-
Përktheu:
Flutura Gashi-Mehmeti
- 12 janar 2026 10:55
- Shpërndaje në:
Liderja franceze e ekstremit të djathtë, Marine Le Pen, ka filluar një apel të rëndësishëm në Paris këtë javë, i cili do të përcaktojë nëse ajo mund të kandidojë në zgjedhjet presidenciale të vitit 2027, pasi iu ndalua të ushtrojë detyrë publike për shkak të një dënimi për keqpërdorim të fondeve të BE-së.
Le Pen, udhëheqësja prej kohësh e Tubimit Kombëtar (RN) të ekstremit të djathtë, shihej si një favorite e mundshme në garën e vitit 2027, derisa u shpall fajtore vitin e kaluar për përvetësim të më shumë se 4 milionë eurove të fondeve të BE-së dhe iu dha një ndalim pesëvjeçar për të kandiduar për poste publike, që hyri në fuqi menjëherë.
Le Pen apeloi, ashtu si RN dhe 10 të tjerë të shpallur fajtorë për devijim të fondeve të Parlamentit Europian. Seanca dëgjimore fillon të martën dhe duhet të përfundojë më 12 shkurt.
Një vendim pritet para verës, që do të thotë se shpresat e saj për të kandiduar në vitin 2027 mbeten të mëdha nëse ndalimi i saj pesëvjeçar revokohet ose kufizohet në mënyrë drastike. Nëse ajo nuk mund të kandidojë, Le Pen ka thënë se presidenti 30-vjeçar i partisë RN, Jordan Bardella, do ta bëjë këtë në vend të saj.
Presidenti i SHBA-së, Donald Trump, dhe anëtarë të lartë të ekipit të tij shprehën mbështetje për Le Penin pas dënimit të saj, dhe çdo veprim për ta ndaluar atë të kandidojë ka të ngjarë të shfrytëzohet prej tyre në fushatën e tyre për të portretizuar gjykatat dhe zyrtarët evropianë si persona që kërkojnë të bllokojnë padrejtësisht politikanët e ekstremit të djathtë nga pushteti.
Zyrtarët e Trumpit vitin e kaluar zhvilluan diskutime të brendshme rreth sanksionimit të prokurorëve dhe gjyqtarëve francezë të përfshirë në ndalimin e Le Penit, kanë thënë katër burime për Reuters.
Lajmi, i raportuar për herë të parë nga revista gjermane Der Spiegel, u mohua nga nënsekretarja e Shtetit Sarah B. Rogers në X të enjten, duke e përshkruar atë si një "histori të rreme".
Gjatë vitit të kaluar, SHBA-ja ka vendosur sanksione kundër 11 gjyqtarëve të Gjykatës Ndërkombëtare Penale të përfshirë në çështjet kundër Izraelit.