Zyra e Kombeve të Bashkuara për Koordinimin e Çështjeve Humanitare (OCHA) ka dënuar propozimin izraelit që synon të ndryshojë në mënyrë themelore sistemin aktual të ndihmës në Gaza.
Izraeli po planifikon të marrë kontrollin mbi shpërndarjen e ndihmës humanitare brenda Rripit të Gazës, duke kontraktuar kompani private amerikane të sigurisë, si parakusht për të hequr bllokadën dymujore të ndihmave në drejtim të territorit, ka raportuar The Guardian.
“Nuk e pranojmë një propozim dhe një plan që nuk përputhet me parimet thelbësore humanitare të paanshmërisë, neutralitetit dhe shpërndarjes së pavarur të ndihmës”, ka thënë zëdhënësi i OCHA-s, Jens Laerke.
Plani izraelit është “projektuar për të kontrolluar dhe kufizuar më tej furnizimet, që është e kundërta e asaj që nevojitet”, ka shtuar Laerke.
Zyrtarët humanitarë paralajmërojnë se enklava palestineze ndodhet në prag të katastrofës, pasi që po mbarojnë ushqimet dhe karburantet për shkak të bllokadës së plotë izraelite të vendosur më 2 mars, e cila gjithashtu ka ndalur vaksinat dhe furnizimet mjekësore jetike.
