-
Përktheu:
Flutura Gashi-Mehmeti
- 30 mars 2026 10:37
- Shpërndaje në:
Presidenti amerikan, Donald Trump, ka deklaruar për Financial Times se mund të "marrë naftën në Iran" dhe ndoshta të pushtojë qendrën e tij kryesore të karburantit, Ishullin Kharg.
Komentet e tij vijnë ndërsa zyrtarët amerikanë thonë se trupat amerikane po përgatiten për operacione të mundshme tokësore.
Mbështete KOHËN. Ruaje të vërtetën.
Gazetaria profesionale është interes publik. Mbështetja juaj ndihmon që ajo të mbetet e pavarur dhe e besueshme. Kontribuoni edhe ju. 1 euro e bën dallimin.
Letër lexuesit — pse po kërkojmë mbështetjen tuaj KontribuoPor pavarësisht pretendimeve të tij për ta marrë Ishullin Kharg, Trumpi ka shtuar se një marrëveshje paqeje mund të arrihet "mjaft shpejt".
Presidenti amerikan ka thënë të dielën vonë se SHBA-ja ka goditur "shumë objektiva të kërkuara prej kohësh" në Iran të dielën, ndërsa Izraeli thotë se po kryen sulme të reja ndaj Teheranit.
Të dielën kryetari i parlamentit të Iranit, Mohammad Bagher Ghalibaf, ka thënë se forcat iraniane po "prisnin" trupat tokësore amerikane në mënyrë që ata të mund të "hedhin zjarr mbi ta".
Ndërkohë, çmimi i naftës është rritur në më shumë se 115 dollarë, dhe ka një paralajmërim tjetër se çmimet e ushqimeve do të rriten ndërsa eksportimi i plehrave bëhet më i vështirë.
Çmimet e naftës po rriten ndërsa lufta në Lindjen e Mesme po zgjerohet
Ilustrim
Çmimet e naftës janë rritur dhe aksionet kanë rënë përsëri të hënën, ndërsa kriza në Lindjen e Mesme u përshkallëzua me hyrjen e rebelëve Houthi të Jemenit në luftë, dhe për shkak të shqetësimit se SHBA-ja po përgatitet të dërgojë trupa tokësore në Iran.
Rritja e çmimeve të naftës dhe perspektiva e një konflikti të zgjatur ushtruan më shumë presion mbi aksionet mes frikës për një rritje të inflacionit që mund të godasë ekonominë botërore.
Nafta e papërpunuar Brent aktualisht është në 115 dollarë për fuçi.
Kjo shënon një rritje nga çmimi i naftës së papërpunuar Brent të premten, por ende nën kulmin më 18 mars prej 119.50 dollarësh.
Spanja mbyll hapësirën ajrore për avionët amerikanë të përfshirë në sulmet ndaj Iranit
Photo: Associated Press
Spanja ka mbyllur hapësirën e saj ajrore për aeroplanët amerikanë të përfshirë në sulmet ndaj Iranit, një hap përtej mohimit të mëparshëm të përdorimit të bazave ushtarake të operuara bashkërisht, ka raportuar të hënën gazeta spanjolle El Pais, duke cituar burime ushtarake.
Mbyllja e hapësirës së saj ajrore, e cila i detyron aeroplanët ushtarakë të anashkalojnë Spanjën, anëtare të NATO-s, gjatë rrugës për në objektivat e tyre në Lindjen e Mesme, nuk përfshin situatat emergjente, ka shtuar El Pais.
"Ky vendim është pjesë e vendimit të marrë tashmë nga qeveria spanjolle për të mos marrë pjesë ose kontribuar në një luftë që u iniciua në mënyrë të njëanshme dhe kundër të drejtës ndërkombëtare", ka thënë ministri i Ekonomisë, Carlos Cuerpo, gjatë një interviste me radion Cadena Ser kur u pyet nëse vendimi për të mbyllur hapësirën ajrore të Spanjës mund të përkeqësonte marrëdhëniet me Shtetet e Bashkuara.
Kryeministri spanjoll, Pedro Sanchez, ka qenë një nga kundërshtarët më të zëshëm të sulmeve të SHBA-së dhe Izraelit ndaj Iranit, duke i përshkruar ato si të pamatura dhe të paligjshme.
Ndërkaq, presidenti Donald Trump ka kërcënuar të ndërpresë tregtinë me Madridin për shkak se i mohon SHBA-së përdorimin e bazave të Spanjës në luftë.
Trumpi insiston se me Iranin po bisedon direkt dhe indirekt
Photo: Associated Press
Presidenti i SHBA-së, Donald Trump, ka thënë të dielën në mbrëmje se “shumë objektiva” janë shkatërruar në Iran dhe se ai është i bindur për një “ndryshim regjimi”.
Trumpi gjithashtu ka thënë se Irani ka rënë dakord të lejojë kalimin e 20 anijeve që transportojnë naftë përmes Ngushticës së Hormuzit duke filluar nga e hëna në mëngjes dhe në ditët në vijim, “si shenjë respekti”.
“Do të thosha vetëm se po ecim jashtëzakonisht mirë në negociata, por me Iranin nuk dihet kurrë, sepse ne negociojmë me ta dhe pastaj gjithmonë duhet t’i bombardojmë”, u ka thënë Trumpi gazetarëve të dielën në mbrëmje në bordin e Air Force One, ndërsa po udhëtonte drejt Uashingtonit.
