-
Përktheu:
Flutura Gashi-Mehmeti
- 28 dhjetor 2025 12:25
- Shpërndaje në:
Zvicra nuk mund të mbrohet nga një sulm në shkallë të plotë dhe duhet të rrisë shpenzimet ushtarake duke pasur parasysh rreziqet në rritje nga Rusia, ka thënë kreu i forcave të saj të armatosura, Thomas Suessli.
Vendi është i përgatitur për sulme nga "aktorë jo-shtetërorë" ndaj infrastrukturës kritike dhe për sulme kibernetike, por ushtria e saj ende përballet me boshllëqe të mëdha në pajisje, ka thënë Suessli për gazetën NZZ.
"Ajo që nuk mund të bëjmë është të mbrohemi nga kërcënimet nga distanca ose edhe nga një sulm në shkallë të plotë ndaj vendit tonë", ka deklaruar Suessli, i cili do të largohet në fund të vitit.
"Është e rëndë të dish se në një emergjencë të vërtetë, vetëm një e treta e të gjithë ushtarëve do të ishin të pajisur plotësisht", ka shtuar ai në një intervistë të botuar të shtunën.
Zvicra po rrit shpenzimet e mbrojtjes, po modernizon artilerinë dhe sistemet tokësore dhe po zëvendëson avionët luftarakë të vjetër me Lockheed Martin F-35A.
Por plani përballet me tejkalime të kostove, ndërsa kritikët vënë në pikëpyetje shpenzimet për artileri dhe municione për shkak të financave të ngushta federale.
Suessli ka thënë po ashtu se qëndrimet ndaj ushtrisë nuk kanë ndryshuar pavarësisht luftës në Ukrainë dhe përpjekjeve ruse për të destabilizuar Evropën.
Ai ka fajësuar distancën e Zvicrës nga konflikti, mungesën e përvojës së saj në luftë dhe besimin e gabuar se neutraliteti ofron mbrojtje.
"Por kjo është historikisht e pasaktë. Ka disa vende neutrale që ishin të paarmatosura dhe u tërhoqën në luftë. Neutraliteti ka vlerë vetëm nëse mund të mbrohesh me armë", ka deklaruar ai.
Zvicra është zotuar të rrisë gradualisht shpenzimet e mbrojtjes në rreth 1% të PBB-së deri rreth vitit 2032, nga afërsisht 0.7% tani, që është shumë më poshtë nivelit 5% të rënë dakord nga vendet e NATO-s.
Me këtë ritëm, ushtria zvicerane do të jetë plotësisht gati vetëm rreth vitit 2050.