili synon që ta fitojë garën në Zveçan ka lënë anash modestinë dhe ka thënë që është orator.

“Besomni kah oratoria nuk jam shumë i dobët po më duket, por po ndihem shumë i emocionuar pranë disa luajve këtu”, është shprehur kandidati i LVV-së për Zveçanin.

Peci ka përmendur disa nga problemet që i ka komuna si dhe disa prej investimeve të cilat synon që t’i realizojë po qe se vihet në krye të saj, pas zgjedhjeve lokale të 12 tetorit.

“Sa i përket aspektit të bujqësisë, tek ne toka nuk është pjellore, e din edhe ministri, por do të mundnim me rendimente të pemëtarisë, vreshtarisë ndoshta edhe shpeztarisë t’i kultivojmë në këto fshatra”, ka theksuar ai.

Para të pranishmëve në tubimin elektoral në Zveçan, Peci ka prezantuar kandidatët për asamble komunale, e të cilët, me përjashtim vetëm të njërit, të gjithë të tjerët e mbajnë mbiemrin Peci.

“Po na kritikojnë por nuk kemi çfarë të bëjmë që jemi kallabllëk ne Pecët. Po na thonë keni lulëzuar prej që erdh Albini”, është shprehur kandidati i LVV-së për kryetar komune në Zveçan.

Më konkret në premtimet për banorët e Zveçanit ka qenë të premten Kurti.

“Ne do të sigurojmë që në Zveçan të ketë shkolla më të mira, investime në infrastrukturë, mbështetje për bujqësi, kujdes shëndetësor dhe mundësi për krejt. Këtu nuk do të ketë kurrë me qytetarë të dorës së dytë”, është zotuar kryetari i Vetëvendosjes. Ai pati zotim për Zveçanin edhe në qeverisjen e tij qendrore të radhës.

“E di që për juve nuk ka qenë dhe ende nuk është lehtë, shpesh jeni përballë me pengesa e rreziqe jo vetëm me diskriminim por edhe me përjashtim nga shërbimet publike e investimet që u takojnë. Por dua t’ju them qartë që Qeveria e Kosovës është me ju dhe do të jetë përherë me juve”, ka thënë Kurti.

E, krahas votës për kandidatin e Zveçanit, Kurti e ka kërkuar mbështetjen më 12 tetor edhe për atë të Mitrovicës së Jugut.

“E di që ka shumë njerëz nga Zveçani, qytetarë te Zveçanit që nuk janë banorë në Zveçan mund të ketë që janë banorë e votues në jug të Mitrovicës dhe u thoni gjithë atyre që jo më pak e rëndësishme se për ta votuar Fetah Pecin është për ta votuar në jug të Mitrovicës Faton Pecin”, është shprehur ai.

E në fjalën e tij, kandidati për kryetar komune në Mitrovicë të Jugut e ka bërë një premtim edhe për Zveçanin.

“Nevojën që ju keni për transport publik, unë edhe pse jam kandidat në një komune tjetër në Mitrovicën e Jugut, në kuadër të programit tim një ra prej pikave që adreson kete ceshtje ëahtë ndërmarrja publike urbane dhe ndërurbane”, është shprehu Faton Peci.

Pos premtimit, nga Boletini ai e ka dhënë edhe një lëvdatë për Albin Kurtin.

“Atë që Isa Boletini më 1903 e nisi, suksesshëm Albin Kurti si kryeministër e bitisi”, ka thënë ai.

Nëntë ditë para zgjedhjeve të tetorit, kandidatët e LVV-së kanë zhvilluar fushatë edhe në komunat e tjera.

Në Prishtinë, Hajrulla Çeku ka premtuar mbështetje për prodhuesit vendorë, teksa është zotuar të ndërtojë edhe një park industrial në Bërnicë.

“Park Industrial në Bërnicë për të hapur mundësi të reja të prodhimit; Bashkëpunim strategjik me shkolla profesionale të lidhura drejtpërdrejt me tregun e punës; Mbështetje për bizneset e vogla dhe startupet; Skema bashkëfinancimi për eksport dhe panaire; Ekonomi metropolitane me planifikim të zhvillimit ekonomik në nivel të rajonit të Prishtinës”, ka thënë Çeku.

Në Ferizaj, Enver Haliti ka bërë zotim për infrastrukturë dhe kushte më të mira për personat me aftësi të kufizuara.

Aliu premton stadium e palestër të re në Ferizaj

Ndërtim të stadiumit të ri, të palestrës së re sportive, krijim të ligave shkollore dhe premtime të tjera ka bërë kryetari i komunës së Ferizajt, Agim Aliu, i cili e synon mandatin e ri si kandidat i Partisë Demokratike (PDK).

