-
Përktheu:
Ideal Zhubi
- 20 qershor 2025 09:00
- Shpërndaje në:
Zëdhënësi i Kremlinit, Dmitry Peskov, ka thënë të premten se planet për ndryshimin e regjimit në Republikën Islamike të Iranit janë “të papranueshme” dhe se vrasja e liderit suprem, Ayatollah Ali Khamenei, do të “hapte kutinë e Pandorës”, raporton The Guardian.
Këto komente të zëdhënësit rus janë bërë një ditë pasi ministri izraelit i Mbrojtjes, Israel Katz, ka thënë se Khamenei “nuk duhet të lejohet të ekzistojë më”.
Peskovi ka deklaruar për “Sky News” se Rusia do të reagonte “shumë negativisht” në rast se Ayatollahu vritet. “Situata është skajshmërisht e tensionuar dhe paraqet rrezik jo vetëm për rajonin, por për të gjithë globin”.
Megjithatë, Peskovi s’e ka theksuar se cila do të ishte përgjigja e Rusisë në qoftë se Khamenei vritet, porse bëri të ditur se do të nxiste një përgjigje “nga brenda Iranit”.
“Do të shkaktonte lindjen e rrymave ekstreme brenda Iranit dhe ata që po flasin (për ta vrarë liderin suprem), duhet ta mbajnë në mend këtë. Ata do ta hapin kutinë e Pandorës”, ka shtuar Peskov.
Të enjten, presidenti amerikan, Donald Trump, kishte thënë se do të vendoste për ta sulmuar ose jo Republikën Islamike në dy javët e ardhshme.
