Kryetari i Kuvendit të Kosovës, Dimal Basha, e ka shpallur të mbyllur seancën konstituive, pavarësisht se Kuvendi ka dështuar ta zgjedhë një nënkryetar nga pakica serbe të shtunën. Asnjëri prej deputetëve që u votua nuk ka marrë shumicën e mjaftueshme dhe rrjedhimisht Kuvendi nuk ka nënkryetarin nga ky komunitet.
Bajrami: Hipokrizi që VV-ja të apostrofojë partitë e tjera me Listën Serbe, kur ekzistojnë përgjimet e Mimoza Kusarit
Deputetja e LDK-së, Hykmete Bajrami, është kthyer për të dytën herë në hollin e Kuvendit të Kosovës para mediave, pas deklarimit të Albulena Haxhiut e Hekuran Muratit nga LVV.
Bajrami u ka reaguar pasi Haxhiu e Murati kritikuan partitë e tjera për mosvotimin e Nenad Rashiqit për nënkryetar nga komuniteti serb. Ajo ka përmendur publikimin e përgjimeve të Mimoza Kusarit me Milan Radoiçiqin, duke e quajtur “hipokrizi” që VV-ja të akuzojë partitë e tjera për bashkëpunim me Listën Serbe.
“Është hipokrizi me dalë para mediave dy eksponentë të VV-së dhe me apostrofuar parti të tjera se kinse jemi me Listën Serbe. Ndërkohë që janë përgjimet e Mimoza Kusarit duke qenë shefe e 58 deputetëve, me Listën Serbe dhe Milan Radoiciqin. Ata që ne na quajnë bashkëpunëtorë të tyre, keni dëshmi se kanë bashkëpunuar për vota për të zgjedhur persona në Kushtetuese dhe Ligjin për veteranët”, ka thënë ajo.
Bajrami ka shtuar se VV-ja e ka pasur mundësi ta shpallë terroriste Listën Serbe, por nuk e ka bërë.
“Është hipokrizi me dalë e me tregu se si ne duhet të bëhemi të gjithë bashkë që të përjashtojmë Listën Serbe nga Kuvendi. Ata janë aty. Këta kur e kanë pasë rastin me i shpallë organizatë terroriste dhe i kanë pasë kompetencat, nuk e kanë bë. I kanë pasë faktet se kanë qenë pjesë në sulmin e Banjskës, dhe nuk e kanë bë”.
Sipas Bajramit, Vetëvendosja nuk i ka as numrat për qeverinë.
“Është hipokrizi të thuhet se i kemi numrat për qeveri në ndërkohë që këta numra Albin Kurti nuk ia ka dhënë Albulena Haxhiut plot 48 herë, pse kërkojnë numra nga opozita për ta bërë nënkryetar Rashiqin. Është hipokrizi të thuhet se partitë opozitare po e mbajnë Kuvendin të bllokuar, ndërkohë që ne i kemi numrat për qeveri”, ka thënë ajo.
Hasani: S’ka konstituim pa zgjedhjen e të gjithë nënkryetarëve, VV-ja shpërfilli rendin kushtetues
Ish-kryetari i Gjykatës Kushtetuese, Enver Hasani, ka thënë se nuk mund të konstituohet Kuvendi pa zgjedhjen e kryetarit dhe të gjithë nënkryetarëve.
"Nuk ka Kuvend të konstituar pa zgjedhjen e kryetarit dhe të gjithë nënkryetarëve", ka thënë ai për KOHËN.
Sipas Hasanit, e gjithë procedura që është ndjekur për zgjedhjen e nënkryetarëve bie ndesh me Kushtetutën dhe Rregulloren e Kuvendit.
Ai ka theksuar se kjo ka pasoja në pozitën ndërkombëtare të Kosovës, teksa ka shtuar se kryeparlamentari dhe Vetëvendosja kanë shpërfillur vetëdijshëm rendin kushtetues dhe ligjor.
