Arbëri

Policia alarmon: Në disa raste fëmijët kanë postuar për vetëlëndim

Policia

Foto: Ilustrim

Policia e Kosovës ka ngrehur alarm mbi rastet ku fëmijët kanë publikuar postime në rrjete sociale për vetëlëndim. Policia ka njoftuar se ka trajtuar disa raste të tilla të postimeve me pasoja të rënda shëndetësore, si dhe postime që kanë të bëjnë me vetëvrasjen.

Policia ka identifikuar fëmijët e rrezikuar dhe ka siguruar prezencën e tyre, si dhe ka njoftuar prindërit dhe mekanizmat përgjegjës për trajtim të duhur të rasteve. 

“Me qëllim që të parandalohen rreziqet në internet që iu shfaqen fëmijëve, Policia e Kosovës iu bën thirrje të gjithë qytetarëve, posaçërisht prindërve, që të kujdesen për fëmijët e tyre se çfarë bëjnë dhe postojnë në internet”, thuhet në komunikatën e PK-së.

Policia ka ndarë disa këshilla dhe kërkesa  për prindërit dhe fëmijët për përdorim të drejtë dhe të sigurt të internetit:

-prindër, flisni kohë pas kohe me fëmijët tuaj për rreziqet në internet, monitoroni se çfarë aktivitetesh bëjnë në internet, sepse kjo mund të parandalojë një të keqe, qoftë ndaj fëmijës suaj apo fëmijëve tjerë;

-kujdesuni se çfarë foto, video apo materiale tjera posedojnë fëmijët tuaj në telefonat dhe pajisjet e tjera kompjuterike;

-sigurohuni që fëmijët tuaj nuk janë duke luajtur ndonjë lojë të rrezikshme; 

-fëmijë, KUJDES me kë shoqëroheni në internet dhe i ndani të dhënat tuaja personale, asnjëherë mos u takoni fizikisht me persona të panjohur që jeni njoftuar në internet, pa iu treguar prindërve; 

-kujdes çfarë postoni në rrjete sociale;

-mos ngacmoni të tjerët në internet; 

-mos shkarkoni dhe mos shpërndani video dhe fotografi me përmbajtje të abuzimit të fëmijëve;

-mos luani lojëra që kërkojnë të kaloni sfida dhe të lëndoni veten; 

-mos qëndroni gjatë dhe pa arsye në internet;

-çfarëdo shqetësimi që keni, bisedoni menjëherë me prindin, shokun apo shoqen. Ju gjithashtu mund të lajmëroni Policinë në çdo kohë!