Florent Muslija ka qenë shënuesi i golit që ia ka siguruar Fortuna Dusseldorfit pikët e plota në udhëtim te skuadra Preussen Munster.
Ndeshjen që i takoi xhiros së pestë të kategorisë së dytë të futbollit gjerman, Dusseldorfi e fitoi me përmbysje të rezultatit 2:1.
Mesfushori i Kosovës, Muslija, e shënoi golin e fitores në minutën e 72-të nga pika e bardhë.
Ai e kompletoi ndeshjen dhe ishte më i miri në fushë.
Për 27-vjeçarin Muslija ishte goli i tretë i shënuar këtë edicion në të gjitha garat.
Ka kontribuar edhe me një asistim.
Muslija te Dusseldorfi është transferuar në këtë afat kalimtar veror në formë huazimi deri në përfundimin e edicionit 2025/26 nga Freiburgu.