Muhaxhiri: Në çdo debat mes Lushtakut dhe Mihalit, fitues del Mihali

Analisti politik Artan Muhaxhiri, ka thënë se liderët e partive politike në Kosovë nuk kanë vullnet të takohen dhe të bisedojnë dhe kjo është arsyeja pse po hapen debate në rrjete sociale mes eksponentëve të partive. 

Muhaxhiri në “Konfront” të KTV-së ka thënë se kryetari i Skenderajt, Sami Lushtaku, gabon kur futet në debat me Dejona Mihalin, që është koordinatore e Komiteteve në Lëvizjen Vetëvendosje. 

Muhaxhiri ka thënë se çdo debat e fiton Mihali. Në me Mihalin është futur edhe kryetari i Prishtinës, Përparim Rama. 

Muhaxhiri ka thënë se Mihali është figurë e fuqishme brenda VV-së.

“Ajo është shpesh si një megafon i qëndrimeve të z. Kurti. Ka pushtet shumë të madh në strukturë...Sa i përket z. Lushtaku mendoj se është gabim i madh në PR.  Z. Lushtaku e ka një fuqi simbolike, e ka një background dhe kapital nga lufta. Pra, ka një pushtet edhe lokal. Këto beteja nuk janë në nivelin e njëjtë. Po të isha në vend të tijë kurrë nuk do të hyja në debate me një personalitet siç është znj. Mihali. Çdo debat mes Mihalit dhe Lushtakut e fiton Mihali. Fiton edhe me vet faktin që e përfshin z. Lushtakun në debat”, ka thënë Muhaxhiri. 

Ai ka thënë se Lushtaku me përfshirje në debate të tilla ka humbu rreth 4000 vota. 

Sa i përket debatit mes kryetarit të Prishtinës, Përparim Rama dhe Mihalit, Muhaxhiri ka thënë se Rama po mundohet të dominojë debatin brenda LDK-së. Ai thotë se në LDK ka përçarje të mëdha dhe Rama po synon të dalë si figurë unifikuese.

Koci: PDK-ja e LDK-ja kanë çarje të brendshme, me asnjërën s’janë numrat për presidentin

Politologu Melazim Koci ka vlerësuar se pa një marrëveshje të madhe mes partive është zor që Kuvendi ta zgjedhë presidentin e ri shpejt. Madje sipas tij, Vetëvendosje nuk mund t’i sigurojë numrat as nëse bashkëpunon me ndonjërën prej partive opozitare shqiptare.

Në “Konfront” të KTV-së, Koci ka deklaruar se edhe në rast marrëveshjeje asnjëra prej dy partive më të mëdha opozitare, Partisë Demokratike dhe Lidhjes Demokratike, nuk i kanë votat për president për shkak të “përçarjeve të brendshme”.

“E shoh të pamundshme zgjedhjen e presidentit. Shifrat e tregojnë qartë. Qeveria do të bëhet lehtë nga VV-ja. Konstituimi i Kuvendit gjithashtu, por zgjedhja e presidentit gjasat janë shumë të vogla. Nuk kanë numra me AAK-në. Dëgjuam për kontaktet e LDK-së, por as LDK-ja nuk ka numra, plus që këta të 18 deputetët nuk janë të sigurt. As PDK-ja pas reagimit të zotit Lushtaku nuk i ka numrat për çështjen e presidentit”, ka thënë ai tek ka komentuar rezultatet e zgjedhjeve të 7 qershorit.

Vetëvendosje sipas rezultateve të deritashme ka fituar 53 ulëse. PDK-ja ka marrë 22, LDK-ja 18 e AAK-ja 7. Për president duhen 80 deputetë të qëndrojnë në dy rundet e para të votimit.

“Poenta është që PDK-ja dhe LDK-ja kanë betejë të brendshme. Kanë çarje të brendshme. Është e heshtur, por kur vjen votimi i presidentit do të shpërfaqet. Ndoshta edhe më herët”, ka thënë ai.

