Irani po i varros objektet bërthamore nën beton e dhe

Irani po forcon me shpejtësi disa nga objektet e tij bërthamore, duke përdorur beton dhe sasi të mëdha dheu për të varrosur zonat kyçe, mes presionit ushtarak nga SHBA-ja, sipas imazheve të reja satelitore dhe analizës së Institutit për Shkencë dhe Siguri Ndërkombëtare.

Ndërkohë, përpjekjet diplomatike janë duke vazhduar. Shtetet e Bashkuara presin që brenda dy javëve të ardhshme të marrin propozime nga Irani për të adresuar dallimet mes qëndrimeve të dy vendeve, pas bisedimeve të zhvilluara të martën në Gjenevë, sipas një zyrtari amerikan. Negociatat po zhvillohen paralelisht me një shtim të pranisë ushtarake amerikane në rajon.

Në një objekt bërthamor të njohur si Taleghan 2, në kompleksin ushtarak Parchin, imazhet satelitore të 13 shkurtit tregojnë se Irani ka përfunduar ndërtimin e një sarkofagu prej betoni rreth zonës dhe tani po e mbulon atë me dhe, sipas institutit me seli në Washington, i cili merret me çështje të armëve bërthamore.

“Objekti mund të bëhet së shpejti një bunker plotësisht i paidentifikueshëm, duke ofruar mbrojtje të konsiderueshme nga sulmet ajrore”, paralajmëroi presidenti i institutit, David Albright, në një postim në platformën X.

Imazhe të tjera satelitore nga 10 shkurti tregojnë përpjekje për të forcuar dhe mbrojtur dy hyrje tunelesh nën një mal, rreth dy kilometra larg nga objekti bërthamor i Natanzit, sipas institutit. Ky është një nga objektet bërthamore që u bombarduan nga SHBA-ja dhe Izraeli në qershor të vitit të kaluar.

Në kompleksin bërthamor të Esfahanit, një tjetër impiant për pasurimin e uraniumit që u bombardua nga SHBA-ja, imazhet satelitore të 8 shkurtit tregojnë përpjekje të Iranit për të fshehur hyrjet e tuneleve.

Megjithatë, nuk është ende e qartë se sa efektive do të ishin këto masa në rast të sulmeve të fuqishme ajrore, bazuar në informacionet ekzistuese të inteligjencës.