Nga frika e agresionit rus, polakët u drejtohen trajnimeve ushtarake

Gjashtë kilometra larg kufirit me Rusinë, në veri të Polonisë, Agnieszka Jedruszak, një punonjëse zyre, po hap një gropë mbrojtëse. E shtyrë nga frika e një lufte të mundshme me Rusinë, ajo dëshiron të mbrojë familjen e saj, përfshirë djalin 13-vjeçar.

Mijëra polakë si Jedruszak po regjistrohen në trajnim ushtarak vullnetar, ndërsa ushtria polake po përpiqet të forcojë radhët e saj me ushtarë profesionistë dhe vullnetarë. Arsyeja kryesore është frika në rritje nga agresioni ushtarak i Rusisë.

“Do të bëja gjithçka për të mbrojtur fëmijën tim. Do të luftoja për ta mbrojtur”, ka thënë Jedruszak, e veshur me uniformë ushtarake dhe me fytyrë të kamufluar.

Shumë polakë kanë frikë nga Rusia, sidomos për shkak të historisë kur Polonia ishte nën ndikimin sovjetik. Këto frika janë shtuar këtë javë, pasi Polonia rrëzoi dronë rusë që kishin hyrë në hapësirën ajrore polake, raporton Reuters.

Rusia u përgjigj duke thënë se vendet perëndimore po reagojnë me emocione të tepërta dhe se ajo nuk përbën kërcënim për askënd. 

Trajnimi ushtarak i Jedruszakut u zhvillua në Braniewo, në një zonë ku stërviten tanket koreano-jugore K-2. Polonia bleu 180 tanke në vitin 2022, si pjesë e një marrëveshjeje të madhe ushtarake me Korenë e Jugut.

Më shumë se 20 mijë polakë janë regjistruar për trajnim ushtarak vullnetar në shtatë muajt e parë të vitit 2025, sipas kolonelit Grzegorz Wawrzynkiewicz, drejtues i Qendrës Qendrore të Rekrutimit Ushtarak në Poloni.

Ai pret që deri në fund të vitit, 40 mijë persona të kenë përfunduar trajnimin, shumë më tepër se 16 mijë që ishin në vitin 2022.

Që nga fillimi i luftës në Ukrainë në vitin 2022, Polonia ka dyfishuar buxhetin e mbrojtjes nga 2.2% e Prodhimit të Brendshëm Bruto në 4.7% këtë vit. Kjo është përqindja më e lartë e shpenzimeve ushtarake në NATO, madje më shumë se Gjermania, Franca dhe Britania.