Vance për fundin e luftës në Ukrainë: Rusët po kërkojnë shumë

Zëvendëspresidenti amerikan, JD Vance, ka thënë se Rusia po kërkon shumë në negociatat e saj me Ukrainën.

Deklarata e tij shënon zhgënjimin në rritje nga Uashingtoni me bisedimet e armëpushimit për t'i dhënë fund luftës midis dy vendeve, raporton The Guardian.

Duke folur në një konferencë sigurie të liderëve të lartë ushtarakë dhe diplomatikë në Uashington, Vance ka thënë se Shtëpia e Bardhë është e fokusuar në marrjen e dy palëve për të zhvilluar bisedime të drejtpërdrejta dhe është e gatshme të largohet nëse standardet e caktuara nuk arrihen.

“Nuk do të thosha se rusët janë të painteresuar për ta sjellë këtë gjë në një zgjidhje”, ka thënë Vance gjatë një interviste në skenë me presidentin e Këshillit të Sigurimit të Mynihut, Wolfgang Ischinger.

"Ajo që unë do të thoja është, pikërisht tani, rusët po kërkojnë një sërë kërkesash, një grup të caktuar lëshimesh për t'i dhënë fund konfliktit. Ne mendojmë se ata po kërkojnë shumë”, ka shtuar ai.

I pyetur lidhur me këtë deklaratë të mërkurën vonë, presidenti amerikan, Donald Trump, ka thënë se "Është e mundur që është e drejtë".

“Po arrijmë në një pikë ku do të duhen marrë disa vendime. Unë nuk jam i lumtur për këtë ... nuk jam i lumtur për këtë”, është shprehur Trump. 

Zyrtarët e lartë të administratës, duke përfshirë Vance dhe sekretarin e shtetit të SHBA-së, Marco Rubio, thuhet se po u shtohet frustrimi për mosfleksibilitetin e Rusisë në diskutimet për t'i dhënë fund luftës.

Steve Witkoff, i dërguari i Trumpit, ka mbajtur katër runde bisedimesh të drejtpërdrejta me Putinin, por ato nuk kanë përfunduar me lëshime konkrete nga pala ruse.

Ndërkohë, gjatë fjalëve të tij, Vance ka përsëritur kërcënimin se Shtëpia e Bardhë "do të largohej nëse mendon se nuk po bën përparim".

“Në veçanti, hapi që do të donim të bënim tani është se ne do të donim që rusët dhe ukrainasit të bien dakord për disa udhëzime bazë për t'u ulur dhe për të biseduar me njëria-tjetrën”, ka thënë ai.

Pas takimit me presidentin ukrainas, Volodymyr Zelensky në Vatikan muajin e kaluar, Trumpi ka kërcënuar Rusinë me sanksione dytësore për bombardimet e vazhdueshme të Kievit dhe qyteteve të tjera të mëdha të Ukrainës, pavarësisht bisedimeve për të arritur një armëpushim të përhershëm.