Kurti: Malisheva, simbol i qëndresës dhe sakrificës, por është lënë pas dore

Lëvizja Vetëvendosje, tubimin kryesor të dielën e ka zhvilluar në Malishevë, ku kryeministri në detyrë dhe njëherësh kryetari i partisë, Albin Kurti, ka kërkuar përkrahjen e qytetarëve për kandidatin Valon Hoti.

Kurti ka thënë se Malisheva është simbol i qëndresës dhe sakrificës, por sipas tij, është lënë pas dore për shkak të keqqeverisjes, korrupsionit dhe paaftësisë.

“Malisheva si komunë është mishërim i qëndresës dhe sakrificës. Ky vend ka dhjenë djem e vajza për lirinë, kanë dhënë jetën për Kosovën, ka dhënë gjak që flamuri ynë valojë i lirë, ka dhënë bukë në sofër, ka dhënë besë e nder në çdo situatë të rrezikshme, prandaj kushdo që flet për Malishevën, duhet të flasë me nderim të përjetshëm... Është e padrejtë që për të gjitha këto vite të tëra Malisheva është lënë anash e dëmtuar nga korrupsioni, e vonuar nga paaftësia...Kjo Unë jam këtu për të thënë se kjo padrejtësi mbaron më 12 tetor me fitoren e Valon Hotit. Fitorja e Valon Hotit është fitorja e Malishevës e fitorja e Malishevës është fitorja e Republikës së Kosovës”, ka thënë Kurti. 

E vetë Hoti, ka premtuar qeverisje të ndershme dhe investime në infrastrukturë bazike, duke vënë theksin te furnizimi me ujë të pijshëm.

“Sot është koha për t’i dhënë fund keqqeverisjes, sot Malisheva po zgjohet, sot zëri juaj, i qytetarëve të ndershëm po thotë mjaft me pandershmëri dhe mjaft me harresë. Me besim të ndërsjellë do ta kthejmë Malishevën në atë që ka qenë gjithmonë krenari-dinjitet dhe zhvillim...Besatohem me ju dhe besën do ta mbaj dhe besën do ta mbajmë... Asnjë shtëpi pa ujë, asnjë familje pa këtë të drejtë themelore, nuk do ta ndalë asnjë ditë pinën derisa çdo lagje e fshat i Malishevës të ketë ujë të pijes 24 orë”, ka thënë Hoti.

Kandidati i kësaj partie për kryetar të Komunës së Prishtinës, Hajrulla Çeku, ka premtuar se nëse fiton më 12 tetor, mandatin do ta nisë me modernizimin e banesave kolektive dhe përmirësimin e hapësirave publike.

“Që nga viti i parë i mandatit, do të fillojmë me vendosjen e ashensorëve të rinj në të gjitha ndërtesat kolektive të lagjes Dardania. Do të punojmë intensivisht edhe në izolimin termik dhe fasadimin e këtyre banesave. Jemi të vetëdijshëm se hapësirat publike u takojnë qytetarëve dhe kemi nevojë për një aksion të menjëhershëm për lirimin e tyre nga uzurpimet. Qendrat tregtare te Santea, te Kurrizi dhe te Posta e Re do të rregullohen, rinovohen dhe funksionalizohen. Do të themelojmë ndërmarrjen e re komunale 'Tregu', e cila do të menaxhojë dhe mirëmbajë të gjitha tregjet e Prishtinës”, ka thënë ai.

Mbështetje për kandidaturën e Çekut ka dhënë edhe kryetari i Lëvizjes Vetëvendosje, Albin Kurti, i cili e ka quajtur atë kandidatin më të mirë që Prishtina ka pasur ndonjëherë.

“Prishtina ka një shans të artë, dhe ky shans quhet Hajrulla Çeku. Hajrulla Çeku është njeriu që e njeh Prishtinën më mirë se kushdo tjetër. Ai është njeriu i punës konkrete dhe i rezultateve të prekshme. Ju tashmë e keni parë se si Hajrullahu e njeh kryeqytetin, por në të njëjtën kohë vazhdon ta studiojë atë, sepse ka qytetarin në mendje dhe shërbimin në zemër. Zgjedhjet e 12 tetorit nuk janë vetëm një votim për kryetar, ato janë një referendum për të ardhmen e kryeqytetit. Kësaj radhe, Prishtina ka kandidatin më të shkëlqyer, më të mirë në këtë shekull nga çlirimi”, ka thënë Kurti.

Në Prizren, kandidati i Vetëvendosjes Artan Abrashi ka prezantuar një plan për zhvillimin urban dhe përmirësimin e infrastrukturës. Ai ka premtuar përfundimin e rrugëve publike në çdo fshat.

E kandidati i LVV-së për Pejën, Taulant Kelmendi është fokusuar te rinia dhe arsimi, duke premtuar 500 bursa për studentët dhe 1000 bursa sportive për nxënësit çdo vit. 

Në Mitrovicë, kandidati Faton Peci ka premtuar ndryshim të pamjes së qytetit, përmes gjelbërimit të hapësirave, rregullimit të urës së Sitnicës dhe ndriçimit të rrugëve. Ai ka thënë se qëllimi i tij është ta bëjë Mitrovicën qytet të zhvillimit dhe mirëqenies.