Mbi 32% e zyrtarëve nuk e kanë deklaruar pasurinë, afat edhe gjashtë ditë

Mbi 32 për qind e zyrtarëve publikë ende nuk e kanë deklaruar pasurinë për vitin 2025, ndërsa afati ligjor për këtë obligim po i afrohet fundit ka njoftuar të mërkurën Agjencia për Parandalimin e Korrupsionit.

Sipas të dhënave të Agjencisë, deri më 25 mars, 3,405 zyrtarë apo rreth 32.9 për qind e të obliguarve nuk e kanë nisur fare procesin e deklarimit të pasurisë, teksa në total, janë mbi 10 mijë zyrtarë që duhet ta përmbushin këtë detyrim deri më datë 31 mars.

Ndërkohë bëhet e ditur se 4,860 zyrtarë (46.9 për qind) e kanë përfunduar deklarimin, ndërsa 2,088 të tjerë janë ende në proces. 

“Procesi i deklarimit të rregullt vjetor të pasurisë për vitin kalendarik 2025 po hyn në fazën më dinamike, ndërsa afati ligjor për përmbylljen e tij, 31 marsi 2026, po afrohet. Agjencia për Parandalimin e Korrupsionit njofton se sipas të dhënave të përditësuara deri më 25 mars 2026 (mesditë), gjithsej 4860 zyrtarë publikë apo 46.94% e kanë përfunduar tashmë deklarimin e pasurisë. Njëkohësisht 2088 zyrtarë (20.17%) janë aktualisht në proces të plotësimit të deklaratave të tyre, çka tregon një angazhim të shtuar në ditët e fundit të afatit. Ndërsa janë edhe 3405 zyrtarë publikë (32.89%) që ende nuk e kanë filluar këtë obligim ligjor”, thuhet në njoftim. 

Drejtori i Agjencisë, Yll Buleshkaj, u ka bërë thirrje zyrtarëve që ta përmbushin detyrimin brenda afatit, duke theksuar se transparenca është thelbësore për besimin qytetar dhe integritetin institucional.

“Transparenca nuk është vetëm detyrim ligjor, por përbën themelin e besimit qytetar dhe të integritetit institucional. Prandaj, është e rëndësishme që secili, në kuadër të përgjegjësive të tij, të kontribuojë për një administratë më të hapur dhe më të përgjegjshme”, ka theksuar ai.

Agjencia ka paralajmëruar se mosdeklarimi i pasurisë përbën shkelje ligjore dhe mund të ndëshkohet me gjoba, kallëzime penale, e deri në masa më të rënda si burgim apo konfiskim të pasurisë.