Seria prej 13 fitoreve e Trepçës thuajse e ka mbyllur garën për pozitën e parë në stinorin e rregullt të Superligës së Kosovës në basketboll.
Shtatë xhiro para fundit të pjesës së rregullt të kampionatit, Trepça i ka 39 pikë në vendin e parë. Bashkimi është i dyti me 35 pikë. Është thuajse e pabesueshme që “xehetarët” mund të humbin katër prej shtatë ndeshjeve të mbetura, që është “skenar” për largimin e tyre prej pozitës së parë.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoMe shumë gjasa në plejof Trepça do të startojë prej pozitës së parë e Bashkimi prej të dytës. Për pozitat tjera gara është shumë më interesante. Sidomos interesante është gara për t’i ikur dy pozitave të fundit. Pozita e tetë, përkatësisht e fundit, dërgon në kategorinë e dytë. E parafundit, përkatësisht e shtata, dërgon në plejaut.
Aktualisht i fundit është Rahoveci 029 me 28 pikë. E parafundit është Sigal Prishtina me 29 pikë. Prishtina është skuadra më e suksesshme në vend, që vazhdimisht ka luftuar për trofe. Por momentalisht është në zonën që nuk ia siguron mbetjen në elitë.
Nga 29 pikë i kanë edhe Golden Eagle Ylli në pozitën e pestë dhe Vëllaznimi në të gjashtën. GO+ Peja i ka 31 pikë në vendin e katërt, kurse Bora i ka 32 në pozitën e tretë.
Rezultatet e xhiros së 21-të, e luajtur të premten e të shtunën, e kanë bërë garën për t’i ikur pozitave të fundit edhe më interesante.
Të premten Rahoveci 029 fitoi 75:69 ndaj Golden Eagle Yllit, kurse Vëllaznimi fitoi në udhëtim ndaj Pejës me rezultat 85:74. Të shtunën, Bora e mposhti Bashkimin e Prizrenit me rezultatin 86:71, kurse Trepça me kosh të sekondës së fundit, të realizuar nga Shawn Jones, e mposhti Sigal Prishtinën në kryeqytet me rezultat 86:84.
Trajneri i Prishtinës, Dushan Dubleviq, ka thënë se humbjen nga Trepça e solli fondi i limituar i lojtarëve. Prishtina po përballet me lëndimin e disa basketbollistëve.
“Kemi luajtur mirë ndaj Trepçës dhe jemi në rrugë të mirë për pjesën e mbetur të edicionit. Ishim ekip më i mirë se Trepça, por nuk kishim fat. Prishtina do të jetë më e mirë. Na duhet edhe një lojtar i madh në pozitën pesë. Do të vijë të martën apo të mërkurën. Do të na kthehen edhe lojtarët e lënduar. Askush nuk do të na mposht në shtëpi në vazhdim të kampionatit”, ka thënë Dubleviq.
Për shkak të ndeshjes së Kosovës me Sllovakinë, nuk ka xhiro të Superligës në fundjavën e ardhshme. Xhiroja e 22-të e Superligës zhvillohet më 4 e 5 mars. Të tjera ndryshime priten në skuadra, thuajse në të gjitha.
Por Trepça aktualisht po duket e pandalshme. Pos që e fitoi Kupën e Kosovës më fitore bindëse ndaj Bashkimit në finale, skuadra e Adis Beqiragiqit po shfaqet si favorite e madhe edhe për ta mbrojtur titullin e kampionit.
Ndërkohë gara për t’u ikur dy pozitave të fundit do të jetë e fortë në shtatë xhirot e mbetura, përkatësisht në pjesën e katërt të edicionit të rregullt.
“Tani kemi më shumë kohë për të përgatitur edhe më mirë ekipin. Do të vazhdojmë luftën për të mbetur në Superligë”, ka thënë trajneri i Rahovecit 029, Goran Samargjiev.
Skuadrat prej vendit të parë e deri në vendin e gjashtë luajnë në plejof. I pari dhe i dyti kualifikohen direkt në gjysmëfinale, kurse katër skuadrat e tjera fillojnë në çerekfinale.
Hajrizi tregon pse nuk mund t’i bashkohet Kosovës
Drilon Hajrizi do të jetë mungesë e madhe e Kosovës në ndeshjen e 27 shkurtit ndaj Sllovakisë.
Hajrizi, që është prej lojtarëve kryesorë te Kosova, ka treguar për KOHËN pse nuk do të jetë në dispozicion të selektorit Bujar Loci për ndeshjen e rëndësishme të parakualifikimeve për Eurobasket 2029.
“Kam pasur telashe me gju, por për shkak të orarit shumë të ngjeshur dhe ndeshjeve të shpeshta nuk kam mundur të kem pushimin dhe trajtimin e duhur. Mjeku më ka kërkuar që të pushojë një javë deri në dhjetë ditë në këtë fazë dhe për këtë arsye e kam të pamundur të jem në dispozicion të reprezentacionit. Për këtë e kam njoftuar edhe Federatën e Basketbollit të Kosovës përmes një emaili”, ka thënë Hajrizi të dielën mbrëma.
Ai është prej lojtarëve të rëndësishëm të Trepçës dhe bashkë me Dardan Berishën për mbi një dekadë lojtarët më të mirë nga Kosova.
Kosovës i mungojnë edhe kapiteni Dardan Berisha dhe Meriton Ismaili.
Rrjedhimisht ndeshja ndaj Sllovakisë pritet të jetë shumë sfiduese.