Për deklaratën e kryetarit të degës së PDK-së në Skënderaj, Sami Lushtaku, se do të dorëhiqet nga partia nëse arrihet marrëveshje me VV-në, Koci ka thënë se ka deputetë që i shkojnë pas fjalëve të tij. Kjo dhe çarjet e partive, sipas tij, detyrojnë Kuvendin për marrëveshje të gjerë.

“Ka deputetë që edhe pa u kërkuar zoti Lishtaku votojnë sipas bindjes së tij. S’mendoj se do të mund të zgjidhet presidenti me çfarëdo marrëveshje. E vetmja mundësi është marrëveshje e madhe mes të gjithëve që e shoh shumë të vështirë. Gati të pamundur. Duke e parë skenën tonë e duke e ditur si funksionon e shoh shumë të vështirë për marrëveshje të madhe për dalje nga kriza”, ka thënë ai.

Buja: Kurti s’do bashkëpunëtorë në mandatin e ardhshëm, kërkon poshtërimin e opozitës

Opinionisti Jetlir Buja ka deklaruar se përplasjet e fundit të akterëve të Lëvizjes Vetëvendosje me figura të opozitës sinjalizojnë se kryeministri Albin Kurti nuk dëshiron bashkëpunëtor për mandatin e ardhshëm.

Së fundmi, Dejona Mihali, koordinatore e komiteteve të Lëvizjes Vetëvendosje, është përplasur me figura të partive opozitare. Gjuha e ashpërsuar, sipas Bujës tregon se Kurti po kërkon “poshtërim të ri të opozitës”.

“Mund të jetë shumë problematike. Ndoshta është herët të argumentohet kështu, por po shihet se Kurti nuk do bashkëpunëtorë në mandatin e radhës. Nuk do të bashkëpunojë as për pozitën e presidentit. Po kërkon poshtërim të partive opozitare. I ka poshtëruar përmes rezultatit por kërkon edhe me këto manovra me i poshtëru. Po ia del mbanë dhe kjo është goxha e keqe për pluralizmin tonë politik”, ka thënë ai në “Konfront” të KTV-së të enjten.

Buja ka thënë se në Kosovë ka hapësirë për opozitarizëm, por që sipas tij nuk po artikulim si duhet nga partitë opozitare.

“Është shumë e vërtetë që votuesi opozitar nuk ka pasur alternativë dhe nuk ka alternativë tash e dy vjet. Prej verës 2024 ne shkojmë në zgjedhje e fituesi dihet, do të jetë kryeministri Albin Kurti. Shkojmë për presidentin, e dimë çfarë loje do ta luajë kryeministri Kurti por nuk e dimë opozita çfarë qëllimi ka... Më 2021 LDK-ja pati qëndruar në sallë (për presidentin). Besoj se me humbjen e tri palë zgjedhjeve nga 2024-ta e ka humbur edhe argumentin. Nuk ka nevojë më ta kërkojë pozitën e presidentit sepse i ka humbur zgjedhjet përsëritshëm dhe thellë. Ajo që është më keq, është se nuk po shohim as alternativë prej tyre. Diçka të brendshme, diçka të re me të cilën do të na fascinonin e do të thoshim okej mund ta realizojnë nëse e marrin pozitën e presidentit”, ka thënë Buja.

Sipas tij, Kurti ka arritur ta shfuqizojë edhe çështjen e kandidaturës së Vjosa Osmanit për presidente nga radhët e Lidhjes Demokratike të Kosovës. Ai ka thënë se pikërisht LDK-ja dhe PDK-ja duhet të reflektojnë pas dështimit në zgjedhjet e 7 qershorit. Siç ka thënë ai, dalja e ulët në zgjedhje është tregues i pakënaqësisë, por që duhet të artikulohet më mirë nga opozitarët.

“Është rezultat shumë, shumë i keq për LDK-në, shumë i keq për PDK-në. Mendoj se reflektimi duhet të nisë nga këto dy parti. Nuk u duhet pozita e presidentit aq shumë. Sa i përket daljes në zgjedhje, këtu mendoj se kanë njëfarë fije shprese sepse është mjaft shqetësuese që kanë dalë më pak votues. Ka hapësirë për opozitarizëm. Pakënaqësia e qytetarëve ekziston. S’mund të jenë 60 për qind të qytetarëve që s’kanë dalë, të jenë krejt të kënaqur me Kurtin. Ekziston pakënaqësi e madhe por që nuk po artikulohet qysh duhet prej partive opozitare”, ka thënë tutje ai.

