Dronët rusë shkaktuan zjarre në qytetin Dnipro të Ukrainës dhe goditën disa zona të tij, shkroi në Telegram kryetari rajonal Vladyslav Haivanenko të martën në mëngjes, raporton AP.
Nga sulmi u dëmtuan mbi 20 automjete, gjashtë ndërtesa banimi, zyra e një organizate mediatike, një dyqan veturash dhe infrastrukturë tjetër civile. Dy persona u plagosën, tha ai.
Televizioni publik ukrainas Suspilne njoftoi se zyra e tyre në Dnipro, së bashku me studion lokale të radios, u dëmtuan nga sulmi. Ndërtesa ishte bosh në momentin e sulmit, ndaj askush nuk u lëndua.
Operatori ukrainas i hekurudhave “Ukrzaliznytsia” raportoi se vagonë trenash dhe pjesë të tjera të infrastrukturës hekurudhore u dëmtuan në Dnipro.
Disa linja hekurudhore pësuan vonesa pas sulmeve ndaj infrastrukturës hekurudhore në rajonin e Kharkivit, njoftoi kompania.
Forcat Ajrore të Ukrainës njoftuan se Rusia qëlloi katër raketa balistike Iskander-M dhe 114 dronë gjatë natës. Mbrojtja ajrore arriti të rrëzonte dhe bllokonte 101 dronë, por 13 dronë dhe katër raketa arritën objektivat e tyre, shtuan forcat ajrore.