LIVE: Clarku nis dëshminë në Hagë

Clark për Selimin dhe Veselin: S’di për rolin e tyre, emrat ua kam parë më përpara

Gjenerali Wesley Clark gjatë dëshmisë së tij në Hagë, të hënën është pyetur për rolin e Rexhep Selimit dhe Kadri Veselit. Ai tha se nuk di asgjë për rolin  e tyre, por që emrat e tyre i ka parë më përpara.

“Jo, por i kam parë emrat e tyre më përpara”, tha Clark, raporton “Betimi për Drejtësi“.

Përveç kësaj, Clark u pyet edhe për emrin e Azem Sylës dhe Sokol Bashotës, por për asnjërin prej tyre dëshmitari tha se s’ka dijeni.

Dëshmitari tregoi se është takuar tre herë me mbrojtjen e Thaçit për këtë intervistë dhe se nuk e di konkretisht se për çfarë krimesh akuzohen katërshja e UÇK-së.

Dëshmitari duke folur për incidentin ku kishin goditur një godinë duke menduar se është bazë e forcave serbe, tregoi se kishin vrarë rreth 80 civilë të pafajshëm.

“Më vonë u kuptua që ishte një pikë grumbullimi që e administronte Ushtria Serbe ose mbase MUP-i ku vendosnin civilë shqiptarë brenda asaj ndërtese. Ndërtesa ishte e rrethuar me automjete serbe dhe kishte antena nga godina dhe anasjelltas. Na thanë se është një seli e institucioneve serbe dhe e shënjestruam. Besoj që vramë rreth 80 civilë të pafajshëm”, tha Clark.

Clark theksoi se kjo ndodhi për shkak të informacionit të gabuar që kishin marrë.

Wesley Clark do të vazhdojë dëshminë edhe nesër.

Wesley Clark për masakrën e Reçakut: Kishte rrezik që Millosheviqi t’ia linte fajin UÇK-së

Duke folur për dezinformimin gjatë periudhës së luftës, gjenerali Wesley Clark tha se ndërkombëtarët nuk dëshironin që për Masakrën e Reçakut të kryenin hetime njerëzit e Sllobodan Millosheviqit.

Clark tha se arsyeja e kësaj ka qenë sepse kishte rrezik që Millosheviq mund t’i tjetërsonte provat dhe ta krijonte situatën të dukej sikur ngjarja është kryer nga UÇK-ja.

Dëshmitari pohoi se në atëkohë, komuniteti ndërkombëtar donte që këtë rast ta hetonte Tribunali Penal për Ish-Jugosllavinë (TPNJ).

“Arsyeja që ndërkombëtarët nuk kanë dashur që njerëzit e Millosheviqit të bënin hetime të asaj se çfarë ka ndodhur në Reçak ishte se kishte rrezik që mund të tjetërsoheshin provat dhe do bëhej situata ku pretendohej se ngjarja është shkaktuar nga UÇK-ja”, lexoi fillimisht deklaratën e dëshmitarit, avokati Aiden Ellis i cili përfaqëson Jakup Krasniqin.

Ndërsa, dëshmitari e pohoi një gjë të tillë, duke thënë se këtë e kishte bërë edhe më herët Millosheviqi.

“Ideja kryesore ishte që Millosheviqi të mosdezinformonte më siç kishte bërë më herët dhe të mundohej që të manipulonte situatën”, tha dëshmitari.

Clark kishte thënë se gjatë luftës kishte dhënë vazhdimisht intervista dhe bënte deklarata duke e lavduar UÇK-në si një forcë e mirëorganizuar. Por, Clark kishte thënë se situata nuk ishte kështu. Tha se audienca e synuar e tij ishte Sllobodan Millosheviqi pasi e dinte se e dëgjonte.

“Audienca e synuar e komenteve të mia ishte Millosheviqi. E dija që ai me dëgjonte dhe dëshiroja që të projektoja këtë lloj force ndaj Millosheviqit në mënyrë që ai të nxitohej për sa i takon dorëzimit të tij”, kishte thënë Clark duke shtuar se deklaratat e tij nuk ishin vlerësime të NATO-s sa i përket kapaciteteve të UÇK-së.

Dëshmitari tha se është normale që të përdoren deklaratat politike në një situatë konflikti./Betimi për Drejtësi

Clark: Thaçi nuk ka pasur kontroll mbi njerëz që mund të kenë kryer krime

Në lidhje me deklaratën se gabimet e të tjerëve nuk mund t'i atribuohen Hashim Thaçit, gjenerali Wesley Clark tha se këtë e ka pohuar për shkak se nuk mendon ai ka pasur kontroll mbi njerëz që kanë kryer akte dhune.

