Departamenti i Shtetit të SHBA-së thotë se ka “raporte të besueshme” se Hamas po planifikon një sulm “të afërt” kundër civilëve në Gaza, një veprim që sipas tij do të shkelte marrëveshjen e armëpushimit.
Në një deklaratë të lëshuar të shtunën, thuhet se një sulm i planifikuar kundër palestinezëve do të përbënte një “shkelje të drejtpërdrejtë dhe të rëndë” të marrëveshjes së armëpushimit dhe do të “minonte përparimin e rëndësishëm të arritur përmes përpjekjeve të ndërmjetësimit”.
Departamenti i Shtetit nuk dha detaje të mëtejshme rreth sulmit dhe nuk është e qartë se cilave raporte i referohej.
Faza e parë e marrëveshjes së armëpushimit midis Hamasit dhe Izraelit është ende në zbatim — të gjitha pengjet që ishin të gjallë janë liruar dhe trupat e të vdekurve po i kthehen ende Izraelit.
Si pjesë e marrëveshjes, Izraeli liroi 250 të burgosur palestinezë nga burgjet e tij dhe 1,718 të ndaluar nga Gaza.
Washingtoni tha se tashmë ka informuar edhe garantuesit e tjerë të marrëveshjes së paqes për Gazën — që përfshijnë Egjiptin, Katarin dhe Turqinë — dhe kërkoi nga Hamas që të respektojë detyrimet e tij sipas armëpushimit.
“Përse do të vijojë Hamas me këtë sulm, do të merren masa për të mbrojtur popullin e Gazës dhe për të ruajtur integritetin e armëpushimit,” thuhet në deklaratë.
Hamas nuk ka komentuar ende rreth deklaratës.
Hamasi mohon se po planifikonte sulme ndaj palestinezëve
Photo: Associated Press
Hamasi ka hedhur poshtë të dielën një deklaratë nga Departamenti Amerikan i Shtetit në të cilën citoheshin "raporte të besueshme" që tregonin se grupi militant palestinez do të shkelte menjëherë marrëveshjen e armëpushimit me Izraelin.
Sipas raporteve, Hamasi po planifikonte sulme ndaj palestinezëve në Gazë.
Hamasi ka thënë se akuza të tilla janë të rreme.