Gjatë prezantimit të planit të tij në sektorin e kulturës, rinisë dhe sportit, ai ka premtuar investime në Parkun Memorial të Ushtrisë Çlirimtare (UÇK) në fshatin Jezerc.

“Afër 20 milionë euro për Stadiumin e Ri të Qytetit ‘Ismet Shabani’, në bashkëpunim me Ministrinë e Kulturës, Rinisë dhe Sportit arenë moderne për futbollin e Ferizajt. Do të ndërtojmë palestrën e re moderne dhe me parking nëntokësor, e konceptuar si një arenë për sport elitar, aktivitete rinore, koncerte dhe ngjarje komunitare. Do të rinovojmë palestrën e sporteve ‘Bill Clinton’, ndriçim i ri, ngrohje e ventilim, instalime elektrike, zhveshtore moderne dhe ulëse të reja”, është zotuar Aliu.

Në Prishtinë, kandidati i PDK-së për kryetar komune, Uran Ismaili, ka kritikuar pushtetin aktual. Ai ka thënë se problemet që i ka identifikuar gjatë fushatës së vitit 2021 vetëm sa janë përkeqësuar brenda katër vjetësh.

“Janë bërë problemet më të mëdha, njerëzit janë më të zhgënjyer, më të dëshpëruar. Vota e tyre nuk po u kthen asgjë. Po votojnë, asgjë s’po marrin, po votojnë - kurrfarë investimi, po votojnë – kurrfarë përfitimi”, ka theksuar Ismaili.

Ai të premten ka bërë premtime në sektorin e komunikacionit.

“Në takim me përfaqësues të shoqatës së taksistëve të Prishtinës u zotova për rregullimin e vend parkingjeve për taksi në qytet, ndalimin e taksive ilegale dhe nga qytetet e tjera, dhe zhbllokimin e trafikut brenda 18 muajsh me 60 semaforë shtesë, dhe qendër moderne për menaxhimin e trafikut”, ka shkruar Ismaili në Facebook.

Kandidati për kryetar të Fushë Kosovës, Rrahim Ternava, i ka vazhduar premtimet për bujqësinë.

“Subvencionime për qumësht për 10 cent për litër, grante prej 10 mijë eurosh për investime bujqësore në të gjitha sektorët, mbështetje për ndërtimin dhe zhvillimin e serave mbi 10 ari, krijimi i pesë pikave përpunuese për produktet bujqësore, ndërtimin e një zinxhiri të qëndrueshëm kultivim-përpunim-treg”, ka deklaruar Tërnava.

E kryetari i Prizrenit, Shaqir Totaj, që e synon edhe një mandat, ka njoftuar për ndarjen e pajisjeve bujqësore për 62 fermerë.

“Drejtoria e Bujqësisë, Pylltarisë dhe Zhvillimit Rural vazhdon mbështetjen për fermerët në kuadër të projektit ‘Furnizimi me mekanizëm bujqësor – me bashkëfinancim’. Sot, u zhvillua e faza e dytë e ndarjes së mjeteve bujqësore për 62 fermerë përfitues, nga gjithsej 333 që përfitojnë nga ky projekt, derisa në fazën e parë janë shpërndarë 155 mjete bujqësore. Fermerët përfituan motokultivatorë, pjatore me disqe, trina, mbjellëse misri dhe gruri, pllugje dhe atomizerë”, ka njoftuar Totaj.

Tetë premtime për bujq, blegtorë e bletarë pati edhe kryetari i Vushtrrisë, Ferit Idrizi, që e synon edhe një mandat.

“Nga 0.5 cent në 0.8 cent për litër qumështi; Nga 5 euro në 8 euro për koshere të bletëve; Nga 5 euro në 8 euro për kokë dele dhe dhi; 50% vazhdon sistemi i ujitjes së tokave bujqësore; Subvencionimi i bimëve aromatike; Subvencionimi i plehrave; Subvencionimi i serave 0.5 dhe 1 ari; Makineri bujqësore”, ka thënë ai.

E në Lipjan, kryetari i PDK-së, Memli Krasniqi, ka thënë se kapërcimi nga një qytet mes Prishtinës dhe Ferizajt drejt një qendre të rëndësishme urbane do të ndodhë vetëm me udhëheqjen e PDK-së dhe me kandidatin e saj për kryetar, Shukri Buja.

“Unë besoj fuqishëm se koha është që Lipjani ta krijoi e konsolidoi identitetin e vet urban, si një qendër e rëndësishme që i kontribuon të gjitha qendrave, e të mos jetë një stacion në mes të Prishtinës e Ferizajt, por që të jetë qytet i rëndësishëm për krejt Kosovën”, është shprehur Krasniqi.

