-
Përktheu:
Flutura Gashi-Mehmeti
- 22 shtator 2025 10:31
- Shpërndaje në:
Lideri i Koresë së Veriut, Kim Jong-un, ka thënë se nuk kishte arsye për të shmangur bisedimet me SHBA-në nëse Uashingtoni ndalonte së këmbënguluri që vendi i tij të hiqte dorë nga armët bërthamore.
Media shtetërore ka raportuar të hënën se ai kurrë nuk do ta braktiste arsenalin bërthamor për t'i dhënë fund sanksioneve, raporton Reuters.
"Personalisht, unë ende kam kujtime të bukura të presidentit të SHBA-së Trump", ka raportuar KCNA se udhëheqësi i Koresë së Veriut ka thënë në një fjalim në Asamblenë Supreme Popullore të dielën.
Të dy udhëheqësit u takuan tre herë gjatë presidencës së parë të Trumpit.
Komentet e Kim vijnë ndërsa qeveria e re liberale në Seul i kërkon Trumpit të marrë drejtimin në rihapjen e dialogut me Kim, gjashtë vjet pasi të gjitha bisedimet e paqes me Phenianin dështuan për shkak të sanksioneve dhe çmontimit bërthamor.
"Nëse Shtetet e Bashkuara heqin dorë nga obsesioni absurd me denuklearizimin tonë dhe pranojnë realitetin, dhe dëshirojnë bashkëjetesë të vërtetë paqësore, nuk ka arsye që ne të mos ulemi me Shtetet e Bashkuara", është cituar të ketë thënë Kim.
Është hera e parë që Kim e ka përmendur Trumpin me emër që nga inaugurimi i presidentit të SHBA-së në janar, ka thënë Rachel Minyoung Lee, një eksperte e Koresë së Veriut me Qendrën Stimson me seli në SHBA.
Presidenti i Koresë së Jugut, Lee Jae Myung, ka thënë në një intervistë për Reuters se Koreja e Veriut po ndërtonte 15 deri në 20 bomba bërthamore në vit dhe se çdo marrëveshje që ngrinte atë prodhim do të ishte një hap i dobishëm drejt çmontimit përfundimtar të programit tërësisht.