“Dhe po negociojmë me ta drejtpërdrejt dhe tërthorazi. Kemi emisarë, por po merremi edhe drejtpërdrejt dhe, siç e dini, ata kanë rënë dakord të dërgojnë tetë anije dy ditë më parë dhe më pas shtuan edhe dy të tjera”, ka shtuar ai.
Ai gjithashtu ka thënë se udhëheqësi i ri suprem i Iranit, Ajatollah Mojtaba Khamenei, “mund të jetë gjallë, por padyshim është në gjendje shumë të rëndë. Ai është i plagosur rëndë.”
Houthi sulmon sërish Izraelin teksa konflikti në Lindjen e Mesme po eskalon
Photo: Associated Press
Ushtria izraelite ka thënë të hënën se Irani ka lëshuar disa valë raketash drejt Izraelit, ndërsa një sulm është ndërmarrë edhe nga Jemeni për herë të dytë që nga fillimi i luftës SHBA–Izrael.
Ajo ka bërë të ditur se dy dronë nga Jemeni janë kapyr në orët e para të së hënës, por nuk ka dhënë detaje të mëtejshme. Milicia Houthi e Jemenit, e mbështetur nga Irani, iu bashkua luftës të shtunën duke lëshuar raketa drejt Izraelit, duke përshkallëzuar konfliktin që ka përfshirë Lindjen e Mesme.
Ushtria izraelite gjithashtu ka njoftuar se Forcat Ajrore po kryenin sulme në Teheran të hënën, duke goditur atë që e ka përshkryar si infrastrukturë ushtarake.
Sulmet më të fundit erdhën një ditë pasi presidenti Donald Trump ka thënë se SHBA-ja dhe Irani kishin zhvilluar takime “drejtpërdrejt dhe tërthorazi” dhe se udhëheqësit e rinj të Iranit kanë qenë “shumë të arsyeshëm”, ndërsa më shumë trupa amerikane mbërrinin në rajon.
Pakistani, i cili po vepron si ndërmjetës mes Teheranit dhe Uashingtonit, ka thënë se po përgatitej të organizonte “bisedime kuptimplota” në ditët në vijim me qëllim përfundimin e luftës njëmujore me Iranin. Nuk është e qartë nëse SHBA-ja dhe Irani kishin rënë dakord të merrnin pjesë.
“Mendoj se do të arrijmë një marrëveshje me ta, jam pothuajse i sigurt, por është e mundur që të mos ndodhë”, u ka thënë Trumpi gazetarëve të dielën në mbrëmje, ndërsa udhëtonte me avionin Air Force One drejt Uashingtonit.
Trumpi ka shtuar se mendonte që SHBA-ja tashmë kishte realizuar ndryshim regjimi në Teheran pasi sulmet kishin vrarë udhëheqësin suprem të vendit dhe zyrtarë të tjerë të lartë.
Lufta është përhapur në të gjithë Lindjen e Mesme, duke vrarë mijëra njerëz, duke shkaktuar ndërprerjen më të madhe ndonjëherë të furnizimeve me energji dhe duke goditur ekonominë globale.
Kryetari i parlamentit iranian, Mohammad Baqer Qalibaf, ka akuzuar SHBA-në se po dërgon mesazhe për negociata të mundshme, ndërkohë që në të njëjtën kohë po planifikon një pushtim tokësor.
Irani konfirmon vrasjen e komandantit të lartë, Alireza Tangsiri
Korpusi i Gardës Revolucionare Islamike (IRGC) e Iranit ka pranuar zyrtarisht vrasjen e Alireza Tangsirit, komandantit detar të IRGC-së, katër ditë pasi Izraeli kishte thënë se e kishte shënjestruar atë.
Në deklaratën e IRGC-së të publikuar në Tasnim, e lidhur me IRGC-në, thuhet se Tangsiri po "organizonte forcat dhe po forconte mburojën mbrojtëse të ishujve dhe brigjeve" dhe vdiq "për shkak të ashpërsisë së plagëve të tij".
Deklarata ka shtuar se forcat e "Marinës së IRGC-së", pavarësisht "mungesës" së komandantit Tangsiri në ditët e fundit, kanë bërë "goditje shkatërruese dhe kanë vazhduar kontrollin vendimtar mbi Ngushticën e Hormuzit".
IRGC u zotua në deklaratë "të mos pushojë derisa armiku të shkatërrohet plotësisht".
Tangsiri, një nga komandantët më të lartë të IRGC-së, ishte i përfshirë në mbikëqyrjen e kalimit të anijeve përmes Ngushticës strategjike të Hormuzit kohët e fundit. Në llogarinë e tij në X është thënë se "asnjë anije e lidhur me agresorët kundër Iranit nuk ka të drejtë të kalojë".
Ai ishte një komandant i hapur, duke bërë disa deklarata kundër SHBA-së dhe Izraelit në të kaluarën.
Tangsiri ishte sanksionuar nga Thesari i SHBA-së së bashku me komandantë të tjerë të IRGC-së në vitin 2019 pasi Irani kishte rrëzuar një dron mbikëqyrës amerikan pranë ngushticës.