-
Përktheu:
Flutura Gashi-Mehmeti
- 16 qershor 2025 13:18
- Shpërndaje në:
Hetuesit kanë gjetur regjistruesin e zërit në kabinën e pilotit (CVR) të avionit të rrëzuar të Air India në Indi, një hap kyç në zbulimin e shkakut të aksidentit vdekjeprurës të javës së kaluar.
Avioni i Air India me destinacion Londrën, një Boeing 787-8 Dreamliner, është rrëzuar menjëherë pas ngritjes të enjten nga qyteti perëndimor indian i Ahmedabad. Të paktën 270 persona kanë humbur jetën, shumica prej tyre pasagjerë, raporton BBC.
CVR kap audio nga kabina e pilotit, duke përfshirë bisedat e pilotëve, alarmet dhe tingujt e ambientit.
Regjistruesi i të dhënave të fluturimit (FDR), i cili regjistron parametra të rëndësishëm të fluturimit si lartësia, shpejtësia dhe performanca e motorit, ishte marrë nga mbeturinat të premten.
Si CVR ashtu edhe FDR së bashku formojnë atë që njihet zakonisht si "kutia e zezë" e një aeroplani. Është një mjet jetësor në hetimet e rrëzimeve ajrore, duke ndihmuar ekspertët të rindërtojnë momentet e fundit të fluturimit dhe të përcaktojnë shkakun e incidentit.
Më pak se një minutë pasi u ngrit nga Aeroporti Ndërkombëtar Sardar Vallabhbhai Patel i Ahmedabadit, avioni AI171 është përplasur në një ndërtesë akomodimi mjekësh në Kolegjin Mjekësor BJ dhe Spitalin Civil.
Të gjithë, përveç njërit, nga 242 pasagjerët dhe anëtarët e ekuipazhit kanë mbetur të vdekur. Zyrtarët gjithashtu janë përpjekur të përcaktojnë se sa njerëz kanë vdekur në tokë dhe kanë vazhduar procesin e ngadaltë të përputhjes së mostrave të ADN-së për të konfirmuar identitetin e viktimave.
Gjatë fundjavës, mjekët kanë thënë se 270 trupa janë nxjerrë nga vendi i rrëzimit.
