I dërguari special i Departamentit Amerikan të Shtetit për Kosovë në kohën e luftës dhe ambasador amerikan në Serbi deri në fillim të këtij viti, Christopher Hill, sot do të vazhdojë dëshminë e tij në gjykatoren e Speciales, në rastin ku Hashim Thaçi, Kadri Veseli, Rexhep Selimi e Jakup Krasniqi akuzohen për krime lufte dhe krime kundër njerëzimit.
Hill do të vazhdojë dëshminë në orën 9:00, ndërkohë që transmetimi bëhet më 45 minuta vonesë.
Të hënën tek iu përgjigj mbrojtjes së Thaçit, Hill tha se i akuzuari i Speciales, në takimin e parë mes tyre, nuk ia dha përshtypjen si udhëheqës i Ushtrisë Çlirimtare të Kosovës.
“Ai fliste butë në mënyrë të mendueshme dhe m’u krijua përshtypja se ai përputhej më shumë me ndonjë mjedis universitar sesa ndonjë mjedis ushtarak. Mua personalisht nuk ma kujtonte ndonjë mjedis ushtarak”, tha Hill.
I pyetur nga avokati i Thaçit, Luka Mishetiq, se a e pati përshtypjen se Thaçi e kishte nën kontroll UÇK-në, dëshmitari Hill u përgjigj se nuk kishte bazë ta mendonte këtë.
“Nuk kisha asnjë bazë për këtë. Ai ishte një prej tre personave që erdhën. Ai ishte udhëheqësi i këtyre personave që i takova, por nuk m’u krijua përshtypja se ai ishte një person që kishte nën kontroll këtë organizatë të madhe ose që drejtonte këtë organizatë të madhe”, tha Hill.
Në këtë rast gjyqësor Hashim Thaçi, Kadri Veseli, Jakup Krasniqi e Rexhep Selimi akuzohen për ndërmarrje të përbashkët kriminale lidhur me krime lufte dhe krime kundër njerëzimit. Në bazë të aktakuzës së Zyrës së Prokurorit të Specializuar (ZPS), e publikuar në shkurt të 2023-tës, ata akuzohen për ndërmarrje të përbashkët kriminale lidhur me rreth 100 vrasje, tortura e trajtim mizor në rreth 40 qendra ndalimi gjatë periudhës së viteve 1998-1999. Shumica e viktimave të krimeve, sipas ZPS-së, janë shqiptarë, civilë dhe pjesëtarë të Lidhjes Demokratike të Kosovës (LDK).
Sipas ZPS-së, të akuzuarit kanë qenë në dijeni apo është dashur të jenë në dijeni shkaku i pozitave udhëheqëse në Shtab të Përgjithshëm, lidhur me pretendimet për krimet që janë kryer dhe kanë pasur qëllim që ta marrin pushtetin në Kosovë përmes tyre. Ish-drejtuesit e Shtabit të Përgjithshëm të UÇK-së i kanë mohuar të gjitha këto akuza. Ata kanë thënë se UÇK-ja nuk kishte hierarki të tillë, meqë peshën e kishin komandantët e zonave dhe se kishte për qëllim ta luftonte Serbinë e jo civilët.