-
Përktheu:
Flutura Gashi-Mehmeti
- 3 nëntor 2025 17:28
- Shpërndaje në:
Uria është përhapur në dy rajone të Sudanit të shkatërruar nga lufta, përfshirë një qytet të madh në Darfur ku luftëtarët paraushtarakë kanë kryer sulme të ashpra, ka thënë të hënën një grup global për monitorimin e urisë, ndërsa lufta ka krijuar katastrofën më të madhe humanitare në botë.
Klasifikimi i Fazës së Integruar të Sigurisë Ushqimore (IPC), autoriteti kryesor ndërkombëtar për krizat e urisë, ka thënë se uria është zbuluar në el-Fasher në Darfur dhe në qytetin Kadugli në provincën e Kordofanit Jugor.
Njëzet zona të tjera në Darfur dhe Kordofan, ku luftimet janë intensifikuar në muajt e fundit, janë gjithashtu në rrezik nga uria, sipas IPC, raporton AP.
El-Fasher kishte qenë nën rrethim nga Forcat Paraushtarake të Mbështetjes së Shpejtë për 18 muaj, duke u ndërprerë furnizimin me shumë ushqime dhe furnizime të tjera dhjetëra mijëra njerëzve. Javën e kaluar, luftëtarët e RSF-së kanë pushtuar el-Fasher, duke u raportuar se kanë nisur sulme që vranë qindra, megjithëse shkalla e dhunës është e paqartë pasi komunikimet janë të dobëta.
Qyteti Kadugli gjithashtu ka qenë nën rrethimin e RSF-së për muaj të tërë, me dhjetëra mijëra njerëz të bllokuar, ndërsa grupi paraushtarak përpiqet të pushtojë më shumë territor nga rivali i tij, ushtria sudaneze.
Lufta e ka shkatërruar Sudanin që nga prilli i vitit 2023. Më shumë se 40,000 njerëz janë vrarë, sipas shifrave të OKB-së, por grupet e ndihmës thonë se numri i vërtetë mund të jetë shumë herë më i lartë.
Luftimet kanë detyruar më shumë se 14 milionë njerëz të largohen nga shtëpitë e tyre dhe kanë nxitur shpërthime sëmundjesh.