Java e fundit e prillit me mot të paqëndrueshëm

Java e fundit e prillit pritet të jetë me mot të paqëndrueshëm. Sipas njoftimit të lëshuar nga Instituti Hidrometeorologjik i Kosovës, intervalet me diell dhe vranësira kohë pas kohe do të shoqërohen edhe me reshje shiu e shkarkesa elektrike.

“Era gjatë gjithë javës do të jetë kryesisht nga drejtimi verior (veriperëndim dhe verilindje), me intensitet të dobët deri mesatar, duke reflektuar praninë e një fushe relativisht të dobët presioni, por me ndikim të vazhdueshëm të masave ajrore më të freskëta”, thuhet në njoftimin e IHMK-së.

Nga aspekti agrometeorologjik, temperaturat minimale, të cilat në disa zona mund të zbresin deri në 0°C, sidomos në fund të javës, paraqesin rrezik potencial për dëmtime nga ngricat e vonshme pranverore.

“Reshjet e herëpashershme, megjithëse jo intensive, do të kontribuojnë në përmirësimin e lagështisë së shtresës sipërfaqësore të tokës, duke favorizuar mbirjen dhe zhvillimin fillestar të kulturave si patatja, misri dhe perimet pranverore”, thuhet më tej. 

Të hënën moti do të jetë me diell dhe vranësira të shpërndara. Temperaturat minimale do të sillen rreth 1-3 gradë celsius, ndërsa maksimalet rreth 18-21. 

Të martën mot me diell dhe vranësira të shpërndara, të cilat gjatë ditës vende-vende priten të sjellin riga shiu. 

Temperaturat minimale nga 1-4 gradë celsius, ndërsa maksimalet nga 19-22.

Edhe të mërkurën pritet të mbajë mot i ngjashëm, por me temperatura më të ulëta. Ndonëse ato minimale do të shënojnë ngritje deri në 8 gradë celsius, maksimalet do të sillen nga 15-18 gradë.

Të enjten po ashtu do të ketë mot me vranësira e reshje shiu në disa vende. Temperaturat minimale do të jenë të ngjashme si të një dite më parë, ndërsa maksimalet do të shënojnë rënie në 13 gradë celsius.

Të premten edhe pse pritet të mbajë mot me diell dhe pjesërisht i vranët e pa reshje shiu, temperaturat minimale do të bien në 0-3 gradë celsius, ndërsa maksimalet në 11-13.