Aktivistja e klimës Greta Thunberg ishte në mesin e dhjetëra personave të arrestuar të shtunën nga policia në Hagë, teksa larguan protestuesit që po bllokonin pjesërisht një rrugë në qytetin holandez.
Thunberg i ishte bashkuar një proteste kundër subvencioneve holandeze dhe uljes së taksave për kompanitë e lidhura me industritë e karburanteve fosile, raporton AP.
Grupi i fushatës Extinction Rebellion ka thënë përpara demonstratës se aktivistët do të bllokonin një autostradë kryesore për në Hagë, por një prani e madhe e policisë, duke përfshirë oficerë mbi kalë, fillimisht i pengoi aktivistët të dilnin në rrugë.
Një grup i vogël njerëzish arritën të ulen në një rrugë tjetër dhe u ndaluan pasi shpërfillën urdhrat e policisë për t'u larguar.
Demonstruesit valëvitën flamuj dhe brohoritën: "Ne jemi të pandalshëm, një botë tjetër është e mundur".
Në shkurt të këtij viti, Thunberg, 21 vjeç, u shpall e pafajshme nga një gjykatë në Londër për refuzimin për të ndjekur një urdhër të policisë për të lënë një protestë, që bllokonte hyrjen në një konferencë të madhe të industrisë së naftës dhe gazit vitin e kaluar.
Aktivizmi i saj ka frymëzuar një lëvizje globale rinore që kërkon përpjekje më të forta për të luftuar ndryshimet klimatike që kur ajo filloi të organizonte protesta javore jashtë Parlamentit suedez duke filluar nga viti 2018.
Ajo është gjobitur vazhdimisht në Suedi dhe në Mbretërinë e Bashkuar për mosbindje civile në lidhje me protestat.