“Tërë procedura e ndjekur për zgjedhjen e nënkryetarëve është në kundërshtim me Kushtetutën e Kosovës, Rregulloren e Kuvendit dhe aktgjykimet e Gjykatës Kushtetuese. Që nga ndërrimi rendit të ditës e deri te hedhja shortit dhe pamundësia e kandidimit të kandidatit serb nga shumica e deputetëve serb në Kuvendin e Kosovës. Sigurisht që kjo ka pasoja në raport me pozitën ndërkombëtare të Kosovës dhe, mbi të gjitha, flet qartë për shpërfillje të vetëdijshme dhe me qëllim të rendit kushtetues dhe ligjor të Republikës së Kosovës nga kryetari Kuvendit dhe partia që ai përfaqëson”, ka thënë Hasani.
LVV: Të ecim përpara ose me qeverinë e re, ose me zgjedhje
Deputetja e LVV-së, Albulena Haxhiu, ka thënë se duhet të niset puna me kryetarin dhe nënkryetarët e zgjedhur të Kuvendit - pavarësisht se nuk është zgjedhur një nga komuniteti serb – ose të shkohet në zgjedhje.
Ajo ka theksuar se është e papranueshme që institucionet të mbesin peng i Listës Serbe.
“Është e papranueshme që një subjekt që nuk e njeh shtetin tonë të pretendoj të ketë rol në proceset demokratike që vetë i mohon. Nuk guxojmë të mbetemi peng i atyre që e mohojnë ekzistencën tonë si shtet. Është e rëndësishme të ecim përpara me kryesinë, kryetarin dhe nënkryetarët e zgjedhur, jemi të interesuar të ecim përpara ose me qeverinë e re, ose me zgjedhje”, ka thënë para mediave pas seancës.
Bajrami: Basha bëri shkelje flagrante të Kushtetutës
Hykmete Bajrami, deputete e Lidhjes Demokratike të Kosovës, ka thënë se mbyllja e seancës konstituive nga kryeparlamentari Dimal Basha, pa zgjedhur nënkryetarin nga radhët e komunitetit serb, është shkelje flagrante e Kushtetutës.
“Ishit dëshmitarë të një shkelje flagrante të Kushtetutës, ku kryetari i sapozgjedhur mbylli seancën konstituive pa të drejtë sepse rregullorja e thotë qartë që Kuvendi konstituohet dhe seanca mbyllet vetëm në rastin kur zgjedhet kryetari dhe zgjedhen të gjithë nënkryetarët”, ka thënë ajo në një deklaratë për mediat pas seancës.
Bajrami ka thënë se LDK-ja ka refuzuar të votojë ndaras për nënkryetarët, sepse sipas saj, aktgjykimi i Gjykatës Kushtetuese i ka obliguar deputetët të vazhdojnë konstituimin sipas agjendës së dakorduar më 8 prill. E këtu, siç ka thënë Bajrami, ka pasur pajtim që nënkryetarët të votohen në pako.
Ajo ka përsëritur qëndrimin se Vetëvendosje nuk i ka numrat e shumicës për ta formuar qeverinë dhe se kjo është arsyeja e bllokadave.
Të shtunën u ezauruan të gjithë emrat e deputetëve të komunitetit serb në votimin me short. Pavarësisht kësaj, kryetari Basha vendosi që ta mbyllë seancën duke thënë se “puna duhet të vazhdojë”.
Krasniqi: S’varet nga interpretimi i kryekuvendarit mbyllja e seancës konstituive
Kryetari i PDK-së, Memli Krasniqi
Photo: Driton Paçarada
Deputeti i PDK-së, Memli Krasniqi, ka thënë se kryeparlamentari nuk mund të vendosë për përfundimin e seancës konstituve, pasi ajo parashihet me Kushtetutë dhe rregullore.
Ai ka thënë se Kuvendi nuk mund të konstituohet pa zgjedhjen e kryesisë.
“Tallja me Kuvendin dhe qytetarët nga VV po vazhdon. Përkundër që ne e mundësuam një proces që do zhbllokonte krizën politike, na nxirrte si institucione nga situata, VV nuk e ka këtë qëllim por që ta thellojë krizën. Nuk varet nga vullneti dhe interpretimi i kryetarit të Kuvendit se a përfundon a jo seanca konstituive, por kjo është e qartë sipas Kushtetutës dhe Rregullores së punës”, ka thënë ai pas mbylljes së seancës konstituive.
