-
Nga:
Arsim Maxhera
- 14 janar 2026 10:40
- Shpërndaje në:
Përfaqësuesja U21 e Spanjës në futboll më 27 mars luan ndaj Qipros në udhëtim. Më 31 mars, Spanja U21 e pret Kosovën U21, ndërsa më 25 shtator luan në udhëtim ndaj Finlandës.
Këto tri ndeshje i takojnë Grupit A të kualifikimeve për Kampionatin Evropian 2027 për futbollistët deri në 21 vjet. Rrjedhimisht janë ndeshje të barabarta dhe që duhet të trajtohen e të prezantohen njëjtë.
Por Federata e Futbollit e Spanjës nuk po i prezanton njëjtë. Prezantimi i Kosovës nga kjo organizatë sportive vazhdon të jetë diskriminues.
Në faqen zyrtare të Federatës së futbollit të Spanjës është bërë edhe paraqitja e ndeshjeve të ardhshme të Spanjës U21. “Chipre – Espana” shkruan për ndeshjen e 27 marsit, “Espana – kosovo” për ndeshjen e 31 marsit dhe “Finlandia – Espana” për ndeshjen e 25 shtatorit.
Derisa emrat e Qipros dhe Finlandës janë shkruar si duhet, emri i Kosovës nuk është shkruar drejt – është shkruar me shkronjën e parë të vogël.
Spanja ende nuk e njeh shtetin e Kosovës. Ndonëse është e detyruar të përballet me Kosovën në shumë sporte, vazhdimisht ka shfaqur shenja diskriminimi gjatë prezantimit të shtetit të Kosovës.
Pos federatave spanjolle, sidomos asaj të futbollit, Kosova nuk është paraqitur drejt as nga televizioni spanjoll. Kjo ka rënë në sy sidomos gjatë transmetimit të ndeshjeve të përfaqësueseve A të Kosovës e të Spanjës.
Në një prej rasteve ishte shkruar “ESP – kos”.
Prezantimi diskriminues i federatës spanjolle ndaj Kosovës vazhdon, ndonëse reagimet e Federatës së Futbollit të Kosovës për këtë temë nuk kanë munguar.
Ndërkohë shorti vazhdon të vërë përballë Kosovën e Spanjën në garat kualifikuese evropiane.
Për shembull futbollistet e Kosovës U17 dhe të Spanjës U17 janë vënë në një grup të Ligës A në kualifikimet për Kampionatin Evropian të këtij viti.
Bëhet fjalë për raundin e dytë kualifikues. Spanja U17 dhe Kosova U17 do të përballen më 1 mars në Oeiras të Portugalisë. Portugalia dhe Hungaria janë përfaqësueset e tjera të grupit 6 të Ligës A.
“Portugalia, Hungaria dhe Federata e Kosovës janë rivalet e Spanjës në raundin e dytë të kualifikimeve për Kampionat Evropian”, kishte shkruar në titull federata spanjolle pas tërheqjes së shortit.
Në fotografinë e publikuar në këtë tekst nga federata spanjolle, emri i Kosovës ishte paraqitur mirë dhe me flamur. Në tekst është shkruar drejt emri i Kosovës, ndërsa në një paraqitje të grupeve është shkruar “FEDERACION DE KOSOVO”.
Në tekste të tjera, së fundi në një të publikuar më 27 dhjetor, është shkruar “Federata e Kosovës” në vend të “Kosova”.
UEFA deri më tani nuk është treguar shumë e vendosur për të mos lejuar prezantimin diskriminues të Federatës së Futbollit të Spanjës, që po vazhdon me qasje të njëjtë.
Ka edhe vende të tjera evropiane që nuk e kanë njohur Kosovën, por që emrin e shtetit e shkruajnë drejt. Ndërkohë UEFA nuk lejon përballjet e Kosovës me Serbinë, Bosnjë-Hercegovinën dhe Rusinë. Përballjet nuk lejohen me ekipe përfaqësuese dhe me klube.