Blakaj: Çështja e personave të zhdukur po trajtohet si politike e jo si humanitare

Komisioni i përbashkët i Kosovës dhe Serbisë për çështjen e personave të zhdukur, nuk ka mbajtur asnjë takim, pas atij të 15 janarit të këtij viti që ka dështuar në Bruksel. Sipas njohësve, Bashkimi Evropian duhet të ndërmarrë masa, në mënyrë që palët ta respektojnë marrëveshjen e arritur në dhjetor të 2024-s

Asnjë takim mes Kosovës dhe Serbisë për çështjen e personave te pagjetur nuk është mbajtur që nga dhjetori i vitit 2024. Takimi që pritej t’i jepte drejtim procesit, i caktuar më 15 janar të këtij viti në Bruksel, ka dështuar të mbahet për fajin e palës serbe. 

Bekim Blakaj, drejtor ekzekutiv në Fondin për të Drejtën Humanitare, thotë se Bashkimi Evropian duhet të ndërmarrë masa, në mënyrë që palët të respektojnë marrëveshjen.

“Bashkimi Evropian si lehtësues i dialogut mes Kosovës dhe Serbisë nuk ka bërë sa duhet ose edhe nuk ka qenë prioritet çështja e personave te zhdukur dhe nuk kemi rezultate. Bashkimi Evropian është dashtë të jetë më i vendosur dhe në fund të ditës të vendosen kushte, sidomos kushte në procesin e integrimeve evropiane, pra t’i thotë edhe Kosovës edhe Serbisë që nuk mund të gravitojnë pa u zgjidhur çështja e personave të zhdukur”, ka thënë Blakaj.

E Kushtrim Gara, anëtar i Komisionit Qeveritar për Persona të Zhdukur, tha se nga institucionet e Kosovës kjo çështje është adresuar si prioritet në dialogut e Brukselit.

“Në të gjitha takimet, çështja e personave të zhdukur vazhdon të adresohet si prioritet. I potencova një sërë mekanizmash që janë funksionalë. Kosova ka vazhduar që të adresojë këtë çështje dhe është anëtare e shumë proceseve për personat e zhdukur”.

Mosdakordimi për zbardhjen e fatit të personave të zhdukur është zhgënjim për familjarët, thotë drejtori i Fondit për të Drejtën Humanitare, Bekim Blakaj. 

Sipas tij, çështja e personave të zhdukur po trajtohet si çështje politike.

“Mendoj që jo vetëm familjarët, por edhe ne në shoqërinë civile që merremi me këtë çështje e kemi pas një zhgënjim të madh sepse shpresat kanë qenë të mëdha pas dakordimit për zbardhjen e fatit të personave të zhdukur në mes Kosovës dhe Serbisë. Për më keq, tash nuk ka as takime. Kjo çështje po shihet si çështje politike, po trajtohet si çështje politike dhe jo humanitare”, ka thënë ai.

Në dhjetor të vitit të kaluar, Kosova dhe Serbia ishin pajtuar që të formonin komision të përbashkët për të zbatuar Deklaratën dhe BE-ja e kishte cilësuar si një nga rezultatet më të rëndësishme të dialogut vitin e kaluar.

Por takimi i Komisionit të përbashkët, i caktuar më 15 janar të këtij viti, nuk është mbajtur për shkak se pala serbe ka refuzuar të marrë pjesë, me arsyetimin se një ditë më herët, autoritetet e Kosovës kishin mbyllur disa institucione e shërbime të strukturave paralele.