Ai gjithashtu tha se nuk është e qartë nëse dhuna ishte kryer nga UÇK-ja. Por, edhe nëse do ishte kështu, sipas Clark është realizuar nga individë të caktuar.

“Unë nuk mendoj se zoti Thaçi ka pasur kontroll mbi njerëz që kanë bërë akte të tilla. Së pari, nuk është e qartë që dhuna ishte kryer nga UÇK-ja. Edhe po të ishte kështu, ajo është realizuar nga individë të caktuar”, deklaroi Clark.

Clark theksoi se edhe po të ketë qenë UÇK-ja e përfshirë në këtë dhunë, askush s’kishte mekanizëm kontrolli mbi atë se çfarë po ndodhte në terren.

“Unë kam folur me Mike Jackson për këtë dhe sigurisht ai ka folur me komandantët e tyre dhe ata kanë qenë në kontakte me persona të UÇK-së që lidheshin me zona të caktuara përgjegjësie. Unë nuk besoj që ka qenë UÇK-ja. Por edhe të ketë qenë UÇK-ja, askush nuk kishte mekanizëm kontrolli mbi atë se çfarë ndodhte në terren. Nuk funksionon një gjë e tillë që ti të jepje urdhër dhe pastaj të prisje që njerëzit ta zbatonin këtë urdhër”, tha ai.

Clark shtoi se njerëzit ishin në rezistencë për shkak se dëshironin të shpëtonin jetët e tyre.

Wesley Clark tregoi një rast kur pilotët e NATO-s kishin sulmuar një rresht të traktorëve në Drenicë pasi panë persona që po digjnin prona. Sipas tij, pilotët kishin menduar së bëhej fjalë për forca serbe që po sulmonin shqiptarët.

“Diku nga mesi i prillit, pilotët tanë fluturonin mbi Kosovë panë një rresht me traktor afër Drenicës që ishte mbushur me persona. Pra, avionët ishin shumë larg dhe po shikonin me dylbi dhe panë traktorë me persona që ndalonin në disa shtëpi dhe po u vendosnin flakën këtyre shtëpive dhe filluam të vrisnin mendjen atëherë se çfarë po ndodhë. Ky piloti filloi të sulmonte traktorët sepse mendonte se këta ishin serbë që po sulmonin shqiptarët. Pra, avioni goditi traktorët. Të nesërmen, Millosheviqi i kërkoi shtypit ndërkombëtar të shikonte vendngjarjen dhe e kuptuan që këta ishin njerëz të thjeshtë që i vranë forcat tona ajrore”, tha Clark.

Clark tha se kryen hetim dhe se pilotët u lënduan pas ballafaqimit me faktet.

“Ne kryem një hetim, pilotet u lënduan shumë kur u ballafaquan me faktet”, tha ai.

Përveç kësaj, ai tha se kishte takuar para disa vitesh dikë në aeroport, e që i kishte thënë se ka qenë në njërin prej atyre traktorëve. Madje, ai i kishte thënë Clark se i digjnin pronat e tyre për të mos ua lënë në dorë serbëve.

“Dhe shumë vite pas njerëzit më takojnë, shqiptarët me ndalojnë në rrugë dhe duan të flasin me mua. Para dy-tre viteve, takova dikë në aeroport që më tha që kam qenë edhe unë në njërin nga ata traktorë dhe unë i thash ‘ke qenë në traktor në Drenicë kur iu sulmoi A10?”, ai u përgjigj me ‘po’. Unë e pyeta se pse po ua vendosnit flakën shtëpive dhe ai u përgjigj se na po ua vendosnim flakën shtëpive sepse ne e dinim që po vinin t’i merrnin serbët dhe preferuam t’i digjnim vet sesa t’ua linim serbëve. Kjo tregon se sa të forta ishin ndjenjat, se sa ishin të zemëruar, mllefosur e sa të frikësuar. Duhet kuptuar se si ka qenë situata dhe çfarë ndjenin personat në terren në Kosovë.  Të trembur por edhe të vendosur po ashtu. Të gatshëm të digjnin pronat e tyre dhe të mos ua linin në dorë serbëve”, tha Clark.

Me kaq përfundoi pyetjet mbrojtja e Thaçit për të vazhduar më pas me atë të Kadri Veselit e përfaqësuar nga avokati Rodney Dixon./Betimi për drejtësi

Clarku tregon për mospajtimet mes amerikanëve e francezëve për veriun

Ish-komandanti i NATO-s për Evropë, gjenerali Wesley Clark, gjatë dëshmisë në Hagë ka treguar për dallimet që kishte mes amerikanëve dhe francezëve për veriun e Kosovës. 