Gjatë së premtes, aktivitetin elektoral e kanë zhvilluar edhe kandidatë të tjerë të PDK-së. Kryetari i Hanit të Elezit, Mehmet Ballazhi, që e pretendon dhe një mandat në këtë post, gjatë një tubimi elektoral ka theksuar se PDK-ja është subjekti i vetëm me qasje progresive për të ardhmen e komunës.

Selmanaj premton rivitalizimin e Lumbardhit në Prizren, e Rama park botanik në Prishtinë

Kandidatë të Lidhjes Demokratike (LDK) për kryetarë komunash kanë prezantuar pjesë të programit edhe në ditën e 21-të të fushatës.

Në Prizren, Driton Selmanaj ka prezantuar projektin për rivitalizimin e lumit Lumbardh, i cili përfshin ndërtimin e sistemit të kanalizimit dhe shtratin me kaskada. Ky projekt, ai ka thënë se do ta kapë vlerën e mbi 12 milionë eurove.

“Çka nënkupton projekti i rivitalizimit? Që nga fshati Gornjasellë, atje lart, deri të fabrika për trajtimin e ujërave të zeza në Vlashnje, të ndërtohet sistemi i vendosjes së gypave të kanalizimit në thellësi në shtratit Lumbardh. Nga ana tjetër, në kuadër të revitalizimit, ne kemi parapa që: në gjatësi prej 4 kilometrave që nga hyrja e Prizrenit nga rruga e Recanit te poshtë, deri të dalja e Prizrenit në drejtim të Vlashnjës, të bëhet sistemi i kaskadave. Ta ndërtojmë shtratin e lumit në sistem të kaskadave”, ka thënë Selmanaj.

Në Prishtinë, kryetari Përparim Rama, i cili e synon mandatin e dytë, ka premtuar transformimin e “Fushës së Pajtimit” në park botanik, me funksion edukativ e edhe rol në menaxhimin e reshjeve.

Një mandat tjetër në Istog e synon edhe Ilir Ferati, i cili ka thënë se po investohet në shëndetësi me qëllim që profesionistët shëndetësorë të mos largohen jashtë vendit.

“Që këta mjekë mos t’i lëmë me na ikë jashtë e infermierët mos t’i lëmë me na ikë jashtë, ne e kemi rritur numrin e njerëzve që i kemi punësuar për me i dhënë shërbim qytetarëve tanë. Kemi në kontratë me Kosova MED-in që i ka trajtuar plus 64 vende të reja të punës, pa e përjashtuar as pjesën e çerdheve, ku kemi ofruar duke gjetur hapësira në ligj”, ka deklaruar Ferati.

Ruzhdi Shehu ka premtuar ndërtimin e sheshit “Edmon Hoxha”, nëse merr edhe një mandat tjetër qeverisës në Junik. Ai ka theksuar se ky projekt me vlerë rreth 5 milion euro, do ta shndërrojë qendrën e qytetit në një hapësirë moderne.

“Projekti i cili do të mbetet identitet i Junikut për shumë dekada: Ndërtimi i sheshit ‘Edmond Hoxha” në qendër të Junikut me vlerë rreth 5 milion euro. Ky investim do ta transferojmë qendrën e qytetit në një hapësirë moderne, multifunksionale dhe atraktive, e cila do të bëhet zemra e aktiviteteve shoqërore, kulturore dhe ekonomike të Junikut. Sheshi i ri do të ofrojë një ambient të hapur për organizimin e ngjarjeve, festivaleve dhe aktiviteteve për qytetarët”, ka thënë Shehu.

Premtime ka bërë edhe Imri Ahmeti, i cili më 12 tetor e pretendon edhe mandatin e radhës si kryetar i Lipjanit. Ai i ka promovuar projektet e realizuara dhe është zotuar për ndërtimin e një parkingu nëntokësor pranë tregut aktual të gjelbër, si dhe ndërtimin e një çerdheje dhe një shkolle të re në lagjen e Akllapit.

“Është punuar në të gjitha fshatrat e komunës tonë dhe në qytetin tonë, në ndërtimin e rrugëve, të rrugicave, në ndriçim publik, në rrjetet e kanalizimeve dhe ujësjellësve. Natyrisht që investimet e mëdha kanë për të ndodhur përsëri në Lipjan. Kemi edhe pak punë për të bërë, nuk kanë kosto të madhe dhe ne besojmë që Lipjanit, qytetit tonë, i duhet edhe një parking nëntokësor tek tregu aktual i gjelbër. Vazhdojmë për të ndërtuar një çerdhe dhe një shkollë në lagjen e Akllapit”, ka thënë Ahmeti.