Muhaxhiri: Opozita pa ide, shpesh bie në grackën e Kurtit

Analisti politik Artan Muhaxhiri, ka thënë se pavarësisht që para zgjedhjeve kryeministri në detyrë Albin Kurti, shpërndanë qindra miliona euro e njëjtë veproi edhe në ato të 7 qershorit, sërish nuk arriti t’i ketë 60% sa pretendonte.

Megjithatë Lëvizja Vetëvendosje mori mbi 70% të votave të diasporës, e sipas Muhaxhirit kjo është edhe për fajin e opozitës e cila sipas tij është e pa ide.

Muhaxhiri në emisionin “Konfront” në KTV, ka deklaruar se as pas 6 vjetësh, opozita nuk po arrin ta dekodojë populizmin e Kurtit.

“Opozita kosovare është jashtëzakonisht pasive, është e pa ide dhe që 6 vjet nuk kanë ide se si ta dekodojnë këtë populizëm të Kurtit. Shpesh bien edhe në grackën e tij. Ta marrim edhe çështjen e diasporës, është viti i 6-të dhe nuk kemi parë asnjë angazhim, asnjë projekt të opozitës që të shkojë në diasporë dhe së paku t’i rikthejë ato strukturat e vjetra”, ka deklaruar Muhaxhiri.

Analisti Muhaxhiri deklaroi se opozita nuk ka pasur strategji as për të fituar votat e diasporës, sipas tij “njerëzit që do të mund të kishin ndikim në diasporë, bënin fushatë në Prishtinë e Prizren”.

Lëvizja Vetëvendosje që udhëhiqet nga Albin Kurti fitoi sërish shumicën mes partive shqiptare në Kuvend, duke marrë 53 deputetë. PDK-ja pati 22, LDK-ja 18 e Aleanca 7.

Maliqi: Kurti ka mandat për të qeverisur, jo për të sunduar

Analisti politik Agon Maliqi thotë se kryeministri në detyrë i Kosovës dhe kreu i Lëvizjes Vetëvendosje, Albin Kurti, e ka mandatin për ta formuar qeverinë e për të qeverisur për 4 vjet, por shton se votuesit atij nuk ia kanë dhënë mandatin për të sunduar. 

Maliqi vlerëson se zgjedhjet e 7 qershorit nuk është dashur të mbaheshin fare. 

“Mesazhi i elektoratit është i njëjtë. Kurti ka mandat për të qeverisë për 4 vjet, por s’ka mandat për të sunduar. Kësaj radhe ka mandat edhe më të dobët për këtë pjesën e qeverisjes, me 53 ulëse, që do të mund të bëhen 63 bashkë me pakicat në Kuvend. Është mandat relativisht i brishtë për këdo për ta formuar qeverinë. Qeveria teknikisht mund të formohet, por një qeveri që varet nga 2-3 deputetë historikisht, në çdo mandat të Kuvendit, ka pasur rrjedhje nga shumica. Ndonjë deputet që është larguar nga pakënaqësia. Rrezikon që mandati të mos shkojë deri në fund”, tha Maliqi në “Konfront” të KTV-së. 

Ai ka thënë se Kurti po e trajton shumicën e siguruar prej 47 për qind, sikur të ketë siguruar qind për qind. 

“Ai ka shfrytëzuar të gjitha hapësirat ligjore, me Albulena Haxhiun si ushtruese e detyrës së presidentes, për të bërë emërime në institucione. Po e shohim se çfarë nënkupton një sundim i Kurtit, kapjen e bordeve shumë të rëndësishme, si ai i Komisionit të Pavarur prë Media. Po e shohim tendencën e synimin të strukturuar afatgjatë, që nuk po fshihet, për kapjen e gjitha institucioneve. Në këtë kontekst posti i presidentit bëhet shumë i rëndësishëm”, tha Maliqi.