Krasniqi ka shtuar se kryeministri në detyrë e ka ftuar të shtunën në takim para seancës lidhur me zgjedhjen e Nenad Rashiqit, por se nuk e ka pranuar.
“Kam refuzuar ta takojë Kurtin sot sepse nuk ka pasur arsye të takohemi ne të diskutojmë si me shkelë Kushtetutën. Kurti ka dashur që të takohet me insistim për të diskutuar si mund ta zgjedhim Rashqin nënkryetar. I njëjti që nuk ka qenë i gatshëm të takohet as 10 minuta për të diskutuar zgjedhjen e një kryetari të dinjitetshëm, një që s’është Dimal, që nuk i turpëron as ata vetë e as qytetarët”.
Krasniqi e ka quajtur arbitrar thirrjen për mbledhje të kryesisë të hënën nga kryeparlamentari Dimal Basha.
“Interpretimi arbitrar i Bashës nuk është e re, sepse Dehari interpretonte më herët. Këta janë vonuar 1 orë për ta filluar seancën, sepse po ma merr menja që instruksionet ia ka shkruar ose Albulena Haxhiu ose eksperti i drejtësisë Hekuran Murati se me ata dy erdh në seancë. Janë duke sharruar edhe më thellë në shkelje kushtetuese”.
Kuvendi nuk zgjedh nënkryetar serb, Basha: Puna duhet të vazhdojë
Kuvendi ka dështuar ta zgjedhë nënkryetarin nga komuniteti serb. Asnjëri prej deputetëve që u votua nuk ka marrë shumicën e mjaftueshme dhe rrjedhimisht Kuvendi nuk ka nënkryetarin nga ky komunitet.
Pavarësisht kësaj, kryetari Dimal Basha ka thënë se “nuk ka mundësi tjera veçse të vazhdohet me punën". Ai e shpalli të mbyllur seancën konstituive.
“Konsideroj se moszgjedhja nuk mund të bëhet pengesë qe bllkon konstituimin. Pas përmbylljes kuvendi duhet të vazhdojë punën sic parashihet në Kushtetutë”, ka thënë ai.
Basha ka thirrur mbledhje të kryesisë për të hënën.
Dështon edhe Simiqi
As Igor Simiq nuk është zgjedhur nënkryetar i Kuvendit të Kosovës.
Ai ishte i fundit në rundin e votimeve për nënkryetar të komunitetit serb.
As Simiqi s’i merr votat
Photo: Driton Paçarada
Deputeti i Listës Serbe, Igor Simiq, nuk ka marrë votat për nënkryetar të Kuvendit.
Rashiqi dështon të bëhet nënkryetar i Kuvendit
Nenad Rashiq
Photo: Driton Paçarada
Nenad Rashiq ka dështuar të zgjidhet nënkryetar i Kuvendit të Kosovës nga komuniteti serb.
Miljana Nikoliq dështon të zgjidhet nënkryetare e Kuvendit
Arkiv
Photo: Driton Paçarada
Tri herë ka dështuar të marrë votat e nevojshme për nënkryetare të Kuvendit të Kosovës, Miljana Nikoliq e Listës Serbe.
Ajo nuk ka të drejtë pas tri herësh të hedhet sërish në votim.
Dështon sërish zgjedhja e Miljana Nikoliqit
Miljana Nikoliq nga Lista Serbe ka dështuar edhe të dytën herë të zgjidhet nënkryetare e Kuvendit të Kosovës.
Miljana Nikoliq s’i merr votat për nënkryetare
Anëtarja e Listës Serbe, Miljana Nikoliq, ka dështuar t’i marrë votat e nevojshme për nënkryetare të Kuvendit.
Ajo ka marrë zero vota për, 52 kundër dhe 24 abstenime.
Krasniqi: Kurti po insiston të krijojë edhe një lëndë në Gjykatën Kushtetuese
Photo: Driton Paçarada
Kryetari i PDK-së, Memli Krasniqi thotë se nuk e kupton insistimin e kryeministrit në detyrë, Albin Kurtit, për të zgjedhur Nenad Rashiqin nënkryetar të Kuvendit nga komuniteti serb.
Sipas Krasniqit, kjo përpjekje është në kundërshtim me Kushtetutën dhe përfaqëson një veprim të rrezikshëm politik që mund të çojë drejt një krize të re institucionale.
