-
Përktheu:
Flutura Gashi-Mehmeti
- 26 gusht 2025 16:46
- Shpërndaje në:
Presidenti i SHBA-së, Donald Trump, ka thënë se dëshiron të hapë bisedime për denuklearizim me Rusinë dhe Kinën, duke rishikuar një çështje që e kishte ngritur më parë, ndërsa kërkon gjithashtu të rifillojë diplomacinë e bllokuar me Korenë e Veriut.
"Një nga gjërat që po përpiqemi të bëjmë me Rusinë dhe me Kinën është denuklearizimi, dhe është shumë i rëndësishëm", u ka thënë Trumpi gazetarëve përpara takimit të tij të hënën me presidentin e Koresë së Jugut, Lee Jae Myung, në Shtëpinë e Bardhë, raporton Reuters.
"Mendoj se denuklearizimi është një qëllim shumë i madh, por Rusia është e gatshme ta bëjë atë, dhe mendoj se edhe Kina do të jetë e gatshme ta bëjë. Nuk mund të lejojmë që armët bërthamore të përhapen. Duhet t'i ndalojmë armët bërthamore. Fuqia është shumë e madhe", ka thënë Trumpi.
Në një aktivitet të veçantë në Shtëpinë e Bardhë më herët të hënën, Trumpi ka thënë se e kishte ngritur çështjen me presidentin rus, Vladimir Putin. Ai nuk ka ndarë detaje specifike se kur u zhvillua biseda.
"Po flasim për kufizimin e armëve bërthamore. Do ta përfshijmë Kinën në këtë", është shprehur Trumpi.
Komentet e presidentit amerikan vijnë ndërsa ai shprehu dëshirën e tij për t'u takuar me udhëheqësin e Koresë së Veriut, Kim Jong Un këtë vit.
Kim ka injoruar thirrjet e përsëritura të Trumpit që kur presidenti republikan mori detyrën në janar për të ringjallur diplomacinë e drejtpërdrejtë që Trumpi ndoqi gjatë mandatit të tij 2017-2021 në detyrë, e cila nuk prodhoi asnjë marrëveshje për të ndaluar programin bërthamor të Koresë së Veriut.
Trumpi e kishte shprehur për herë të parë qëllimin e tij për të ndjekur përpjekjet për kontrollin e armëve bërthamore në shkurt, duke thënë se donte të fillonte diskutimet me Putinin dhe presidentin kinez Xi Jinping rreth vendosjes së kufizimeve në arsenalet e tyre.
Duke folur me gazetarët në Zyrën Ovale në atë kohë, Trumpi ka thënë se denuklearizimi do të ishte një qëllim i mandatit të tij të dytë dhe se shpresonte të fillonte në "të ardhmen jo shumë të largët".