Në Gjilan, kandidati Arbër Ismajli ka vizituar disa lagje teksa ka theksuar se në mesin e qytetarëve ka zhgënjim me pushtetin aktual shkaku i mungesës së investimeve.

“Bashkë me njerëzit e këtyre lagjeve folëm hapur për problemet që i preokupojnë çdo ditë - mungesën e investimeve, rrugët e lëna pas dore, mungesën e kujdesit komunal dhe zhgënjimin e thellë nga pushteti aktual që vetëm ka premtuar e asgjë nuk ka sjellë. Qytetarët na dhanë një mesazh të qartë që ‘Mjaft është mjaft, Gjilani meriton shumë më shumë’. Është koha për llogaridhënie, për përgjegjësi dhe për projektin e Gjilanit të ri që u shërben vetëm qytetarëve të vet”, ka thënë Ismajli.

E më Suharekë, kandidati për kryetar komune, Fatmir Ademaj, ka premtuar subvencion prej 5 centësh për çdo litër qumësht të dorëzuar nga fermerët.

Haradinaj: E kam ndërruar adresën e votimit, për ta përkrahur Ramosajn në Deçan

Intensitetin më të lartë të fushatës elektorale, Aleanca për Ardhmërinë e Kosovës (AAK) e ka vazhduar të premten në Dukagjin.

Kandidati Ali Berisha, i cili synon të rikthehet si kryetar i Pejës, ka thënë se në këtë komunë projektet kanë ngecur prej më shumë se një dekade. Ai ka kritikuar pushtetin aktual në nivel lokal dhe ka thënë se Peja ka mbetur prapa në zhvillim krahasuar me komunat e tjera.

“O gjynah çka o ka ndodhë në qytetin tonë. Një projekt i nisur para 14 vjetësh ende s’është kryer. Qytetet tjera brenda dy vjetësh e rregullojnë shtratin e lumit me kapacitetet e veta. Çfarë kapaciteti ka Peja që nuk është në gjendje me përfundu një punë të tillë? Shihni edhe ndërtesat e reja në korzo, çfarë standardi është ky? Kësaj qeverisjeje i ka ardh fundi. Më 12 tetor, ndryshimi në Pejë do të ndodhë”, ka theksuar Berisha.

Fushatë për Berishën ka bërë edhe kryetari i AAK-së, Ramush Haradinaj. Ai ka thënë se Berisha në kohë të zorshme, ka shpëtuar edhe jetë si mjek.

“Unë nuk e them pahiri. E di që në kohë të zorshme Ali Berisha ka shpëtu jetë dhe na ka dhënë guxim. Në procese politike ka qenë afër nesh, kurrë s’ka kërku pozita. Por një herë kur ia keni dhënë besimin në Pejë, ai atë besim e ka kthyer me punë. Edhe atëherë nuk kanë qenë shumë të bindur njerëzit që po fiton, por fitoi – dhe shumë punë u bënë”, ka theksuar Haradinaj.

Në Prishtinë, kandidati i AAK-së për kryetar, Bekë Berisha, e ka përqendruar fushatën parazgjedhore në fushën e sigurisë së fëmijëve, të cilën e ka kualifikuar si prioritet.

“Zgjidhje reale, të mundshme dhe të menjëhershme për problemet që na shqetësojnë çdo ditë, veçanërisht për sigurinë e fëmijëve, e cila mbetet një nga prioritetet kryesore të tij”, është thënë në faqen në Facebook të Berishës.

E, në Deçan, kryetari aktual dhe kandidati për edhe një mandat të ri, Bashkim Ramosaj, gjatë një takimi me gratë u është përgjigjur kritikave që “po tentojnë ta paraqesin një imazh të rremë për këtë komunë”.

“Që mos me e paraqit Deçanin si një vend fanatik, ku gratë nuk guxojnë të dalin, është rrenë. Kjo përpjekje për ta shfaqur si vend të vrazhdë e të egër është po ashtu rrenë. Ky është vendi me virtytet më të mëdha në krejt Kosovën, me njerëz bujarë e solidarë që kanë sakrifikuar për vendin”, ka thënë Ramosaj.

Në përkrahje të Ramosajt ka dalë edhe Haradinaj, i cili ka thënë se sivjet është regjistruar për të votuar në Deçan.