Clark ka treguar se kishte shkuar të takonte ministrin e Jashtëm të Francës atëkohë dhe ministrin e Mbrojtjes, për të biseduar për këtë çështje. 

“Jam ankuar, sepse ishte përpjekje e organizuar e serbëve për ta spastruar zonën në veri të lumit Ibër. Kam takuar ministrin Alain Richard që më tha, ‘jo ne u kemi dhënë urdhër trupave franceze t’i mbrojnë serbët në atë zonë, t’i mbështesin ata’. Kemi pasur disa vështirësi lidhur me këtë. Por, kjo është mënyra se si funksionojnë trupat e NATO-s. Ka lloj autoriteti e pushteti që i përket vet autoriteteve kombëtare, edhe pse janë nën kontrollin e komandës së NATO-s”, ka thënë Clark. 

Ai tregon se ministrit francez Richard i kishte bërë thirrje për t’i ndryshuar urdhra, porse nuk i ndryshoi urdhrat. 

“Më vonë kam çuar përforcime tjera atje, për ta ruajtur mundësinë që shqiptarët të mund të jetojnë atje. Raporti që po merrja tregonte se doktorët shqiptarë në spitale dhe njerëzit tjerë po detyroheshin të largoheshin e po dëboheshin nga aty. Mendova dhe e kuptova se ishin paraushtarakë serbë dhe forcat speciale serbe që po e bënin këtë. Kjo është mënyra se si Beogradi vepronte”, tha Clark. 

Clark po dëshmon në Hagë, si dëshmitar i thirrur nga mbrojtja e ish-presidentit të Kosovës, Hashim Thaçi.

Ai është dëshmitari i fundit i mbrojtjes. 

Clark: Millosheviqi më tha se di si t'i trajtojë shqiptarët - "I kemi vrarë të gjithë"

Gjatë dëshmisë së tij, gjenerali amerikan Wesley Clark i ka përmendur bisedat me “kasapin e Ballkanit”, Sllobodan Millosheviq, një herë siç tha Clarku, presidenti i Jugosllavisë.

Siç ka treguar ai, Millosheviqi i ka thënë se çfarë bën ai në Kosovë është çështje e brendshme e tij.

Ndërkaq, në një rast tjetër, Millosheviqi i ka thënë se e dinë mirë ç’të bëjnë me shqiptarët dhe se nuk është hera e parë që merren me ta. Clark tha se Millosheviqi i ka thënë se do ta bëjnë atë që e kanë bërë në të kaluarën – t’i vrasin të gjithë.

“Më tha ne e dimë si t’i trajtojmë këta shqiptarë, këta vrasës. Kemi bërë këtë gjë më përpara, nuk është hera e parë. E pyeta: ‘Si i keni trajtuar? Çfarë keni bërë?’ U përgjigj: ‘I kemi vrarë të gjithë’”, është shprehur Clark të hënën në Hagë.

Ish-komandanti suprem i Forcave Aleate të NATO-s për Evropë përmendi edhe një bisedë me presidentin e Maqedonisë, Kiro Gligorov, i cili pas masakrës së familjes Jashari e ka marrë në telefon dhe i ka thënë se që nga ai moment shqiptarët në Kosovë do të ngrihen në rezistencë të armatosur.

Clark: Thaçi nuk ishte komandant ushtarak, s'kishte informacion për situatën në terren

Gjenerali amerikan Wesley Clark, i ftuar si dëshmitari i fundit i mbrojtjes së ish-presidentit Hashim Thaçi në procesin gjyqësor në Hagë, ka deklaruar se Thaçi nuk ishte komandant ushtarak.

Gjatë dhënies së dëshmisë të hënën në Hagë, Clarku ka theksuar se në takimet e para me Thaçin kanë pasur probleme komunikimi për shkak të gjuhës, ndërsa në takimin e tretë ka kërkuar ndihmë nga ai për të ditur se ku të ndërhyhet, por nuk ka marrë pasi Thaçi nuk dinte se çfarë ishte duke ndodhur.