“Prej ditës së parë kur ka filluar seanca konstituive më 15 prill, kërkesa jonë e vetme ka qenë që çdo veprim duhet me qenë në pajtim me Kushtetutën. Një votim i tillë, i ndarë, nuk është në pajtim me Kushtetutën. Ne nuk mundemi të bëhemi pjesë e lojërave politike, pavarësisht se Nenad Rashiq si person, si figurë politike, është jashtëzakonisht një figurë pozitive nga komuniteti serb, në rrethana të ndryshme do të ishte jashtëzakonisht i mirë. Albin Kurti një entuziazëm të tillë për me e zgjedh Rashiqin s’e ka pasur as për Albulena Haxhiun e as Dimal Bashën. Pse po insiston me e kriju edhe një lëndë në Gjykatën Kushtetuese, unë nuk po e kuptoj. A është qëllimi i tij me e vazhdu krizën, apo me e mbajt pozitën e kryeministrit në mënyrë uzurpatore”, tha tutje Krasniqi.
Zemaj: E gjithë bllokada lidhet rreth formimit të qeverisë, VV-ja s’i ka numrat
Deputeti i LDK-së, Armend Zemaj, ka thënë se Lëvizja Vetëvendosje qëllimisht po e zvarrit konstituimin e Kuvendit.
Sipas tij, konstituimi është bllokuar sepse kryeministri në detyrë Albin Kurti nuk i ka numrat për formimin e qeverisë.
“Konstituimi po zgjat përtej arsyeshmërisë. Çështja është te numrat për qeveri dhe VV-ja nuk është e interesuar deri të kalojmë në një momentum tjetër deri sa ta ka një siguri që ka numra për krijimin e qeverisë. E gjithë kjo bllokadë lidhet rreth formimit të qeverisë”, ka thënë ai.
Haxhiu thotë se pret votë nga AAK e Nisma: Sot mund të jetë seanca e fundit
Deputetja e LVV-së, Albulena Haxhiu, ka thënë se pret votat nga AAK-ja e Nisma për votimin e kandidatit nga komuniteti serb për nënkryetar, konkretisht për Nenad Rashiqin.
Ajo ka shtuar se me mosvotim situata po shkon drejt zgjedhjeve, e se VV-ja nuk do zgjedhje.
“Sot mund të jetë seanca e fundit sepse nëse sot të gjithë hedhen në short dhe nuk ka tjetër që pret, atëherë nuk ka arsye të mblidhemi pas 48 orëve. Është e rëndësishme ta konstituojmë Kuvendit sepse kjo situatë çon në zgjedhje. ne nuk jemi të interesuar të shkojmë në zgjedhje, mendojmë se duhet të konstituohet. Është në dorën e opozitës, nëse PDK, LDK refuzojnë ta bëjnë këtë, të paktën presim nga AAK, Nisma”, ka thënë ajo.
Kadrijaj: As sot s'besoj se votohet nënkryetari
Photo: Driton Paçarada
Deputetja e AAK-së, Time Kadrijaj, para fillimit të seancës konstituive të Kuvendit të Kosovës, është pyetur nëse pritet të votohet sot nënkryetari i Kuvendit nga radhët e pakicave serbe.
Ajo ka thënë se nuk pret as sot të ketë rezultate.
“Nuk po besoj”, ka thënë shkurt Kadrijaj.
Gjashtë runde votimi në dispozicion për ta konstituuar Kuvendin
E shtuna, sot, mund të jetë dita e fundit që Kuvendi voton përmes shortit për të zgjedhur nënkryetarin nga radhët e komunitetit serb. Deputetët sot mund të përballën me vetëm tri opsione. Në votim mund të nxirren dy deputetë të Listës Serbe - Igor Simiq e Miljana Nikoliq – si dhe ai i Partisë së Pavarur Liberale, Nenad Rashiq. E Rashiqi, që ka marrë më së shumti vota si kandidat i komunitetit serb, ka vetëm një votim të mundshëm në dispozicion.
Në këtë seancë, Kuvendi mund t’i konsumojë të gjitha kandidaturat e mbetura të deputetëve të komunitetit serb për postin e nënkryetarit të pestë. Pa një kandidat të mbetur për votim, Kuvendi nuk do të ketë arsye për mbajtje të seancave të tjera, pasi që pika e vetme e rendit të ditës është ajo e zgjedhjes së nënkryetarit serb.