Në Viti, kandidati për kryetar komune, Labinot Bislimi, fushatën e përqendroi kundër rivalit të tij nga Lëvizja Vetëvendosje (LVV), Arsim Ademi, për të cilit ka thënë se ka dorëzuar padi në gjykatë pas publikimit të një sondazhi. Këtë sondazh, ai e ka kualifikuar si përpjekje për manipulim me opinionin publik dhe për cenim të procesin demokratik.

E kryetari i komunës së Rahovecit, Smajl Latifi, që e synon edhe një mandat, është zotuar për investime në sektorin e bujqësisë dhe blegtorisë.

“Premtova mbështetje të plotë dhe bashkëpunim për zhvillimin e aktiviteteve blegtorale e bujqësore. Komuna e Rahovecit do të vazhdojë të jetë pranë bujkut, punëtorit dhe qytetarit”, ka theksuar Latifi, pas takimit me blegtorë të kësaj komune.

Në një takim me qytetarë dhe me mbështetës të mbajtur të premten, kandidati i AAK-së për kryetar të komunës së Istogut, Ukë Blakaj, ka kërkuar mobilizim të tyre për ndryshim. Ai u ka bërë thirrje qytetarëve që ta shohin ditën e zgjedhjeve lokale të 12 tetorit si fillimin e një rruge të re për komunën.

E, në kuadër të fushatës të së premtes, kandidatja për kryetare komune në Fushë Kosovë, Vildane Latifi, ka pasur takime me pronarë të bizneseve të vogla. Përfaqësuesve të këtyre bizneseve ajo u ka premtuar mbështetje për zgjerimin dhe zhvillimin e veprimtarive.

Ismaili zotohet për rregullim të vendparkingjeve për taksitë e ndalim të taksive ilegale

Kandidati i Partisë Demokratike të Kosovës (PDK) për kryetar të Prishtinës Uran Ismaili, është zotuar se do të bëjë rregullimin e vendparkingjeve për taksitë dhe ndalimin e taksive ilegale. 

Ai këto premtime i ka dhënë në një takim që e ka zhvilluar me përfaqësues të shoqatës së taksistëve të Prishtinës. 

“Në takim me përfaqësues të shoqatës së taksistëve të Prishtinës u zotova për rregullimin e vendparkingjeve për taksi në qytet, ndalimin e taksive ilegale dhe nga qytetet e tjera, dhe zhbllokimin e trafikut brenda 18 muajsh, me 60 semafora shtesë, dhe qendër moderne për menaxhimin e trafikut”, ka shkruar Ismaili në Facebook.

Abdixhiku: Mercenarët e kanë vënë LDK-në dhe kandidatët e saj në tabelë qitjeje

Kryetari i Lidhjes Demokratike të Kosovës, Lumir Abdixhiku, ka thënë se LDK-ja dhe kandidatët e saj për kryetar të komunave janë shndërruar në tabelë qitjeje në fushatën zgjedhore. 

“12 tetori do të vijë si përgjigjja më e fortë dhe më e qartë për të gjithë ata mercenarë që kanë vënë LDK-në dhe kandidatët tanë në tabelë qitjeje në këtë fushatë. Le të shajnë. Le të ofendojnë. Kaq dinë, kaq bëjnë. Nuk kemi kohë për ta”, ka shkruar Abdixhiku në Facebook.

“Moçalin e madh të pështymave të mbrëmjes, LDK, sikurse dhe populli i Kosovës, ka vendosur ta injorojë. Kemi zgjedhur një rrugë tjetër: të ecim me qytetarë, me njerëzit e ndershëm e të punës dhe përpjekjes; dhe me ta bashkë, të bëjmë fitoren e vjeshtës si nisje të shpresës”, ka shtuar tutje ai.

Çeku viziton lagjen “Medrese”: Dëshmi për domosdoshmërinë e ndryshimit

Kandidati i Lëvizjes Vetëvendosje për kryetar të Prishtinës Hajrulla Çeku ka thënë zhvilluar një vizitë në lagjen “Medrese”. 

Ai ka thënë se ajo është një tjetër dëshmi për domosdoshmërinë e ndryshimit. 

“Në lagjen Medrese, në takime me qytetarë dhe biznese, pamë nga afër sfidat e tyre: mungesën e ndriçimit, kanalizimit, këndeve të lojërave, si dhe vështirësitë e prodhuesve e zejtarëve pa mbështetje”, ka shkruar Çeku. 

Ai ka thënë se platforma e tyre parasheh një Prishtinë të barabartë, ku  sipas tij, askush nuk mbetet prapa. 

“Investimet do të shkojnë aty ku mungojnë shërbimet bazike për jetesë, jo si deri tash vetëm në qendër e sheshe. Asnjë qytetar dhe asnjë lagje nuk do të diskriminohet”, ka shkruar Çeku.