“U takova me z. Thaçi për herë të dytë përpara se të fillonte fushata e bombardimeve nëse nuk gaboj. Ai ishte një nga personat atje, ishte personi më me autoritet, ishte më i riu, ishte më bindësi. Pra, ishte personi që ishte i veshur më mirë, kishte flokët në mënyrën më të përshtatshme. Jetonte në Zvicër, fliste gjermanisht, nuk fliste shumë anglisht asokohe. Unë ndërkohë nuk flisja shumë gjermanisht kështu që ishte pak e vështirë që të komunikonim me njëri-tjetrin, por ai nuk ishte komandanti ushtarak. Kur u takova me të herën e tretë unë kërkova ndihmë, por nuk morën ndihmë sepse ai nuk e kishte fare idenë se çfarë po ndodhte. Dhe i thash, çfarë po ndodh sepse problemi që e kisha unë si komandant ishte që ne nuk kishim një forcë në terren kështu që ne mbështeteshim thjesht te fushata ajrore. Donim që të mos sulmonim objektivat civile, por thjesht të ndërhynim me forcat ushtarake në terren. E pyetja që ia bëra unë është ku janë ata dhe ku jeni ju. Pra çfarë duhet të sulmoj unë, cilat janë objektivat e mi? Ndërkohë, përgjigja që mora prej tij ishte asgjë”, ka thënë Clark.

Sipas komandantit amerikan, në verën dhe vjeshtën e vitit 1998 Ushtria Çlirimtare e Kosovës nuk funksiononte me strukturë të qartë komanduese, por përbëhej kryesisht nga grupe lokale të organizuara spontanisht për t’i bërë ballë shtypjes së vazhdueshme serbe.

“Nuk kishte shumë informacion, s’kishte shumë gjëra për të folur sa i takon komandës (së UÇK-së në verë dhe vjeshtë të ’98-s v.j.) Me sa dinim ne, bëhej fjalë për grupe lokale të cilat ishin formuar pak a shumë në mënyrë spontane në përgjigje ndaj shtypjes serbe prej shumë e shumë vitesh,” tha ai.

Sipas tij, një moment vendimtar që rriti ndjeshëm mobilizimin e popullsisë shqiptare ishte vrasja e familjes Jashari. 

“Në veçanti pas vrasjes së familjes Jashari, gjithmonë e më tepër filloi të krijohej një alarm i përgjithshëm se do të kishte më shumë zhvillime negative dhe për këtë arsye njerëzit gjithmonë e më tepër formonin këto grupe lokale”, theksoi Clark.

Ai shtoi se më shumë informacion për UÇK-në kishte marrë nga burimet serbe sesa nga ato amerikane. 

“Serbët kishin pika të identifikuara në hartë që i quanin ‘pika terroriste’; pra, ata përpiqeshin të mblidhnin informacion për to,” tha ish-komandanti i NATO-s. 

Megjithatë, Clark theksoi se shumica e personave që përbënin këto grupe ishin banorë lokalë, të cilët, përveçse përpiqeshin të vazhdonin jetën e tyre të përditshme, synonin të mbronin veten dhe familjet nga dhuna sistematike.

Gjatë dëshmisë së tij, gjenerali Clark i përmendi bisedat me Millosheviqin, një herë siç tha Clarku, presidenti i Jugosllavisë Sllobodan Millosheviqi i ka thënë se çfarë bën ai në Kosovë është çështje e brendshme e tij. 

Ndërkaq, në një rast tjetër, Millosheviqi i ka thënë se e dinë mirë ç’të bëjnë me shqiptarët dhe se nuk është hera e parë që merren me ta. Clark tha se Millosheviqi i ka thënë se do ta bëjnë atë që e kanë bërë në të kaluarën – t’i vrasin të gjithë. Ish-komandanti suprem i Forcave Aleate të NATO-s për Evropë përmendi edhe një bisedë me presidentin e Maqedonisë, Kiro Gligorov, i cili pas masakrës së familjes Jashari e ka marrë në telefon dhe i ka thënë se që nga ai moment shqiptarët në Kosovë do të ngrihen në rezistencë të armatosur.

Mishetiq: Clarku do të tregojë se Thaçi ka qenë figurë politike pa përgjegjësi ushtarake

Mbrojtësi i ish-presidentit Hashim Thaçi, avokati Luka Mishetiq, ka paralajmëroi se dëshmia e ish-gjeneralit Wesley Clark do të tregojë se Thaçi ka qenë figurë politike pa përgjegjësi ushtarake.

Siç tha Mishetiq, Clarku do të dëshmojë edhe për takimet me Thaçin, duke e përfshirë edhe ato në Rambuje.

Clarku është dëshmitari i fundit i thirrur nga mbrojtja në çështjen e Speciales kundër Hashim Thaçit, Kadri Veselit, Rexhep Selimit dhe Jakup Krasniqit.