Për ta shmangur një situatë të tillë, në Institutin e Kosovës për Drejtësi, që e bën monitorimin e punës së Kuvendit, kanë rekomanduar që në seancën e radhës, kryetari Dimal Basha ta përsërisë votimin në pako të të dy nënkryetarëve nga komunitetet pakicë.
Melos Kolshi nga ky Institut, ka thënë se kjo mënyrë do t’i rikuperonte shkeljet kushtetuese që i ka konsumuar kryetari Basha, me ndarjen e procedurës së votimit për nënkryetarët e pakicave.
“IKD-ja kërkon nga Kryetari i ri i Kuvendit që në vazhdimin e seancës konstituive, të përsëritet procedura e votimit të nënkryetarëve nga komunitetet dhe procesi të zhvillohet në përputhje me Kushtetutën, Rregulloren e Kuvendit dhe aktgjykimin e fundit të Gjykatës Kushtetuese. Nënkryetari nga komuniteti serb dhe nënkryetari nga komunitetet e tjera joshumicë, pas pranimit të propozimeve me shkrim, duhet të votohen së bashku, në pako”, është shprehur Kolshi për KTV-në të premten.
Kjo çështje e ka lënë peng krijimin e legjislaturës së re. E përmbylljen urgjente të konstituimit të Kuvendit e ka kërkuar të premten presidentja, Vjosa Osmani. Ajo tha se pret nga deputetët që të gjejnë një zgjidhje që është në përputhje me Kushtetutën.
“Që Kuvendi të konstituohet urgjentisht, që qeveria të zgjidhet po ashtu urgjentisht, çdo ditë e humbur është ditë e humbur për Kosovën, për popullin e saj, për perspektivën tonë euroatlantike, kështu që shpresoj që të gjendet një zgjidhje në përputhje me Kushtetutën”, ka thënë ajo.
Në garë për nënkryetar Kuvendi nga radhët e komunitetit serb kanë mbetur tre deputetë dhe janë edhe gjashtë runde votimi. Në votim mund të nxirren dy deputetë të Listës Serbe - Igor Simiq e Miljana Nikoliq – si dhe ai i Partisë së Pavarur Liberale, Nenad Rashiq. Afati kushtetues për konstituimin e Kuvendit do të përfundojë më 17 shtator.
Kolshi nga IKD thotë se nuk është e përcaktuar se çfarë mund të pasojë nëse Kuvendi nuk konstituohet deri në këtë datë, por thekson se zgjedhjet nuk mund të shihen si opsion automatik.
“Problemi që ka sjellë këtë situatë nuk lidhet me mungesën e legjitimitetit popullor, por me mungesën e vullnetit politik për të respektuar Kushtetutën, Rregulloren e Kuvendit dhe aktgjykimet e Gjykatës Kushtetuese, si dhe me shkeljen e qëllimshme të këtyre normave gjatë procesit të konstituimit”, ka deklaruar ai.
Të martën pas më shumë se 4 muajsh ngërç politik, deputetët e kanë zgjedhur kryetar Kuvendi, deputetin Dimal Basha. Në të njëjtën ditë i kanë zgjedhur edhe nënkryetarët e Kuvendit nga radhët e tri partive më të mëdha shqiptare, Albulena Haxhiun nga LVV, Vlora Çitakun nga PDK e Kujtim Shalën nga LDK, si dhe e kanë zgjedhur nënkryetaren nga radhët e grupit multietnik, Emilja Rexhepi. Procesi i përmbylljes së konsituimit ka ngecur te zgjedhja e nënkryetarit nga komuniteti serb. Me kërkesë të grupit multietnik për mosvotim në pako të nënkryetarëve të pakicave, kryetari i Kuvendit e ka ndarë procedurën e cila është vlerësuar jokushtetuese nga partitë parlamentare të Kuvendit.
Lista Serbe ka paralajmëruar që për këtë çështje do të ankohet në Gjykatën Kushtetuese.
Afati kushtetues për konstituimin e Kuvendit do të përfundojë më 17 shtator.